ନୂଆଦିଲ୍ଲୀ,୨୮।୭ : ପାଠପଢ଼ାରେ ଝିଅମାନେ ପୁଅଙ୍କ ତୁଳନାରେ ଆଗରେ ଅଛନ୍ତି। ସ୍କୁଲକୁ ଯିବା ଏବଂ ଅଧ୍ୟୟନ ଜାରି ରଖିବା ହାର ଝିଅମାନଙ୍କ କ୍ଷେତ୍ରରେ ଅଧିକ ରହିଛି। ତେବେ ଅଧିକ ସଂଖ୍ୟକ ପୁଅ ଅଧାରୁ ସ୍କୁଲ ଛାଡୁଛନ୍ତି। ସଂସଦରେ ଏକ ପ୍ରଶ୍ନର ଉତ୍ତରରେ କେନ୍ଦ୍ର ସରକାର ଦେଇଥିବା ତଥ୍ୟରୁ ଏହା ଜଣାପଡ଼ିଛି। ୨୦୨୦-୨୧ରେ, ମାଧ୍ୟମିକ ସ୍ତରରେ ଝିଇମାନଙ୍କର ଡ୍ରପ ଆଉଟ ହାର ୧୩.୭ ପ୍ରତିଶତ ଥିଲା। ଏପରିସ୍ଥଳେ ପୁଅମାନଙ୍କ କ୍ଷେତ୍ରରେ ଏହା ୧୪.୩ ପ୍ରତିଶତ ଥିଲା।
ତେବେ ପ୍ରାଥମିକ ସ୍ତରରେ ପୁଅମାନଙ୍କ ଡ୍ରପଆଉଟ ହାର ୧.୨୧ ଏବଂ ବାଳିକାଙ୍କ ହାର ପ୍ରାୟ ୧.୪ ପ୍ରତିଶତ ଥିଲା। ପ୍ରତ୍ୟେକ ରାଜ୍ୟରେ ପୁଅ ଏବଂ ଝିଅଙ୍କ ଡ୍ରପ ଆଉଟ ହାର ସମାନ ନାହିଁ।
ରାଜ୍ୟର ନିର୍ଦ୍ଦିଷ୍ଟ ପରିସ୍ଥିତି, ରାଜ୍ୟର ସାମାଜିକ ତଥା ଅଥନୈତିକ ଅବସ୍ଥାରେ ମହିଳାଙ୍କ ଭୂମିକା, ଏହି ଯୋଜନାଗୁଡିକର ପ୍ରଭାବ ଡ୍ରପ ଆଉଟ ଉପରେ ପଡିଥାଏ। ୨୦୧୯-୨୦ ବର୍ଷରେ ମଧ୍ୟ କମ ସଂଖ୍ୟକ ଝିଅମାନେ ପୁଅମାନଙ୍କ ତୁଳନାରେ ଅଧାରୁ ସ୍କୁଲ ଛାଡିଥିଲେ।
ବିଶେଷଜ୍ଞମାନେ କହିଛନ୍ତି ଯେ ପୂର୍ବ ତୁଳନାରେ ଝିଅମାନଙ୍କର ଡ୍ରପଆଉଟ ହାର ଯଥେଷ୍ଟ ହ୍ରାସ ପାଇଛି। ଏହାର ମୁଖ୍ୟ କାରଣ ହେଉଛି ବିଦ୍ୟାଳୟରେ ଝିଅମାନଙ୍କ ପାଇଁ ଅଲଗା ଶୌଚାଳୟ ନିର୍ମାଣ । ଏହା ଏକ ବିରାଟ ସାମାଜିକ ପ୍ରଭାବ, ଯାହାକୁ ସଠିକ ଭାବରେ ବୁଝିବା ଆବଶ୍ୟକ। ଶୌଚାଳୟ ଅଭାବରୁ ଅଭିଭାବକମାନେ ଝ ଇମାନଙ୍କୁ ବିଦ୍ୟାଳୟକୁ ପଠାଇବାକୁ ମଧ୍ୟ ନାରାଜ ଥିଲେ।
ଦ୍ୱିତୀୟ ମୁଖ୍ୟ କାରଣ ହେଉଛି ବିଦ୍ୟାଳୟରେ ଶିକ୍ଷୟିତ୍ରୀଙ୍କ ସଂଖ୍ୟା ବୃଦ୍ଧି। ଏହାଦ୍ୱାରା ଗ୍ରାମାଞ୍ଚଳରେ ଝିଅମାନଙ୍କର ସ୍କୁଲ ଯିବାକୁ ଦ୍ୱିଧା କମିଛି।
ତୃତୀୟ କାରଣ ହେଉଛି ଅନେକ ସ୍ଥାନରେ ସରକାର ଝିଅମାନଙ୍କୁ ସାଇକେଲ ଯୋଗାଇ ବା ଏବଂ ଅନ୍ୟାନ୍ୟ ଉପାୟରେ ବିଦ୍ୟାଳୟକୁ ଯିବାକୁ ଉତ୍ସାହିତ କରୁଛନ୍ତି।
ଚତୁର୍ଥ କାରଣ ହେଉଛି ବିଦ୍ୟାଳୟରେ ୟୁନିଫର୍ମ ଉପଲବ୍ଧତା ଏବଂ ପଞ୍ଚମଟି ହେଉଛି ଝିଅମାନଙ୍କୁ ଦିଆଯାଇଥିବା ଛାତ୍ରବୃତ୍ତି ଯୋଗୁ ଝିଅମାନେ ଅଧାରୁ ସ୍କୁଲ ଛାଡୁ ନାହାନ୍ତି।
ବିଶେଷଜ୍ଞମାନେ କହିଛନ୍ତି ଯେ ଏହା ବ୍ୟତୀତ ବାଳିକାମାନଙ୍କ ଶିକ୍ଷା ବିଷୟରେ ସଚେତନତା ମଧ୍ୟ ବୃଦ୍ଧି ହେବା ଏହାର ଅନ୍ୟ ତମ କାରଣ। ଏଥି ସହିତ କିଛି ରାଜ୍ୟର ବିଶେଷ ପ୍ରଦର୍ଶନ ଯୋଗୁଁ ଜାତୀୟ ସ୍ତରରେ ସ୍ଥିତିରେ ସୁଧାର ଆସିଛି।
ଏହାପୂର୍ବରୁ ଝିଅମାନଙ୍କର ଡ୍ରପଆଉଟ ପୁଅମାନଙ୍କ ତୁଳନାରେ ଅଧିକ ଥିଲା। ଏକ ସରକାରୀ ରିପୋର୍ଟ ଅନୁଯାୟୀ, ଉଚ୍ଚ ପ୍ରାଥମିକ ସ୍ତରରେ ୨୦୧୪-୧୫ ବର୍ଷରେ ଝିଅମାନଙ୍କ ମଧ୍ୟରେ ଡ୍ରପ ଆଉଟ ହାର ୪.୬୦ ଏବଂ ପୁଅଙ୍କର ୩.୪୯ ପ୍ରତିଶତ ଥିଲା। ରିପୋର୍ଟ ଅନୁଯାୟୀ, ୨୦୧୪-୧୫ ରେ, ଉଚ୍ଚ ପ୍ରାଥମିକ ସ୍ତରରେ ପୁଅମାନଙ୍କର ଡ୍ରପ ଆଉଟ ହାର ୮.୪୮ ଏବଂ ଝିଅମାନଙ୍କର ୮.୭୧ ପ୍ରତିଶତ ଥିଲା।