ଲଣ୍ଡନ,୨୮।୬: ବ୍ରିଟେନର ପୂର୍ବତନ ସ୍ବାସ୍ଥ୍ୟମନ୍ତ୍ରୀ ମ୍ୟାଟ ହନ୍କକ୍ ବର୍ତ୍ତମାନ ଚର୍ଚ୍ଚାରେ ରହିଛନ୍ତି। ସହଯୋଗୀଙ୍କ ସହ ନିଜର ସମ୍ପର୍କକୁ ନେଇ ବେଶ୍ ଚର୍ଚ୍ଚାରେ ରହିଥିବା ମ୍ୟାଟ ଏବେ ବିବାହଦ ଘେରକୁ ଆସିଛନ୍ତି। ସିସିଟିଭିରେ ଚୁମ୍ବନ ଦେଉଥିବାର ଦୃଶ୍ୟ ଲୋକଲୋଚନକୁ ଆସିବା ପରେ ମ୍ୟାଟଙ୍କୁ ନିଜ ପଦ ହରାଇବାକୁ ପଡ଼ିଛି। ସୂଚନାଯୋଗ୍ୟ, ୪୩ ବର୍ଷୀୟ ଜିନା କୋଲାଡୋଙ୍ଗେଲୋ କୋଟି କୋଟି ସମ୍ପତ୍ତିର ମାଲିକାଣୀ ଥିବା ବେଳେ ସେ ଜଣେ ବ୍ୟବସାୟୀ ଓ ସ୍ବାସ୍ଥ୍ୟ ବିଭାଗର ପରାମର୍ଶଦାତା। ଏତଦ୍ ବ୍ୟତୀତ ସେ ଅଲିଭର ବେନାସ ନାମକ ଏକ କମ୍ପାନୀର କମ୍ୟୁନିକେଶନ ଡାଇରେକ୍ଟର ମଧ୍ୟ ଅଛନ୍ତି। ତେବେ ଜିନା ଓ ମ୍ୟାଟଙ୍କ ପ୍ରେମ କାହାଣୀ ବହୁ ପୁରୁଣା ହୋଇଥିବା ବେଳେ ଏବେ ଦୁହିଁଙ୍କ ବୈବାହିକ ଜୀବନ ମଧ୍ୟ ଭାଙ୍ଗିଯାଇଛି। ମେ’ ୬ରେ ଓ୍ବେଷ୍ଟମିନଷ୍ଟେରରେ ସ୍ଥାନୀୟ ନିର୍ବାଚନରେ ସମସ୍ତେ ବ୍ୟସ୍ତ ଥିବା ବେଳେ ମ୍ୟାଟ ଜିନାଙ୍କୁ ଚୁମ୍ବନ କରିଥିଲେ। ଏହି ସମୟର ଦୃଶ୍ୟ ସିସିଟିଭିରେ ଉତ୍ତୋଳନ ହୋଇଥିଲା। ସୋସିଆଲ ମିଡିଆରେ ଏହି ଦୃଶ୍ୟ ଭାଇରାଲ ହେବା ପରେ ଏହା ଲୋକଲୋଚନକୁ ଆସିଥିଲା। ଏହାପରେ ମ୍ୟାଟ ସ୍ବାସ୍ଥ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିଲେ। କାରଣ କରୋନା କାଳରେ ଲଗାତର ଭାବେ ଲୋକଙ୍କୁ ସାମାଜିକ ଦୂରତ୍ୱ ରକ୍ଷା କରିବା ଓ ମାସ୍କ ପରିଧାନକୁ ନେଇ ସଚେତନ କରୁଥିବା ସ୍ବାସ୍ଥ୍ୟ ସଚିବ ନିଜେ ହିଁ ନିୟମ ଉଲ୍ଲଂଘନ କରିଥିବା ଅଭିଯୋଗ ହୋଇଛି। ଯେଉଁଥିପାଇଁ ଲୋକମାନେ ତାଙ୍କୁ ସାମଲୋଚନା ମଧ୍ୟ କରିଛନ୍ତି।