ଛେଣ୍ଡିପଦା,୧୦ା୧(ସ୍ବ.ପ୍ର.): ଦୀର୍ଘ ୩୦ବର୍ଷ ହେବ ଅଚଳ ହୋଇପଡିଥିବା ଛେଣ୍ଡିପଦା ବ୍ଲକ ବାହାଳସାହି ପଞ୍ଚାୟତର ଘଡିଆନାଳି ଜଳସେଚନ ପ୍ରକଳ୍ପ ଶୀଘ୍ର କାର୍ଯ୍ୟକ୍ଷମ ହେବ। ରବିବାର ଏହି ପ୍ରକଳ୍ପର ଶିଳାନ୍ୟାସ କାର୍ଯ୍ୟକ୍ରମ ଅନୁଷ୍ଠିତ ହେବା ପରେ ଚାଷୀମାନଙ୍କ ମନରେ ଆନନ୍ଦ ଦେଖାଦେଇଛି। ମୁଖ୍ୟ ଅତିଥି ଭାବେ ଛେଣ୍ଡିପଦା ବିଧାୟକ ସୁଶାନ୍ତ କୁମାର ବେହେରା ଯୋଗଦେଇ ଆନୁଷ୍ଠାନିକ ଭାବେ ଏହି ପ୍ରକଳ୍ପର ଶିଳାନ୍ୟାସ କରିଥିଲେ। ଏହି କାର୍ଯ୍ୟକ୍ରମରେ ବାହାଳସାହି ଗ୍ରାମର ବହୁ ଚାଷୀ ଓ ମାନ୍ୟଗଣ୍ୟ ବ୍ୟକ୍ତି ଯୋଗଦେଇଥିଲେ।
ଚାଷୀମାନଙ୍କ କହିବା ଅନୁଯାୟୀ, ପ୍ରାୟ ୧୦୦ ବର୍ଷ ତଳେ ଅଞ୍ଚଳବାସୀଙ୍କ ତତ୍ତ୍ୱାବଧାନରେ ଘୁଡିଆନାଳି ଠାରେ ମାଟିରେ ବିରାଟ ବନ୍ଧ ପକାଯାଇ ଚାଷ ଜମିକୁ ଜଳସେଚନ ଆରମ୍ଭ କରାଯାଇଥିଲା। ଉକ୍ତ ମାଟି ବନ୍ଧକୁ ଅବିଭକ୍ତ ଛେଣ୍ଡିପଦା ପଞ୍ଚାୟତର ପ୍ରାକ୍ତନ ସରପଞ୍ଚ ଯୋଗୀ ଦେହୁରୀ ସିମେଣ୍ଟ ଦ୍ୱାରା ପୁନଃ ନିର୍ମାଣ କରିବା ପରେ ଏହାଦ୍ୱାରା ଚାଷୀ ଉପକୃତ ହୋଇଥିଲେ। ଏହି ପ୍ରକଳ୍ପରୁ ଦୀର୍ଘ ୧୨ କି.ମି.ରୁ ଊର୍ଦ୍ଧ୍ୱ କେନାଲ ନିର୍ମାଣ କରାଯାଇଥିବାରୁ ପ୍ରାୟ ୭୦୦ରୁ ଅଧିକ ହେକ୍ଟର ଚାଷ ଜମି ଜଳସେଚିତ ହେଉଥିଲା। ଏହି ପ୍ରକଳ୍ପରୁ ବାହାରିଥିବା କେନାଲ ଛେଣ୍ଡିପଦା, ବାହାଳସାହି, ଗୋଳାଗାଡିଆ, ଗୋହିରାପଶି, ମାଝି ସାହି, ଡାହିବର, ବଡବେରେଣା ଆଦି ଗ୍ରାମକୁ ଲମ୍ବିଛି। କିନ୍ତୁ ପ୍ରାୟ ୩୦ ବର୍ଷ ହେବ ଏହି ଜଳସେଚନ ପ୍ରକଳ୍ପ ବର୍ଷା ଜଳରେ କ୍ଷତିଗ୍ରସ୍ତ ହେବା ଫଳରେ ଏହା ଉପରେ ନିର୍ଭର କରୁଥିବା ଜମିରେ ଚାଷ କାର୍ଯ୍ୟ ଠପ୍ ହୋଇଯାଇଛି। କେନାଲ ଗୁଡିକରେ ଜଳ ପ୍ରବାହିତ ବନ୍ଦ ହୋଇଯିବାରୁ କେଉଁଠି କେନାଲ ପୋତି ହୋଇଗଲାଣିତ ଆଉ କେଉଁଠି ସତ୍ତା ହରାଇ ବସିଛି। ଏହାର ମରାମତି ନିମନ୍ତେ ଅଞ୍ଚଳବାସୀ ଦୀର୍ଘଦିନ ହେବ ବିଭାଗୀୟ କର୍ତ୍ତୃପକ୍ଷଙ୍କ ନିକଟରେ ଦାବି କରିଥିଲେ ମଧ୍ୟ କୌଣସି ଦୃଷ୍ଟି ଦିଆଯାଉ ନ ଥିବାରୁ ଚାଷୀମାନଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଥିଲା। ଏ ନେଇ ଗତ ଜୁନ ମାସରେ ‘ପୁନରୁଦ୍ଧାର ହେଲେ ଚାଷଜମିକୁ ମାଡନ୍ତା ପାଣି’ ଶୀର୍ଷକ ସ୍ବତନ୍ତ୍ର ଖବର ‘ଧରିତ୍ରୀ’ରେ ପ୍ରକାଶ ପାଇବା ପରେ ଏହା ପ୍ରଶାସନ ଓ ବିଧାୟକଙ୍କ ଦୃଷ୍ଟି ଆକର୍ଷଣ କରିଥିଲା। ଗ୍ରାମବାସୀ ମଧ୍ୟ ବିଧାୟକ ସୁଶାନ୍ତ କୁମାର ବେହେରାଙ୍କ ଦ୍ୱାରସ୍ଥ ହୋଇଥିଲେ। ବିଧାୟକ ଜିଲାପାଳଙ୍କୁ ନେଇ ଉକ୍ତ ସ୍ଥାନ ପରିଦର୍ଶନ କରିବା ସହିତ ଜଳସେଚନ ପ୍ରକଳ୍ପ କାର୍ଯ୍ୟକ୍ଷମ କରିବା ପାଇଁ ଅନୁରୋଧ କରିଥିଲେ। ଏବେ ପ୍ରକଳ୍ପ ପୁନରୁଦ୍ଧାରର ଶିଳାନ୍ୟାସ ହୋଇଥିବାରୁ ଚାଷୀମାନେ ଖୁସି ପ୍ରକଟ କରିଛନ୍ତି।
