ବର୍ଲିନ,୯ା୧୦: ରୁଷିଆ ଏବଂ ୟୁକ୍ରେନ ମଧ୍ୟରେ ହୋଇଥିବା ଯୁଦ୍ଧ ୟୁରୋପକୁ ଏକ ଶକ୍ତି ସଙ୍କଟର ଆହ୍ବାନ ଦେଇଥିବାବେଳେ ସୁରକ୍ଷା ନେଇ ପ୍ରଶ୍ନ ଉଠିଛି। ଏହି କାରଣରୁ ନାଟୋ ସଦସ୍ୟ ଜର୍ମାନୀ କହିଛି, ଏହି ସାମରିକ ସହଯୋଗୀ ଦଳ ଆଗକୁ ଯାଇ ଅନ୍ୟ କିଛି କରିବା ଉଚିତ। ଜର୍ମାନୀର ପ୍ରତିରକ୍ଷା ମନ୍ତ୍ରୀ ଖ୍ରୀଷ୍ଟିନା ଲାମ୍ବ୍ରେଚ କହିଛନ୍ତି, ନାଟୋ ବର୍ତ୍ତମାନ ନିଜକୁ ରକ୍ଷା କରିବା ପାଇଁ ଆଉ କିଛି ପଦକ୍ଷେପ ନେବା ଉଚିତ। ସେ ତାଙ୍କ ଅଫିସିଆଲ ଆକାଉଣ୍ଟରୁ ଏ ସମ୍ପର୍କରେ ଏକ ଟୁଇଟ୍ ମଧ୍ୟ କରିଛନ୍ତି।
ଲିଥୁଆ ଗସ୍ତ ସମୟରେ ସେ ଏହା କହିଛନ୍ତି। ଲିଥୁଆରେ ନାଟୋ ମିଶନ ଅଧୀନରେ ସେ ତାଙ୍କ ସୈନ୍ୟମାନଙ୍କୁ ଭେଟି ସେମାନଙ୍କ ଅବସ୍ଥା ବିଷୟରେ ପଚାରି ବୁଝିଥିଲେ। ଏହି ସମୟରେ ଲିଥୁଆର ପ୍ରତିରକ୍ଷା ମନ୍ତ୍ରୀ ମଧ୍ୟ ତାଙ୍କ ସହ ଉପସ୍ଥିତ ଥିଲେ।
ସେ ଆହୁରି ମଧ୍ୟ କହିଛନ୍ତି, ରୁଷିଆର ରାଷ୍ଟ୍ରପତି ଏବଂ ଅନ୍ୟ ବରିଷ୍ଠ ଅଧିକାରୀମାନେ ବିଭିନ୍ନ ଫୋରମରେ ପରମାଣୁ ଶକ୍ତି ବିଷୟରେ ବାରମ୍ବାର କହିଛନ୍ତି। ୟୁକ୍ରେନକୁ ସମର୍ଥନ କରିବାକୁ ପାଶ୍ଚାତ୍ୟ ଦେଶମାନଙ୍କୁ ଚେତାବନୀ ମଧ୍ୟ ଦେଇଛନ୍ତି। ଯଦିଓ ଆମେରିକା ଭାବୁନାହିଁ ଯେ, ରୁଷିଆ ଏହି ଯୁଦ୍ଧରେ ପରମାଣୁ ଅସ୍ତ୍ର ବ୍ୟବହାର କରିବ। ପ୍ରତିରକ୍ଷା ମନ୍ତ୍ରୀ ତାଙ୍କ ଲିଥୁଆର ପ୍ରତିପକ୍ଷଙ୍କ ଉପସ୍ଥିତିରେ କହିଛନ୍ତି ନାଟୋକୁ ଅଧିକ ଶକ୍ତିଶାଳୀ କରିବା ପାଇଁ ଜର୍ମାନୀ ସପକ୍ଷରେ ଅଛି।
