ଭୋପାଳ,୬।୧୨: ମଧ୍ୟପ୍ରଦେଶର ବଡଓ୍ବାନି ଜିଲାରେ ଏଭଳି ଏକ ଶିଶୁକନ୍ୟା ଜନ୍ମ ହୋଇଛି ଯାହାର ହାତ ନାହିଁ। ଶିଶୁଟି ସୁସ୍ଥ ଥିବା ବେଳେ ତାଙ୍କର ଓଜନ ୨ କିଲୋ ୯୦୦ଗ୍ରାମ୍ ରହିଛି। ବଂଶାନୁକ୍ରମ କିମ୍ବା ପ୍ରସବ ସମୟରେ ସଂକ୍ରମଣ ଯୋଗୁ ଏଭଳି ହୋଇଥାଇପାରେ ବୋଲି କୁହାଯାଉଛି। ଏଭଳି ମାମଲା ଲକ୍ଷରେ ଗୋଟିଏ ବୋଲି ଡାକ୍ତର ସୁନୀଲ ସୋଲାଙ୍କି କହିଛନ୍ତି। ଅନ୍ୟପଟେ ଉକ୍ତ ଶିଶୁଟି ଜନ୍ମ ହେବା ପରେ ପରିବାର ଲୋକେ ଖୁସି ଅଛନ୍ତି। ଭଗବାନ ଯାହା ଦେଇଛନ୍ତି, ସେଥିରେ ଆମେ ଖୁସି। ଘରକୁ ମା’ ଲକ୍ଷ୍ମୀ ଆସିଛନ୍ତି ବୋଲି ଶିଶୁଟିର ବାପା ନିତେଶ କହିଛନ୍ତି। ସୂଚନାଯୋଗ୍ୟ, ଡିସେମ୍ବର ୧ରେ ପଲସୁଦ ନିକଟ ଉପଲା ସ୍ବାସ୍ଥ୍ୟ କେନ୍ଦ୍ରରେ ନିତେଶଙ୍କ ସ୍ତ୍ରୀ ଏକ ଶିଶୁକନ୍ୟାଙ୍କୁ ଜନ୍ମ ଦେଇଥିଲେ। ଜନ୍ମ ହେବା ପରେ ଶିଶୁଟିର ହାତ ନ ଥିବା ଜଣାପଡ଼ିଥିଲା। ଏହି ଖବର ପ୍ରଚାରିତ ହେବା ପରେ ସ୍ଥାନୀୟ ଅଞ୍ଚଳରେ ଏହା ଚର୍ଚ୍ଚାର ବିଷୟ ପାଲଟିଛି। ଉକ୍ତ ଶିଶୁକୁ ଦେଖିବା ପାଇଁ ଘରେ ଲୋକଙ୍କ ଭିଡ ଜମୁଛି ବୋଲି ନିତେଶ କହିଛନ୍ତି।
