କୋଲକାତା,୧୨।୪ : ମଧ୍ୟାହ୍ନ ଭୋଜନ ମାମଲାରେ ପଶ୍ଚିମବଙ୍ଗର ସମସ୍ୟା ବଢ଼ିିପାରେ ବୋଲି କୁହାଯାଉଛି। ରାଜ୍ୟରେ ହିସାବଠାରୁ ଅଧିକ ୧୬ କୋଟି ମଧ୍ୟାହ୍ନ ଭୋଜନ ଥାଳି ସମ୍ପର୍କରେ ତଥ୍ୟ ପ୍ରଦାନ କରାଯାଇଛି। ଏହି ୧୬ କୋଟି ମଧ୍ୟାହ୍ନ ଭୋଜନ ଥାଳି କିଏ ଖାଉଛି ବୋଲି ପ୍ରଶ୍ନ ଉଠିଛି। ଏହାକୁ ଭୂତ ପିଲା ଖାଉଥିବା ଚର୍ଚ୍ଚା ହେଉଛି। ଫଳରେ ପଶ୍ଚିମବଙ୍ଗ ସରକାର ଏବେ ହରଡ଼ଘଣାରେ ପଡିଛନ୍ତି। ଶିକ୍ଷା ମନ୍ତ୍ରଣାଳୟର ଏକ କମିଟି ଜାଣିବାକୁ ପାଇଛି ଯେ ଗତ ବର୍ଷ ଏପ୍ରିଲରୁ ସେପ୍ଟେମ୍ବର ମଧ୍ୟରେ ମଧ୍ୟାହ୍ନ ଭୋଜନ ଯୋଜନା ଅଧୀନରେ ପଶ୍ଚିମବଙ୍ଗ ସରକାର ୧୬ କୋଟି ଅଧିକ ଥାଳି ବିଷୟରେ ସୂଚନା ଦେଇଛନ୍ତି।
କମିଟି ଏହାର ମୂଲ୍ୟ ୧୦୦ କୋଟି ଟଙ୍କା ବୋଲି ଆକଳନ କରିଛି। ଅଧିକାରୀମାନେ କହିଛନ୍ତି ଯେ ଜାନୁଆରୀରେ ପିଏମ-ପୋଷଣ ଯୋଜନାରେ ଅନିୟମିତତା ଅଭିଯୋଗ ପାଇବା ପରେ ଶିକ୍ଷା ମନ୍ତ୍ରଣାଳୟ ଏକ କମିଟି ଗଠନ କରିଥିଲା। ଏହି ମିଳିତ ସମୀକ୍ଷା ମିଶନ କେନ୍ଦ୍ରୀୟ ଅନୁଦାନପ୍ରାପ୍ତ ଯୋଜନାର ସମୀକ୍ଷା ପାଇଁ ଗଠନ କରାଯାଇଥିଲା। ଏହି କମିଟି ବିଭିନ୍ନ ସ୍ତରରେ ପରିବେଷିତ ଖାଦ୍ୟର ସଂଖ୍ୟା ବିଷୟରେ ସୂଚନା ପ୍ରଦାନ କରିବାରେ ଗୁରୁତର ଅସଙ୍ଗତି ହୋଇଥିବା ଜାଣିବାକୁ ପାଇଥିଲା ।
କମିଟିର ରିପୋର୍ଟରେ ଏହା ଉଲ୍ଲେଖ କରାଯାଇଛି ଯେ, ରାଜ୍ୟ ସରକାର କେନ୍ଦ୍ର ସରକାରଙ୍କ ନିକଟରେ ଉପସ୍ଥାପିତ କରିଥିବା ପ୍ରଥମ ଏବଂ ଦ୍ୱିତୀୟ ତ୍ରୟମାସିକ ବିକାଶ ରିପୋର୍ଟରେ, ଏପ୍ରିଲରୁ ସେପ୍ଟେମ୍ବର ୨୦୨୨ ମଧ୍ୟରେ, ପିଏମ-ପୋଷଣ ଯୋଜନା ଅନ୍ତର୍ଗତ ୧୪୦.୨୫ କୋଟି କୋଟି ମଧ୍ୟାହ୍ନ ଭୋଜନ ଥାଳି ଦିଆଯାଇଥିବା ଉଲ୍ଲେଖ କରାଯାଇଥିଲା। କିନ୍ତୁ ତ୍ରୟମାସିକ ରିପୋର୍ଟ ଅନୁଯାୟୀ, ପରିବେଷିତ ଭୋଜନର ପ୍ଲେଟ ସଂଖ୍ୟା ୧୨୪.୨୨ କୋଟି ଥିଲା। ରିପୋର୍ଟରେ କୁହାଯାଇଛି ଯେ, ଏହିପରି ଭାବରେ, ମଧ୍ୟାହ୍ନ ଭୋଜନ ଥାଳି ବିଷୟରେ ୧୬ କୋଟି ଅଧିକ ଆକଳନ କରିବା ଏକ ଗୁରୁତର ବିଷୟ। ଏହାର ସାମଗ୍ରୀର ମୂଲ୍ୟ ୧୦୦ କୋଟି ଟଙ୍କା ହେବ ବୋଲି ଆକଳନ କରାଯାଇଛି।
କମିଟି ଅନ୍ୟାନ୍ୟ ସାମଗ୍ରୀ ଉପରେ ନିର୍ମିତ ପାଣ୍ଠିର ବ୍ୟୟକୁ ନେଇ ମଧ୍ୟ ପ୍ରଶ୍ନ ଉଠାଇଛି। କମିଟିର ରିପୋର୍ଟ ଅନୁଯାୟୀ, ରାଜ୍ୟ ସରକାର ଦାବି କରିଛନ୍ତି ଯେ ହାରାହାରି ୯୫ ରୁ ପ୍ରତିଶତରୁ ଅଧିକ ପିଲାଙ୍କୁ ମଧ୍ୟାହ୍ନ ଭୋଜନ ଯୋଗାଇ ଦିଆଯାଉଛି। ମାତ୍ର କମିଟି ସଦସ୍ୟଙ୍କ ଦ୍ୱାରା ତଦାରଖ କରାଯାଉଥିବା ବିଦ୍ୟାଳୟଗୁଡ଼ିକରେ ଏହି ସଂଖ୍ୟା ୬୦ରୁ ୮୫ ପ୍ରତିଶତ ଥିବା ଜଣାପଡ଼ିଥିଲା।
ଏହାପୂର୍ବରୁ ଏପ୍ରିଲ ୩ ରେ ପଶ୍ଚିମବଙ୍ଗର ଶିକ୍ଷା ମନ୍ତ୍ରୀ ବ୍ରତ୍ୟ ବସୁ ଟୁଇଟ କରି କହିଥିଲେ, ରାଜ୍ୟରେ ବିଦ୍ୟାଳୟ ପରିଦର୍ଶନ କରିଥିବା ମିଳିତ ସମୀକ୍ଷା ମିଶନ ରାଜ୍ୟର ପ୍ରକଳ୍ପ ନିର୍ଦ୍ଦେଶକଙ୍କୁ ନ ଜଣାଇ ରିପୋର୍ଟ ଦାଖଲ କରିଛନ୍ତି।