ଫରିଦାବାଦ: କାମ କରୁଥିବା କମ୍ପାନୀର ମାଲିକ ରାଗିଲେ ବୋଲି ଆତ୍ମହତ୍ୟା କରିବାକୁ ଷ୍ଟେଶନର ଏକ ବାଲକୋନୀରେ ଚଢ଼ିଗଲେ ଯୁବତୀ। ଏଠାକାର ସେକ୍ଟେର ୨୮ ମେଟ୍ରୋ ଷ୍ଟେଶନରେ ଜଣେ ଯୁବତୀଙ୍କ ଏଭଳି ଏକ ଅଭାବନୀୟ ଦେଖିବାକୁ ମିଳିଛି। ଏହାକୁ ନେଇ ଷ୍ଟେଶନ ତଳେ ଲୋକଙ୍କ ଭିଡ ଜମିଥିଲା। ଲୋକମାନେ ଏହି ଘଟଣାର ଭିଡିଓ କରିଥିଲେ। ତେବେ ମେଟ୍ରୋର ସୁରକ୍ଷା ଦାୟିତ୍ୱରେ ନିୟୋଜିତ ସିଆଇଏସ୍ଏଫ୍ ଏବଂ ଫରିଦାବାଦ ପୋଲିସ ଝିଅକୁ ବୁଝାଇବା ପାଇଁ ଚେଷ୍ଟା କରିଥିଲେ। ହେଲେ ଯୁବତୀ କାହା କଥା ଶୁଣି ନ ଥିଲେ। ପରେ ପୋଲିସ ଏବଂ ସିଆଇଏସ୍ଏଫ୍ର ବୁଝାମଣା ଯୋଗୁ ଯୁବତୀଙ୍କୁ ଉଦ୍ଧାର କରାଯାଇଥିଲା।
ଯୁବତୀଜଣଙ୍କ ଦିଲ୍ଲୀର ନାଙ୍ଗଲୋଇରେ ରୁହନ୍ତି। ସେ ଫରିଦାବାଦରେ ଏକ ଏକ୍ସପୋର୍ଟ କମ୍ପାନୀରେ କାମ କରନ୍ତି। ଫ୍ୟାକ୍ଟ୍ରିରେ ଯାଞ୍ଚ ସମୟରେ ଏଖ ନମୁନା ଫେଲ୍ ହୋଇଯାଇଥିଲା। ଏଥିପାଇଁ ଯୁବତୀଙ୍କୁ ଗାଳି ଶୁଣିବାକୁ ପଡ଼ିଥିଲା। ଏହାକୁ ନେଇ ସେ ଟେନ୍ସନ ହୋଇଯାଇଥିଲେ। ସେ ରାଗିଯାଇ ଘରକୁ ଯିବା ପାଇଁ ମେଟ୍ରୋ ଷ୍ଟେଶନ ଆଡକୁ ଯାଇଥିଲେ। ସେଠାରେ ସେକ୍ଟର ୨୮ରେ ପହଞ୍ଚି ସିଧା ପ୍ଲାଟଫର୍ମର ଏକ ବାଲକୋନୀକୁ ଚଢ଼ି ସେଠାରୁ ଆତ୍ମହତ୍ୟା କରିବାକୁ ଚାହିଁଥିଲେ।
ଯୁବତୀ ବାଲକୋନୀରେ ଚଢ଼ିବା ମାତ୍ରେ ଷ୍ଟେଶନ ତଳେ ନିର୍ମିତ ରାଜପଥରେ ଯାଉଥିବା ଲୋକଙ୍କ ତାଙ୍କୁ ଦେଖିଥିଲେ। ଧିରେ ଧିରେ ଏହି ଖବର ଷ୍ଟେଶନରେ ଥିବା ସୁରକ୍ଷାକର୍ମୀଙ୍କ ନିକଟରେ ପହଞ୍ଚିଥିଲା। ଜଣେ ପୋଲିସ କର୍ମଚାରୀ କୌଣସି ପ୍ରକାରେ ବାଲକୋନୀକୁ ଯାଇ ଯୁବତୀଙ୍କୁ ଆତ୍ମହତ୍ୟା କରିବାରୁ ରକ୍ଷା କରିଥିଲେ। ସେ ତାଙ୍କୁ ଟାଣି ଆଣିଥିଲେ। ପରେ କାରଖାନା ଅଧିକାରୀଙ୍କୁ ଡକାଯାଇ ପଚରାଉଚରା କରାଯାଇଥିଲା। ଏଥିସହ ଯୁବତୀଙ୍କୁ ମଧ୍ୟ ପଚରାଯାଇଥିଲା।
