ଜର୍ସି ପିନ୍ଧି ଟିମ ଇଣ୍ଡିଆକୁ ସପୋର୍ଟ କଲେ ଜର୍ମାନୀ ଫୁଟବଲ ଖେଳାଳି ଥୋମାସ ମୁଲର

ନୂଆଦିଲ୍ଲୀ,୧୪।୧୧: ଜର୍ମାନୀର କିମ୍ବଦନ୍ତୀ ଫୁଟବଲର୍‌ ଥୋମାସ ମୁଲର ମଧ୍ୟ ଟିମ ଇଣ୍ଡିଆର ପ୍ରଶଂସକ ହୋଇଛନ୍ତି। କ୍ରିକେଟ ବିଶ୍ୱକପ ସେମିଫାଇନାଲ ପୂର୍ବରୁ ସେ ଭାରତୀୟ ଦଳକୁ ଶୁଭେଚ୍ଛା ଜଣାଇଛନ୍ତି। ଏକ ଭିଡିଓ ପୋଷ୍ଟ ମାଧ୍ୟମରେ ମୁଲର ଭାରତୀୟ ଦଳକୁ ସମର୍ଥନ କରିଛନ୍ତି। ଏହି ଭିଡିଓରେ ସେ ଟିମ ଇଣ୍ଡିଆର ଜର୍ସି ପିନ୍ଧିଥିବାର ନଜର ଆସିଛନ୍ତି।

ଏହି ଜର୍ସି ବିସିସିଆଇ ଦ୍ୱାରା ଥୋମାସ ମୁଲରଙ୍କ ନିକଟକୁ ପଠାଯାଇଥିଲା। ବିସିସିଆଇ ସବୁବେଳେ କିଛି ଗୁରୁତ୍ୱପୂର୍ଣ୍ଣ ଉତ୍ସବରେ ବଡ କ୍ରୀଡ଼ା ବ୍ୟକ୍ତିତ୍ୱଙ୍କୁ ଟିମ ଇଣ୍ଡିଆର ଜର୍ସି ପ୍ରଦାନ କରିଆସୁଛି। ଏଥର ଜର୍ମାନୀର ବିଶ୍ୱକପ ବିଜେତା ଫୁଟବଲର ଥୋମାସ ମୁଲରଙ୍କୁ ଏହି ଉପହାର ପାଇଁ ଚୟନ କରାଯାଇଥିଲା। ତାଙ୍କୁ ଦିଆଯାଇଥିବା ଜର୍ସିରେ ତାଙ୍କ ନାମ ଏବଂ ତାଙ୍କ ଜର୍ସି ନମ୍ବର ମଧ୍ୟ ଦିଆଯାଇଥିଲା।
ଏହାକୁ ପାଇବା ପରେ ସେ ବହୁତ ଖୁସି ହୋଇଥିଲେ। ଏଥିପାଇଁ ସେ ଟିମ ଇଣ୍ଡିଆକୁ ଧନ୍ୟବାଦ ଜଣାଇଥିଲେ ଏବଂ ପରେ ସେମାନଙ୍କୁ ବିଶ୍ୱକପ ପାଇଁ ଶୁଭେଚ୍ଛା ଜଣାଇଥିଲେ। ଭାରତୀୟ ଜର୍ସି ପିନ୍ଧି ସେ ଏହା ମଧ୍ୟ କହିଛନ୍ତି ଯେ ବର୍ତ୍ତମାନ ତାଙ୍କୁ ତାଙ୍କ ବଗିଚାରେ କ୍ରିକେଟ ଖେଳିବା ଆରମ୍ଭ କରିବାକୁ ପଡିବ। ଏହି ଉପହାରର ଭିଡିଓ ସୋସିଆଲ ମିଡିଆରେ ପୋଷ୍ଟ କରିବାବେଳେ ସେ ବିରାଟ କୋହଲିଙ୍କୁ ମଧ୍ୟ ଟ୍ୟାଗ କରିଛନ୍ତି।