ମୋହନା,୨୧ା୪(ମନ୍ମଥ ମିଶ୍ର)ମୋହନା ବ୍ଲକ ଅନ୍ତର୍ଗତ ଚନ୍ଦ୍ରଗିରି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ କର୍ମଚାରୀଙ୍କ ଅଶାନ୍ତି ଦେଖାଦେଇଛି । ଦିନରାତି ପରିଶ୍ରମ କଲେ ବି କର୍ମଚାରୀଙ୍କୁ ମିଳୁନି ଠିକ ସମୟରେ ଦରମା। ଏଭଳି ସଙ୍ଗିନ୍ ଅଭିଯୋଗ କରିଛନ୍ତି ସ୍ବାସ୍ଥ୍ୟ କେନ୍ଦ୍ରର ଡାକ୍ତର, ନର୍ସ ଓ କର୍ମଚାରୀ। ଗଜପତି ଜିଲାର ଏକ ଆଦର୍ଶ ସ୍ବାସ୍ଥ୍ୟକେନ୍ଦ୍ର ଭାବେ ଚନ୍ଦ୍ରଗିରି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ରାଜ୍ୟ ଓ କେନ୍ଦ୍ର ସରକାରଙ୍କ ପକ୍ଷରୁ ସୁନାମ ଓ ପୁରଷ୍କୃତ ମଧ୍ୟ ହୋଇଛି। ହେଲେ ଏଠାକାର ପାରିପାର୍ଶ୍ୱିକ ସ୍ଥିତି ଉନ୍ନତମାନର ଥିବା ବେଳେ ଆକାଉଣ୍ଟାଣ୍ଟଙ୍କ ଖାମଖିଆଲି ମନୋଭାବ ଯୋଗୁ କର୍ମଚାରୀମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ସେମାନଙ୍କ ଦରମା ଠିକ ସମୟରେ ମିଳୁନଥିବା ଅଭିଯୋଗ ନେଇ ଧାରଣାରେ କର୍ମଚାରୀ। ବାରମ୍ବାର ଉପରିସ୍ଥ ଅଧିକାରୀଙ୍କୁ ଏ ସମ୍ପର୍କରେ ଜଣାଇଲେ ମଧ୍ୟ କୌଣସି ସୁଫଳ ମିଳୁନାହିଁ। ତେବେ ରାଜ୍ୟ ଓ କେନ୍ଦ୍ର ସରକାର ସ୍ବାସ୍ଥ୍ୟକେନ୍ଦ୍ରର ଉନ୍ନତିକରଣ ପାଇଁ ବିଭିନ୍ନ ଯୋଜନାରେ କୋଟି କୋଟି ଟଙ୍କା ପାଣି ଭଳି ଖର୍ଚ୍ଚ କରୁଥିବା ବେଳେ ଏଠାକାର ପରିସ୍ଥିତି ସମ୍ପୂର୍ଣ୍ଣ ଓଲଟା। ବିଡ଼ମ୍ବନାର ବିଷୟ ଦୀର୍ଘ ଦିନ ବିତିଯାଇଥିଲେ ମଧ୍ୟ ଦରମା ଠିକ ସମୟରେ ପାଇବାରୁ ବଞ୍ଚିତ ଥିବା ସ୍ବାସ୍ଥ୍ୟକେନ୍ଦ୍ର କର୍ମଚାରୀମାନେ ଅଭିଯୋଗ କରିଛନ୍ତି। କର୍ମଚାରୀମାନଙ୍କଠାରୁ ଆରମ୍ଭ କରି ଭାରପ୍ରାପ୍ତ ଚିକିତ୍ସା ଅଧିକାରୀଙ୍କୁ ଆଜି ଯାଏ ମିଳିନି ପାଉଣା। ଚନ୍ଦ୍ରଗିରି ଓ ମୋହନା ଉଭୟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଦାୟିତ୍ୱରେ ରହିଥିବା ଡିଡିଓ ଡ଼ା. ଜୟ ପଣ୍ଡାଙ୍କୁ ଲିଖିତ ଅଭିଯୋଗ ଦେଇଛନ୍ତି କର୍ମଚାରୀ। ଏ ସମ୍ପର୍କରେ ମୋହନା ଗୋଷ୍ଠୀ ସ୍ବାସ୍ଥ୍ୟ ଅଧିକାରୀ ଜୟରାମ ପଣ୍ଡାଙ୍କୁ ଯୋଗାଯୋଗ କରାଯିବାରୁ ଚନ୍ଦ୍ରଗିରି ଆକାଉଣ୍ଟାଣ୍ଟ ପ୍ରାୟ ଅଧିକାଂଶ ସମୟ ଅନୁପସ୍ଥିତ ରହିଥିବାରୁ କର୍ମଚାରୀଙ୍କ ଠିକ ସମୟରେ ପାଉଣା ପାଇବାରୁ ବଞ୍ଚିତ ହେଉଛନ୍ତି। ଅନ୍ୟପକ୍ଷରେ ଚନ୍ଦ୍ରଗିରି ଆକାଉଣ୍ଟାଣ୍ଟ ପି ଭି ରାମଣା ରାଓ ମାର୍ଚ୍ଚ ମାସ ପାଇଁ ବିଳମ୍ବ ହୋଇଛି ଆଗକୁ ଏହିଭଳି ଦେଖାଦେବ ନାହିଁ ବୋଲି କହିଛନ୍ତି।