ଗ୍ରାହକଙ୍କୁ ଆକୃଷ୍ଟ କରିବା ପାଇଁ ଅନେକ ଅଜବ ପ୍ରକାରର ରେଷ୍ଟୁରାଣ୍ଟ ବିଷୟରେ ଶୁଣିଥିବେ। ସେହିଭଳି ଏକ ଅଜବ ଥିମ୍ର ରେଷ୍ଟୁରାଣ୍ଟ ଅଛି ସ୍ପେନରେ, ଯାହାର ନାଁ ହେଉଛି ‘ଲା ମାସିୟା ଏଁକାଟଣ୍ଡା’। ଉକ୍ତ ରେଷ୍ଟୁରାଣ୍ଟକୁ ପ୍ରବେଶ କରୁ କରୁ ଆପଣ ଡରରେ ଥରିବାକୁ ଲାଗିବେ। କାରଣ ଏହାର ପରିବେଶ ବହୁତ ଭୟଙ୍କର। ପ୍ରବେଶ କରୁ କରୁ ରକ୍ତ ଭିଜା ଛୁରି ଧରି ଭୂତ ଆପଣଙ୍କୁ ସ୍ବାଗତ କରିବ। ରେଷ୍ଟୁରାଣ୍ଟ ଭିତରେ ସତସତିକା ଲାଗୁଥିବା ଅନେକ ଶବ ଝୁଲିଥିବା ଦେଖିବାକୁ ପାଇବେ। ଆଉ ଭିତରକୁ ପ୍ରବେଶ କଲେ ଭୂତପ୍ରେତ ଆପଣଙ୍କୁ ଖାଦ୍ୟ ପରଷିବା ପାଇଁ ପହଞ୍ଚତ୍ୟିବେ। ଯଦିଓ ଏହି ଭୂତପ୍ରେତ ସତସତିକା ନୁହେଁ, ଆଉ ଏମାନେ ସମସ୍ତେ ରେଷ୍ଟୁରାଣ୍ଟର କର୍ମଚାରୀ ତଥାପି ସେମାନଙ୍କର ଭୟଙ୍କର ବେଶ ଦେଖି ନିଶ୍ଚୟ ଡର ଲାଗିବ। ସପ୍ତାଦଶ ଶତାବ୍ଦୀରେ ଜୋଶେଫ ମା’ ରିଏସ୍ ଓ ସୁରୋକା ମିଶି ‘ମାସିୟା ସେଣ୍ଟା ରୋଜା’ ନାମକ ଘର ତିଆରି କରିଥିଲେ। ହେଲେ ପରେ ପାରିବାରିକ ବିବାଦ ହୋଇଥିଲା। ଆଉ ମାସିୟା ସେଣ୍ଟା ରୋଜା ବ୍ୟବହାର ନ ହୋଇ ଭୂତକୋଠି ପାଲଟିଗଲା। ୨୦ ବର୍ଷ ପରେ ୧୯୭୦ରେ ସୁରୋକାଙ୍କ ବଂଶଜ ଏହାକୁ ରେଷ୍ଟୁରାଣ୍ଟରେ ପରିଣତ କରିବାକୁ ନିଷ୍ପତ୍ତି ନେଲେ। ତେବେ ସେହି ପରିବାରର ମାନ୍ୟତା ଥିଲା ଯେ, ସେହି ଘର ଶ୍ରାପିତ। ତେଣୁ ସେମାନେ ଯୋଜନା କଲେ ରେଷ୍ଟୁରାଣ୍ଟକୁ ହଣ୍ଟେଡ ରେଷ୍ଟୁରାଣ୍ଟ ଥିମ୍ରେ ଆରମ୍ଭ କରିବେ। ଆଉ ‘ଲା ମାସିୟା ଏଁକାଟଣ୍ଡା’ ନାମ ଦେଇ ଏହି ହଣ୍ଟେଡ ରେଷ୍ଟୁରାଣ୍ଟ ଆରମ୍ଭ କଲେ। ଏହି ରେଷ୍ଟୁରାଣ୍ଟରେ ଭୟଙ୍କର ଶୋ’ ସହ ବିଭିନ୍ନ ପ୍ରକାରର ମ୍ୟାଜିକାଲ ଟ୍ରିକ୍ ବି ପରିବେଷଣ କରାଯାଏ। ଏଠାରେ ଗ୍ରାହକଙ୍କୁ ଯଥା ସମ୍ଭବ ଡରେଇବାର ପ୍ରୟାସ କରାଯାଏ। ତେଣୁ ଦୁର୍ବଳ ହୃଦୟର ଲୋକେ ଏଠାକୁ ନ ଯିବା ଭଲ।