ଗୋରଖପୁର,୧୮।୪: ଉତ୍ତରପ୍ରଦେଶର ଗୋରଖପୁର ଜିଲାରେ କରୋନା ରୋଗୀଙ୍କ ସଂଖ୍ୟା କ୍ରମାଗତ ଭାବେ ବୃଦ୍ଧି ପାଉଛି। ଏହି କାରଣରୁ, ଏଠାରେ ମୃତକଙ୍କ ସଂଖ୍ୟା ମଧ୍ୟ ଦ୍ରୁତ ଗତିରେ ବୃଦ୍ଧି ପାଉଛି। ଏଥି ସହିତ କୋଭିଡ ଡାକ୍ତରଖାନାରେ ଭର୍ତ୍ତି ହୋଇଥିବା ସଂକ୍ରମିତ ଲୋକଙ୍କ ପରିବାରଙ୍କର ନିଜର ଅସହାୟତା ବଖାଣିଛନ୍ତି। ଡାକ୍ତରଖାନାରେ ରୋଗୀଙ୍କ ପରିବାର ଲୋକଙ୍କଠାରୁ ହଜାର ହଜାର ଟଙ୍କା ନେବା ସତ୍ତ୍ୱେ ସେମାନଙ୍କ କଥା ଶୁଣିବାକୁ କେହି ନାହାଁନ୍ତି। ସେମାନେ ଡାକ୍ତରଙ୍କ ପ୍ରତ୍ୟେକ ଚାହିଦା ପୂରଣ କରୁଛନ୍ତି କିନ୍ତୁ ତଥାପି ସେମାନେ ପ୍ରତିବଦଳରେ ହତାଶ ହେଉଛନ୍ତି। ସହରର କ୍ୟାଣ୍ଟ୍ଟ ଅଞ୍ଚଳରେ ଏକ ହସ୍ପିଟାଲ ବାହାରେ ଜଣେ ଯୁବତୀ କାନ୍ଦୁଥିବା ଦେଖିବାକୁ ମିଳିଥିଲା। ତାଙ୍କ ବାପା କରୋନା ଆକ୍ରାନ୍ତ ହୋଇ ଏପ୍ରିଲ ୯ରୁ ହସ୍ପିଟାଲରେ ଚିକିତ୍ସିତ ହେଉଛି। ତାଙ୍କ ମା’ କରୋନା ସଂକ୍ରମିତ ହୋଇ ଘରେ ଆଇସୋଲେସନରେ ଅଛନ୍ତି। ୧୨୦୦ ଟଙ୍କା ମୂଲ୍ୟର ଏକ ପିପିଇ କିଟ କିଣି ଯୁବତୀ ଜଣଙ୍କ ହସ୍ପିଟାଲ ଝଟକା ବାଟରେ ୨ ମିନିଟ ପାଇଁ ନିଜ ବାପାଙ୍କୁ ଦେଖିପାରୁଛି। ଭଗବାନ କାହାକୁ କରୋନା ପରି ମାରାତ୍ମକ ରୋଗ ଦିଅନ୍ତୁ ନାହିଁ, ଏତିକି ପ୍ରାର୍ଥନା କରୁଛି ବୋଲି ସମ୍ପୃକ୍ତ ଯୁବତୀ କହିଛନ୍ତି। ସୂଚନାଯୋଗ୍ୟ, ଗୋରଖପୁର ଜିଲାରେ ମୋଟ ସଂକ୍ରମିତ ସଂଖ୍ୟା ଅଛି ୨୭୯୬୩। ଏଥିମଧ୍ୟରୁ ୨୨,୨୬୪ ସଂକ୍ରମିତ ବ୍ୟକ୍ତି ସୁସ୍ଥ ହୋଇଯାଇଛନ୍ତି। ସଂକ୍ରମିତଙ୍କ ମଧ୍ୟରେ ଏପର୍ଯ୍ୟନ୍ତ ୩୮୦ ଜଣଙ୍କର ମୃତ୍ୟୁ ହୋଇଛି। ଜିଲାର ସକ୍ରିୟ ରୋଗୀଙ୍କ ସଂଖ୍ୟା ୫୩୨୧କୁ ବୃଦ୍ଧି ପାଇଛି।