ଉନ୍ନାଓ, ୩।୧୦: ଉତ୍ତର ପ୍ରଦେଶ ଉନ୍ନଓରୁ ଚକିତ କଲାଭଳି ଏକ ଘଟଣା ସାମ୍ନାକୁ ଆସିଛି। ଜଣେ ପ୍ରେମିକାଙ୍କ ଘରେ ପ୍ରେମିକଙ୍କ ମୃତଦେହ ମିଳିବା ଭଳି ସମ୍ବେଦନଶୀଳ ଘଟଣା ଘଟିଯାଇଛି। ଗଙ୍ଗାଘାଟ କୋତାବଳୀ ଅଞ୍ଚଳର ରାମସେବକ ନିଷାଦ ତାଙ୍କ ପରିବାର ସହ ରୁହନ୍ତି। ଶୁକ୍ରବାର ବିଳମ୍ବିତ ରାତିରେ ରାମସେବକ ପୋଲିସକୁ ଫୋନ କରି ଘରେ ଚୋର ପଶିଯାଇଥିବା ସୂଚନା ଦେଇଥିଲେ। ସୂଚନା ପାଇ ଗଙ୍ଗାଘାଟ ଥାନା ଅଧିକାରୀ ରାଜକୁମାର ସରୋଜ ଘଟଣାସ୍ଥଳରେ ପହଞ୍ଚିଥିଲେ। କିନ୍ତୁ ରାମସେବକଙ୍କ ଘରେ ପହଞ୍ଚିବା ପରେ ଦେଖିଲେ ଜଣେ ଯୁବକ ରକ୍ତ ଜୁଡୁବୁଡୁ ଅବସ୍ଥାରେ ପଡ଼ିଛି। ଏହାପରେ ତାକୁ ହସ୍ପିଟାଲକୁ ନିଆଯାଇଥିବାବେଳେ ସେଠାରେ ଡାକ୍ତର ଯୁବକକୁ ମୃତ ଘୋଷଣା କରିଥିଲେ।
ପୋଲିସ ତଦନ୍ତରୁ ଜାଣିବାକୁ ପାଇଥିଲା ଯେ, ମୃତ ଯୁବକଙ୍କ ଶବ ଯେଉଁଠାରୁ ମିଳିଥିଲା ସେଠାରୁ କିଛି ଦୂରରେ ତାଙ୍କ ଘର। ଏହି ଯୁବକ ଓ ରାମସେବକଙ୍କ ଝିଅ ମଧ୍ୟରେ ଦୀର୍ଘଦିନ ହେବ ଙ୍କ ପ୍ରେମ ସମ୍ପର୍କ ଥିଲା। ଯାହାକୁ ନେଇ ୨ ପରିବାର ମଧ୍ୟରେ ଅନେକଥର ବିବାଦ ସୃଷ୍ଟି ହୋଇଛି। ଏବେ ଯେଉଁଭଳି ସ୍ଥିତିରେ ଯୁବକଙ୍କ ମୃତଦେହ ରାମସେବକଙ୍କ ଘରୁ ମିଳିଛି ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଅପରପକ୍ଷରେ ଏହି ଘଟଣା ପରେ ରାମସେବକ ଓ ତାଙ୍କ ପରିବାର ଫେରାର୍ ହୋଇଯାଇଛନ୍ତି। ମୃତ ଯୁବକଙ୍କ ଭାଇ ସନ୍ଦୀପର କହିବା କଥା, ଶୁକ୍ରବାର ରାତିରେ ସେ ବିଲକୁ ଫସଲ ଜଗିବାକୁ ଯାଉଛି କହି ଯାଇଥିଲେ।