ଭଞ୍ଜନଗର,୧୯।୧୨(ଡି.ଏନ.ଏ.): କରୋନାର ସଫଳ ମୁକାବିଲା କରିବାରେ ରାଜ୍ୟ ସରକାର ସଫଳ ହୋଇଛନ୍ତି। କରୋନା ଆକ୍ରାନ୍ତଙ୍କ ସଂଖ୍ୟା ଦିନକୁ ଦିନ କମୁଛି। ଆଗାମୀ ଦିନରେ ଓଡ଼ିଶା କରୋନା ମୁକ୍ତ ହେବ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କରୋନାର ଭୟାବହତା ସମ୍ପର୍କରେ ଆମେରିକାରେ ରହୁଥିବା ତାଙ୍କ ଭଉଣୀ ଗୀତା ମେହେଟ୍ଟାଙ୍କଠାରୁ ଜାଣିବାକୁ ପାଇଥିଲେ। ମେହେଟ୍ଟାଙ୍କ ପରାମର୍ଶ ଅନୁଯାୟୀ ମୁଖ୍ୟମନ୍ତ୍ରୀ ରାଜ୍ୟରେ କରୋନା ମୁକାବିଲା ପାଇଁ ପଦକ୍ଷେପ ନେଇଥିବା ଜଙ୍ଗଲ ଓ ପରିବେଶ ଏବଂ ସଂସଦୀୟ ବ୍ୟାପାର ମନ୍ତ୍ରୀ ବିକ୍ରମ କେଶରୀ ଆରୁଖ କହିଛନ୍ତି। ଭଞ୍ଜନଗର ବ୍ଲକ ଦଦରାଲୁଣ୍ଡାଠାରେ ଶୁକ୍ରବାର ଆୟୋଜିତ ସ୍ବଚ୍ଛତା ଓ ପରିବେଶ ସଚେତନତା ସଭାରେ ମନ୍ତ୍ରୀ ଆରୁଖ ଏହି କଥା କହିଛନ୍ତି। କନ୍ଧମାଳ ଏମ୍ପି ଅଚ୍ୟୁତ ସାମନ୍ତ ସମ୍ମାନିତ ଅତିଥି ଭାବେ ସଭାରେ ଯୋଗଦେଇ, ସ୍ବଚ୍ଛତା ରଖିଲେ ହିଁ ସ୍ବାସ୍ଥ୍ୟ କ୍ଷେତ୍ରରେ ସୁରକ୍ଷିତ ରହିପାରିବା ବୋଲି କହିଥିଲେ। ରାଜ୍ୟର ସମସ୍ତ ଜିଲାରେ କିସ୍ର ଶାଖା ଖୋଲାଯିବ। ଗଞ୍ଜାମ ଜିଲାରେ ମଧ୍ୟ ଶାଖା ଖୋଲାଯିବ, ଏନେଇ ଜମି ଅଧିଗ୍ରହଣ ସରିଛି ବୋଲି ସେ କହିଥିଲେ।
ମନ୍ତ୍ରୀ ଆରୁଖ ଶୁକ୍ରବାର ଭଞ୍ଜନଗର ବ୍ଲକରେ ବିଭିନ୍ନ ଉନ୍ନୟନମୂଳକ ପ୍ରକଳ୍ପ ଉଦ୍ଘାଟନ କରିଥିଲେ। ଜଙ୍ଗଲ ଓ ପରିବେଶ ବିଭାଗ ପକ୍ଷରୁ ସ୍ବଚ୍ଛତା ଓ ପରିବେଶ ସଚେତନତା ରଥକୁ ମନ୍ତ୍ରୀ ଆରୁଖ ଓ ଏମ୍ପି ସାମନ୍ତ ଦୁର୍ଗାପ୍ରସାଦଠାରେ ପତାକା ଦେଖାଇ ଶୁଭାରମ୍ଭ କରିଥିଲେ। ଏହାପରେ ଦୁର୍ଗାପ୍ରସାଦ ଗ୍ରାମରେ ସଫେଇ କାର୍ଯ୍ୟକ୍ରମରେ ଯୋଗଦେବା ସହ ଅଙ୍ଗନୱାଡ଼ି କେନ୍ଦ୍ର, ଦଦରାଲୁଣ୍ଡା ପ୍ରାଥମିକ ବିଦ୍ୟାଳୟରେ ଚାରାରୋପଣ, ଅଙ୍ଗନୱାଡ଼ି କେନ୍ଦ୍ରର ନୂତନ କୋଠାକୁ ମନ୍ତ୍ରୀ ଉଦ୍ଘାଟନ କରିଥିଲେ।