ଗାଜିଆବାଦ୍,୧୫।୧୨: ଗାଜିଆବାଦର ମସୁରୀ ପୋଲିସ ଷ୍ଟେଶନ ଅଞ୍ଚଳରେ ଏକ ଅଭାବନୀୟ ଘଟଣା ଘଟିଛି। ଟ୍ରେନ୍ ଟ୍ରାକ୍ରେ ରିଲ୍ ପ୍ରସ୍ତୁତ କରୁଥିବାବେଳେ ୩ ଜଣଙ୍କ ଜୀବନ ଚାଲିଯାଇଛି। ଏଥିରେ ଜଣେ ମହିଳା ଏବଂ ଦୁଇଜଣ ପୁରୁଷ ସାମିଲ ଅଛନ୍ତି। ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ପୋଷ୍ଟମର୍ଟମ ପାଇଁ ପଠାଇଛି।
ପୋଲିସ ସୂଚନା ଅନୁଯାୟୀ, ବୁଧବାର ରାତିରେ ଏହି ତିନିଜଣ ଭିଡିଓ ପ୍ରସ୍ତୁତ କରୁଥିବାବେଳେ ଗାଜିଆବାଦରୁ ଲକ୍ଷ୍ନୌ ଅଭିମୁଖେ ଯାଉଥିବା ପଦ୍ମାବତ ଏକ୍ସପ୍ରେସ ଟ୍ରେନ ସେମାନଙ୍କୁ ଧକ୍କା ଦେଇଥିଲା। ପଦ୍ମାବତ ଏକ୍ସପ୍ରେସର ଲୋକୋ ପାଇଲଟ ଦାସନା ରେଳ ଷ୍ଟେଶନକୁ ଏହି ସୂଚନା ଦେଇଛନ୍ତି। ମୃତକ ମାନେ ହେଲେ ଶକିଲ (୩୨), ନଦିମ(୨୩) ଏବଂ ଜେନାବ (୨୦)।
ଉଭୟ ଶକିଲ ଏବଂ ନଦିମ ବନ୍ଧୁ ଏବଂ ସେମାନେ ଟ୍ରକ ଡ୍ରାଇଭର ଥିଲେ। ନଦିମ ୬ ମାସ ପୂର୍ବେ ଜେନାବଙ୍କୁ ପ୍ରେମ ବିବାହ କରିଥିଲେ।
