ଲହୁଣୀପଡ଼ା/ବଣାଁଇ,୧୩।୧୦(ସ୍ବ.ପ୍ର.): ସୁନ୍ଦରଗଡ଼ ଜିଲା ଲହୁଣୀପଡ଼ା ଥାନା ଅଧୀନ ରଜାମୁଣ୍ଡା ପଞ୍ଚାୟତ ୧୪୩ ନମ୍ବର ଜାତୀୟ ରାଜପଥର ନରେନ୍ଦ୍ର ପୋଲ ଉପରୁ ବ୍ରହ୍ମଣୀ ନଦୀକୁ ଡେଇଁ ଜନୈକା ନାବାଳିକା ଆତ୍ମହତ୍ୟା ଉଦ୍ୟମ କରିଛନ୍ତି। ଅଗ୍ନିଶମ କର୍ମଚାରୀ ଗୁରୁତର ଅବସ୍ଥାରେ ନାବାଳିକାଙ୍କୁ ଉଦ୍ଧାର କରି ବଣାଇଁ ଡାକ୍ତରଖାନାରେ ଭର୍ତ୍ତି କରିଛନ୍ତି।
ଗୁରୁବାର ଅପରାହ୍ନରେ ନରେନ୍ଦ୍ର ପୋଲ ଉପରେ ନାବାଳିକା ପହଞ୍ଚି ଥିଲେ। ଆଧାର କାର୍ଡ, ମୋବାଇଲ ଫୋନ ପୋଲ ଉପରେ ରଖି ତଳକୁ ଡେଇଁ ପଡିଥିଲେ। ତେବେ ନାବାଳିକା ଜଣକ ଡେଇଁବା ସମୟରେ ସ୍କୁଲ ବ୍ୟାଗ କାନ୍ଧରେ ଥିବାରୁ ଅଳ୍ପକେ ରକ୍ଷା ପାଇଯାଇଛନ୍ତି। କେତେଜଣ ଲୋକ ତାଙ୍କୁ ପାଣିରୁ ଉଦ୍ଧାର କରିବା ପାଇଁ ଚେଷ୍ଟା କରି ଥିଲେ। ହେଲେ ବିଫଳ ହେବାପରେ ଅଗ୍ନିଶମ ବିଭାଗକୁ ଖବର ଦେଇଥିଲେ। ଖବରପାଇ ଅଗ୍ନିଶମ କର୍ମଚାରୀ ଓ ପୋଲିସ ଘଟଣାସ୍ଥଳରେ ପହଞ୍ଚି ନାବାଳିକାଙ୍କୁ ଉଦ୍ଧାର କରିଥିଲେ। ଆତ୍ମହତ୍ୟା ଉଦ୍ୟମ କରିଥିବା ନାବାଳିକା ଜଣକ ଲହୁଣୀପଡ଼ା ଥାନା ଅଞ୍ଚଳର ବୋଲି ସୂଚନା ମିଳିଛି। ଆତ୍ମହତ୍ୟା ଉଦ୍ୟମର କାରଣ ନେଇ ଉଭୟ ଲହୁଣୀପଡ଼ା ଓ ବଣାଇ ପୋଲିସ ତଦନ୍ତ ଜାରି ରଖିଛି।
