ଝିଅକୁ ବାହା କରୁଥିବା ବାପା ନିଜ ଖୁସିରେ ଝିଅକୁ ଟଙ୍କାଠୁ ଆରମ୍ଭ କରି ଗାଡି ପର୍ଯ୍ୟନ୍ତ କେତେକଣ ଉପହାରସ୍ବରୂପ ଭେଟି ଦିଅନ୍ତି। ସମାଜ ଏହାକୁ ଯୌତୁକ ବି କହେ। ତେବେ କେବେ ଶୁଣିଛନ୍ତି କୌଣସି ବାପା ଝିଅକୁ ବାହାଘରେ ଯୌତୁକ ସ୍ବରୂପ ବିଷଧରସାପ ଦେବା କଥା? ସେପୁଣି ୨୧ଟି ସାପ। ମଧ୍ୟପ୍ରଦେଶରେ ଏକ ସ୍ବତନ୍ତ୍ର ଜନଜାତିରେ ଏଭଳି ଚଳଣି ରହିଛି। ଉକ୍ତ ଜନଜାତିର ନାମ ହେଉଛି ନ୍ତଗୌରୀୟା’। ଏହି ସମୁଦାୟରେ କନିଆଘର ବରକୁ ୨୧ଟି ବିଷଧର ସାପ ଯୌତୁକଭାବେ ପ୍ରଦାନ କରିଥାନ୍ତି।ଏହି ଜନଜାତିରେ ଉକ୍ତ ପରମ୍ପରା କାହିଁ କେଉଁକାଳରୁ ଚାଲି ଆସୁଛି। ଯଦି ଝିଅ ବାପା ସାପ ଦେଇ ନ ପାରନ୍ତି, ତେବେ ବାହାଘର ଭାଙ୍ଗିଯାଏ। ତେଣୁ ବାହାଘର ଠିକ ହେବା ପରଠାରୁ ଝିଅର ବାପା ବିଷଧର ସାପ ଖୋଜି ଖୋଜି ଧରିବା ଆରମ୍ଭ କରିଦିଅନ୍ତି। ତେବେ ଏଭଳି କରିବା ପଛର କାରଣ ହେଉଛି ଯେ, ଏହି ସମୁଦାୟର ଲୋକଙ୍କ ମୁଖ୍ୟ ପେସା ହେଉଛି ସାପ ଧରିବା। ଆଉ ସାପକୁ ସେମାନେ ଲୋକଙ୍କୁ ଦେଖାଇ ଟଙ୍କା ରୋଜଗାର କରନ୍ତି। ଏହି ଜନଜାତିର ପିଲାମାନେ ବି ବିଷଧର ସାପ ସହ ଖେଳୁଥିବା ଦେଖିବାକୁ ମିଳନ୍ତି। ଏମାନଙ୍କ ଜୀବନରେ ସାପର ମହତ୍ତ୍ୱ ବହୁତ। ଘରର ସଦସ୍ୟ ଭଳି ଦେଖନ୍ତି ସାପକୁ। ସେଇଥିପାଇଁ ତ ସାପ ଯଦି ମରିଯାଏ ସମସ୍ତେ ମୁଣ୍ଡନ ହେବା ସହ ଭୋଜିଭାତ ବି କରନ୍ତି।
