ଶ୍ରୀନଗର,୨୨।୧୨: କଂଗ୍ରେସରୁ ଇସ୍ତଫା ପରେ ନୂତନ ଦଳ ଗଠନ କରିଥିବା ଗୁଲାମ ନବୀ ଆଜାଦ୍ ଗୁରୁବାର ୩ ନେତାଙ୍କୁ ଡେମୋକ୍ରାଟିକ୍ ଆଜାଦ୍ ପାର୍ଟିରୁ ବହିଷ୍କାର କରିଛନ୍ତି। ସେମାନେ ହେଲେ ତାରାଚାନ୍ଦ, ମନୋହର ଲାଲ ଶର୍ମା ଏବଂ ବଳୱାନ ସିଂ ଅଛନ୍ତି। ଏଥିମଧ୍ୟରୁ ତାରାଚାନ୍ଦ ଜମ୍ମୁ-କଶ୍ମୀରର ପୂର୍ବତନ ଉପମୁଖ୍ୟମନ୍ତ୍ରୀ ଥିବା ବେଳେ ମନୋହର ଲାଲ ଶର୍ମା ମନ୍ତ୍ରୀ ରହିଥିଲେ। ତେବେ ବହିଷ୍କାରର କାରଣ ଦଳ ପକ୍ଷରୁ ସୂଚନା ଦିଆଯାଇନାହିଁ। କିଛି ଦିନ ପୂର୍ବରୁ ଗୁଲାମ ନବୀ ଆଜାଦ୍ ଡେମୋକ୍ରାଟିକ୍ ଆଜାଦ୍ ପାର୍ଟି ନାମରେ ଦଳ ଗଠନ କରିଥିଲେ। ଦଳର ସମ୍ପ୍ରସାରଣ ବେଳେ ଆଜାଦ ତିନିଜଣ ପୂର୍ବତନ ମନ୍ତ୍ରୀ ତାରାଚାନ୍ଦ, ପିରଜାଦା ମହମ୍ମଦ ସୟିଦ ଏବଂ ଜିଏମ ସରୁରିଙ୍କୁ ଦଳର ଉପାଧ୍ୟକ୍ଷ ଭାବରେ ନିଯୁକ୍ତ କରିଥିଲେ। ଏଥିସହ ଗତ ଶନିବାର ସଲମାନ ନିଜାମୀଙ୍କୁ ଡିଏପିର ମୁଖପାତ୍ର ଦାୟିତ୍ୱ ଦିଆଯାଇଥିବା ଖବର ସାମ୍ନାକୁ ଆସିଥିଲା। ନିକଟରେ ଦଳ ୧୦ଟି ନୂତନ ମହାସଚିବ, ୧୨ଜଣ ସଚିବ, ୬ଜଣ ମୁଖପାତ୍ର ଏବଂ ୪ଟି ସୋସିଆଲ ମିଡିଆ ସଂଯୋଜକଙ୍କ ନାମ ଘୋଷଣା କରିଥିଲା। ଚଳିତ ବର୍ଷ ଅଗଷ୍ଟ ୨୬ରେ କଂଗ୍ରେସ ଛାଡିଥିବା ଆଜାଦ୍ ସେପ୍ଟେମ୍ବର ୨୬ରେ ଡେମୋକ୍ରାଟିକ୍ ଆଜାଦ୍ ପାର୍ଟି ଆରମ୍ଭ କରିଥିଲେ।
