ଢେଙ୍କାନାଳ,୧୬ା୧୨(ରତନ ନାୟାର): ଢେଙ୍କାନାଳ ଜିଲା ଓଡ଼ାପଡ଼ା ବ୍ଲକ କଣ୍ଟାବଣିଆ ଥାନା ମାନପୁର ଗ୍ରାମସ୍ଥିତ ବ୍ରାହ୍ମଣୀ ନଦୀ କୂଳରେ ଥିବା ଏକ ଇଟାଭାଟିରେ କାମ କରୁଥିବା ୨ଜଣ ଶ୍ରମିକଙ୍କ ଗୁରୁବାର ବିଳମ୍ବିତ ରାତିରେ ମୃତ୍ୟୁ ହୋଇଛି। ଜେନେରେଟର ଧୂଅଁାରେ ଶ୍ୱାସରୁଦ୍ଧ ହୋଇ ସେମାନଙ୍କ ମୃତ୍ୟୁ ହୋଇଥିବା ପୋଲିସ କହିଛି। ଗୁରୁତର ଜଣେ ଶ୍ରମିକଙ୍କୁ ପ୍ରଥମେ ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟ ଓ ପରେ କଟକ ସ୍ଥାନାନ୍ତର କରାଯାଇଛି। ବ୍ରାହ୍ମଣୀ ନଦୀ କୂଳରେ ଏହି ଇଟାଭାଟି ବେଆଇନ ଭାବେ ଚାଲୁଥିବା ଅଞ୍ଚଳବାସୀ ଅଭିଯୋଗ କରୁଥିବା ବେଳେ ଓଡ଼ାପଡ଼ା ତହସିଲଦାର ଓ ରାଜସ୍ବ କର୍ମଚାରୀ ଏ ବିଷୟରେ ଜାଣି ନ ଥିବା କହିବା ସାଧାରଣରେ ସନ୍ଦେହ ସୃଷ୍ଟି କରିଛି।
ଘଟଣାରୁ ଜଣାପଡିଛି, ଅନୁଗୋଳ ଜିଲା ପାଲଲହଡ଼ା ଥାନା ଈଶ୍ୱରନଗର ଅଞ୍ଚଳର ବିକ୍ରମ କୁନକୁଲଙ୍କ ପୁଅ ବିଶ୍ରା କୁନକୁଲ(୧୯) ଓ ଶୁକଲାଲ ବାନାରାଙ୍କ ପୁଅ ରସାଇ ବାନରା(୧୯) ଏବଂ ଉକ୍ତ ଅଞ୍ଚଳର କାଣ୍ଡେ ବାନରା ମାନପୁର ଗ୍ରାମସ୍ଥିତ ଇଟା ଭାଟିରେ ଶ୍ରମିକ ଭାବେ କାର୍ଯ୍ୟ କରୁଥିଲେ। ଗୁରୁବାର ରାତିରେ ସେମାନେ ଅନ୍ୟ ଶ୍ରମିକଙ୍କ ସହ ଇଟାଭାଟି ନିକଟରେ ଥିବା ଏକ ପକ୍କାଘରେ ଶୋଇଥିଲେ। ପ୍ରବଳ ଶୀତରୁ ରକ୍ଷା ପାଇବା ପାଇଁ ଘରର କବାଟ, ଝରକା ବନ୍ଦ କରି ଦେଇଥିବା ବେଳେ ଲାଇଟ୍ ଜଳାଇବାକୁ ଭିତରେ ଥିବା ଏକ ଜେନେରେଟର ଲଗାଇଥିଲେ। ହେଲେ ଜେନେରେଟରରୁ ବାହାରୁଥିବା ଧୂଆଁରେ ୩ଜଣ ଶ୍ରମିକ ଅଣନିଃଶ୍ୱାସୀ ହୋଇପଡ଼ିଥିଲେ। ଅନ୍ୟମାନେ ଘଟଣା ସମ୍ପର୍କରେ ଭାଟି ମାଲିକଙ୍କୁ ଫୋନରେ ଜଣାଇଥିଲେ। ଏହାପରେ ୨ ଶ୍ରମିକଙ୍କୁ ଏକ କମ୍ପାନୀ ଆମ୍ବୁଲାନ୍ସରେ ବଅଁରପାଳସ୍ଥିତ ଘରୋଇ ନର୍ସିଂହୋମକୁ ନିଆଯାଇଥିଲା। ସେଠାରେ ଡାକ୍ତର ଗୁରୁତର ଶ୍ରମିକ ବିଶ୍ରା ଓ ରସାଇଙ୍କୁ ମୃତ ଘୋଷଣା କରିଥିଲେ। ଗୁରୁତର ଶ୍ରମିକ କାଣ୍ଡେ ବାନରାଙ୍କୁ ଭାଟି ମାଲିକଙ୍କ ପକ୍ଷରୁ ଏକ ଘରୋଇ ଗାଡିରେ ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟ ନିଆଯାଇଥିଲା। ସେଠାରୁ ତାଙ୍କୁ କଟକ ସ୍ଥାନାନ୍ତର କରାଯାଇଛି। ଖବରପାଇ କଣ୍ଟାବଣିଆ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛି। ଅତିରିକ୍ତ ଶ୍ରମ ଅଧିକାରୀ ହଳଧର ବରାଳ କହିଛନ୍ତି, ଶ୍ରମ ଆଇନ ଅନୁଯାୟୀ ଏକ ମାମଲା ରୁଜୁ କରାଯାଇଛି। ଆଇନ ମୁତାବକ କ୍ଷତିପୂରଣ ପ୍ରଦାନ କରାଯିବ। ଏସ୍ପି ଜ୍ଞାନରଞ୍ଜନ ମହାପାତ୍ର କହିଛନ୍ତି, ଜେନେରେଟର ଧୂଆଁରେ ଶ୍ୱାସରୁଦ୍ଧ ହୋଇ ୨ଜଣଙ୍କର ମୃତ୍ୟୁ ହୋଇଛି। ଜଣେ ଗୁରୁତର ଅଛନ୍ତି। କଣ୍ଟାବଣିଆ ଥାନାରେ ନଂ. ୬/୨୩ରେ ଏକ ଅପମୃତ୍ୟୁ ମାମଲା ରୁଜୁ କରାଯାଇଛି। ଇଟାଭାଟି ମାଲିକଙ୍କୁ ଠାବ କରାଯାଇଛି। ତହସିଲଦାରଙ୍କ ସହିତ ଆଲୋଚନା ପରେ ଭାଟି କାଗଜପତ୍ର ଯାଞ୍ଚ କରାଯାଇ ପରବର୍ତ୍ତୀ ପଦକ୍ଷେପ ଗ୍ରହଣ କରାଯିବ।