ନୂଆଦିଲ୍ଲୀ,୫।୧୨ : ଦୁଇ ଦିନିଆ ଭାରତ ଗସ୍ତରେ ଆସି ଜର୍ମାନୀ ବୈଦେଶିକ ମନ୍ତ୍ରୀ ଏନାଲେନା ବେୟରବୋକ ସୋମବାର ଦିଲ୍ଲୀରେ ପହଞ୍ଚିଛନ୍ତି। ସେ ଭାରତୀୟ ବହିର୍ବ୍ୟାପାର ମନ୍ତ୍ରୀ ଏସ. ଜୟଶଙ୍କରଙ୍କ ସମେତ ଅନେକ ନେତାଙ୍କୁ ଭେଟିବେ। ଦିଲ୍ଲୀରେ ପହଞ୍ଚିବା ପୂର୍ବରୁ ସେ କହିଥିଲେ ଯେ ଭାରତ ହେଉଛି ବିକଶିତ ହେଉଥିବା ଏକ ଅଥନୈତିକ ଶକ୍ତି ଏବଂ ସୁଦୃଢ଼ ଗଣତନ୍ତ୍ର। ସେ ଅନେକ ଦେଶ ପାଇଁ ଭାରତ ଏକ ଆଦର୍ଶ ପାଲଟିଛି।
ଏନାଲେନା କହିଛନ୍ତି ଯେ ସମସ୍ତ ଆଭ୍ୟନ୍ତରୀଣ ତଥା ସାମାଜିକ ଆହ୍ବାନ ସତ୍ତ୍ୱେ ଭାରତ ବିଶ୍ୱର ଅନେକ ଦେଶ ପାଇଁ ସମନ୍ବୟର ଏକ ସେତୁ ସାଜିଛି। ଭାରତ ମଧ୍ୟ ଜର୍ମାନୀର ଏକ ପ୍ରାକୃତିକ ଅଂଶୀଦାର।
ଏନାଲେନା ଟୁଇଟ କରି କହିଛନ୍ତି, ଜି-୭ର ଜର୍ମାନୀର ଅଧ୍ୟକ୍ଷତାର ଶେଷ ମାସରେ ମୁଁ ଭାରତ ଗସ୍ତ କରୁଛି। ଭାରତ ଜି-୨୦ର ଅଧ୍ୟକ୍ଷତା ଗ୍ରହଣ କରିଛି। ମୋର ଆଲୋଚନା ଆମ ସମୟର ସବୁଠାରୁ ଜରୁରୀ କାର୍ଯ୍ୟ ଉପରେ କେନ୍ଦ୍ରୀତ ହେବ।
ଭାରତ ଏବଂ ଜର୍ମାନୀ ଦୁଇ ଦେଶ ମିଳିତ ଭାବେ ଜଳବାୟୁ ସଙ୍କଟକୁ ମୁକାବିଲା କରିବା ଏବଂ ଏକ ନିୟମ ଆଧାରିତ ଅନ୍ତର୍ଜାତୀୟ ବ୍ୟବସ୍ଥାର ରକ୍ଷଣାବେକ୍ଷଣ କରିବେ। ବାଲିରେ ଅନୁଷ୍ଠିତ ଜି -୨୦ ଶିଖର ସମ୍ମିଳନୀରେ ଭାରତ ଦର୍ଶାଇଛି ଯେ ଏହା ବିଶ୍ୱସ୍ତରରେ ନିଜର ଭୂମିକା ଗ୍ରହଣ କରିବାକୁ ପ୍ରସ୍ତୁତ। ଜି -୨୦ ଶିଖର ସମ୍ମିଳନୀରେ ଭାରତ ସ୍ପଷ୍ଟ କରିଛି ଯେ ଏହା ରୁଷିଆ-ୟୁକ୍ରେନ ଯୁଦ୍ଧକୁ ବିରୋଧ କରେ। ଏଥିପାଇଁ ଭାରତକୁ ଧନ୍ୟବାଦ ଜଣାଉଛି ବୋଲି ଏନାଲେନା କହିଛନ୍ତି।
ଏହାପୂର୍ବରୁ ଜର୍ମାନ ଦୂତାବାସ କହିଛି ଯେ ଭାରତର ବହିର୍ବ୍ୟପାର ମନ୍ତ୍ରୀ ସୁବ୍ରହ୍ମଣ୍ୟମ ଜୟଶଙ୍କରଙ୍କ ସହ ଏନାଲେନାଙ୍କ ଆଲୋଚନା ବେଶ୍ ଗୁରୁତ୍ୱପୂର୍ଣ୍ଣ ସାବ୍ୟସ୍ତ ହେବାର ଆଶା ରହିଛି। ବର୍ଲିନରେ ଜର୍ମାନୀର ଫେଡେରାଲ ବୈଦେଶିକ କାର୍ଯ୍ୟାଳୟର ମୁଖପାତ୍ର କହିଛନ୍ତି ଯେ ଦୁଇ ଦିନିଆ ଗସ୍ତ ସମୟରେ ତୈଳ, କୋଇଲା ଏବଂ ଗ୍ୟାସ ବ୍ୟତୀତ ଶକ୍ତି କ୍ଷେତ୍ରରେ ସହଯୋଗ ଉପରେ ମଧ୍ୟ ଆଲୋଚନା କରାଯିବ।