କରୋନା ମହାମାରୀ ଯୋଗୁ ବିଶ୍ୱର ଅଧିକାଂଶ ଦେଶ ପ୍ରଭାବିତ ହୋଇଛନ୍ତି। ଏହି ଘାତକ ଭୂତାଣୁର ଆଜିପର୍ଯ୍ୟନ୍ତ ଭ୍ୟାକ୍ସିନ ବା ଟିକା ବାହାରିନାହିଁ। ଏହି ଭୂତାଣୁରୁ ମୁକ୍ତି ପାଇବା ପାଇଁ ଲୋକେ ନୂଆ ନୂଆ ତରିକା ଆପଣାଉଛନ୍ତି। ଏମିତି ଏକ ଉଦାହରଣ ଦେଖିବାକୁ ମିଳିଛି ଜର୍ମାନୀରେ। ଭାରାକ୍ରାନ୍ତ ମନକୁ ଟିକେ ହାଲୁକା କରିବା ପାଇଁ ଏଠାରେ ସାମାଜିକ ଦୂରତା ରକ୍ଷା କରି ଆପାର୍ଟମେଣ୍ଟ ଛାତ ଉପରେ ଏକ ମେଲୋଡି ପାର୍ଟିର ଆୟୋଜନ କରାଯାଇଥିଲା। ଏହି ଭିନ୍ନ ଧରଣର ମ୍ୟୁଜିକ୍ ପାର୍ଟିରେ ଲୋକେ ନିଜ ନିଜ ଘର ବାଲକୋନି, ଛାତ ଏବଂ ରାସ୍ତାରେ ଠିଆ ହୋଇ ସଙ୍ଗୀତର ମଜା ନେଇଥିଲେ। ସୋସିଆଲ ମିଡିଆରେ ଏହି ମ୍ୟୁଜିକ୍ ପାର୍ଟିର ଫଟୋ ଭାଇରାଲ ହେବାରେ ଲାଗିଛି।
ଆୟୋଜକଙ୍କ ମତରେ, ପ୍ରାୟ ୧ ଘଣ୍ଟା ଧରି ଏହି କାର୍ଯ୍ୟକ୍ରମ ପରିବେଷଣ କରାଯାଇଥିଲା। ସାମାଜିକ ଦୂରତା ରକ୍ଷା କରି ଏହି କାର୍ଯ୍ୟକ୍ରମକୁ ଲୋକେ ବେଶ୍ ଉପଭୋଗ କରିଥିଲେ। ଏହି ସଙ୍ଗୀତ କାର୍ଯ୍ୟକ୍ରମ ଆୟୋଜିତ ହେବାର ମୁଖ୍ୟ ଉଦ୍ଦେଶ୍ୟ ହେଲା ପାରମ୍ପରିକ ବାଦ୍ୟଯନ୍ତ୍ରର ବ୍ୟବହାର। ଏଥିରେ ୧୬ଟି ଆଲଫର୍ନ, ୯ଟି ତୂରୀ ଏବଂ ୪ଟି ଟ୍ୟୁବ୍ର ବ୍ୟବହାର କରାଯାଇଥିଲା। ଆଲଫର୍ନ ବାଦ୍ୟଯନ୍ତ୍ରଟି ସାଧାରଣତଃ ପାର୍ବତ୍ୟ ଅଞ୍ଚଳରେ ବାସ କରୁଥିବା ଲୋକମାନଙ୍କ ଦ୍ୱାରା ବ୍ୟବହୃତ ହୋଇଥାଏ।
