ମହାକାଳପଡ଼ା,୧୧ା୨(ଡି.ଏନ.ଏ.): ପରିବାର ପ୍ରତିପୋଷଣ ପାଇଁ କୁନି ଝିଅଟିଏ ନିଜ ଜୀବନକୁ ବାଜି ଲଗାଇ ଲୋକଙ୍କୁ ବିଭିନ୍ନ କ୍ରୀଡ଼ା କୌଶଳ ପ୍ରଦର୍ଶନ କରୁଥିବା ଦେଖିବାକୁ ମିଳିଛି କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଅଞ୍ଚଳରେ। ସୁଦୂର ଛତିଶଗଡ଼ ଅଞ୍ଚଳରୁ ଏକ ଯାଦବ ସମ୍ପ୍ରଦାୟର ପରିବାର ଓଡ଼ିଶାର ଗଁାକୁ ଗଁା ବୁଲି ବାଉଁଶରାଣୀ କ୍ରୀଡ଼ା କୌଶଳ ପ୍ରଦର୍ଶନ କରୁଛନ୍ତି। ଏହି ଯାଦବ ସମ୍ପ୍ରଦାୟର କୁନି ଝିଅ ଅନ୍ତରା ଯାଦବ (୧୦) ନିଜ ପରିବାର ସହିତ ଶୀତ ଋତୁରେ ବ୍ଲକ ଅଞ୍ଚଳରେ ବୁଲି ସଙ୍ଗୀତର ତାଳେ ତାଳେ ଝୁମି ବଉଁଶରାଣୀ ଖେଳ ଦେଖାଉଛନ୍ତି। ଦୁଇପାର୍ଶ୍ୱର ବାଉଁଶରେ ବନ୍ଧା ଯାଇଥିବା ପ୍ଲାଷ୍ଟିକ ରଶି ଉପରେ ଖାଲି ପାଦରେ ଚାଲିବା, ଗାଡ଼ି ରିମ୍ ଉପରେ ଚାଲିବା, ଥାଳି ଉପରେ ଚାଲିବା ସହିତ ମୁଣ୍ଡରେ କଳସ ରଖି ଭାରସାମ୍ୟ ରକ୍ଷା କରି ବିଭିନ୍ନ ପ୍ରକାର କ୍ରୀଡ଼ା ପ୍ରଦର୍ଶନ କରି ଲୋକଙ୍କ ମନ ମୋହୁଛନ୍ତି। ସେହିପରି ଅଙ୍କିତାଙ୍କ ମା’ ପ୍ରିୟଙ୍କାଙ୍କ କହିବା କଥା ଛୋଟ ବେଳୁ ମୁଁ ଏହି ବାଉଁଶ ରାଣୀ ଖେଳ ପ୍ରଦର୍ଶନ କରୁଥିଲି। ମୁଁ ଏହି ଖେଳ ମୋ ଝିଅ ଅନ୍ତରାକୁ ତାଲିମ ଦେଇଛି। ଏବେ କରୋନା ମହାମାରୀ ପାଇଁ ବିଦ୍ୟାଳୟ ବନ୍ଦ ଥିବାରୁ ଆମେ ଓଡ଼ିଶାର ଗଁା ଗଣ୍ଡାରେ ବୁଲି ଖେଳ ପ୍ରଦର୍ଶନ କରୁଛୁ। ଏହି ଖେଳକୁ ଦେଖି ଯିଏ ଯାହା ସାହାଯ୍ୟ କରୁଛନ୍ତି ଆମେ ଖୁସିରେ ଗ୍ରହଣ କରୁଛୁ। ମଧ୍ୟାହ୍ନରେ ଖେଳ ପ୍ରଦର୍ଶନ ସରିଲେ ଉକ୍ତ ଗ୍ରାମରୁ ମାଗି ଯାଚି ଖାଇ ଥାଉ। ରାତି ହେଲେ ଗଁା ବିଦ୍ୟାଳୟ ବାରଣ୍ଡା କିମ୍ବା ବାତ୍ୟା ଆଶ୍ରୟସ୍ଥଳରେ ଆଶ୍ରୟ ନେଇ ଥାଉ। ଆମ ସମ୍ପ୍ରଦାୟର ଏହି ଖେଳକୁ ପିଢ଼ି ପରେ ପିଢ଼ି ବେଉସା କରି ଆପଣେଇ ନେଇଛୁ। ଏତେ ଛୋଟ ବୟସରେ ବିପଦପୂର୍ଣ୍ଣ ଖେଳକୁ ଅଭ୍ୟାସ ଯୋଗୁ ସମ୍ଭବ ହୋଇପାରିଛି। ଦର୍ଶକଙ୍କ ତାଳି ଓ ଭଲ ପାଇବା ଆଗ୍ରହ ଦେଖି ଖେଳ ପ୍ରତି ମନୋବଳ ବୃଦ୍ଧି ପାଉଛି। ୩ ବର୍ଷ ଧରି ଓଡ଼ିଶା ମାଟିରେ ଖେଳ ପ୍ରଦର୍ଶନ କରିବା ପରେ ଓଡ଼ିଆ ଭାଷା ପ୍ରତି ଆକୃଷ୍ଟ କହି ପାରୁଛୁ। ଆମର ଏହି ଖେଳକୁ ଓଡ଼ିଶାବାସୀ ଖୁବ୍ ପ୍ରଶଂସା କରୁଛନ୍ତି ବୋଲି ପ୍ରିୟଙ୍କା କହିଛନ୍ତି।