ବାରିପଦା ଅଫିସ, ୩ା୭- ମୟୂରଭଞ୍ଜ ଜିଲା ଶୁକୃଳି ବ୍ଲକ ଅଧୀନ ବାରିଆ ଗ୍ରାମରେ ଲଗାଯାଇଥିତ୍ବା ଏକ ପୋଷ୍ଟରକୁ ଶୁକ୍ରବାର ରରୁଆଁ ପୋଲିସ ଜବତ କରିଛି। ମାଓବାଦୀ ଏହି ପୋଷ୍ଟର ଲେଖିଥିବା ସନ୍ଦେହ କରି ଗ୍ରାମବାସୀ ଭୟଭୀତ ହୋଇପଡ଼ିଛନ୍ତି। ୨ ଦିନ ହେଲା ଲଗାଯାଇଥିବା ଏହି ପୋଷ୍ଟର ସମ୍ପର୍କରେ ପୋଲିସ ତଦନ୍ତ ଜାରି ରଖିଛି।
ସୂଚନା ଅନୁଯାୟୀ, ଗ୍ରାମ ମଝିରେ ଜଣଙ୍କ କାନ୍ଥରେ ଏକ ଧଳା କାଗଜରେ ନାଲି ଅକ୍ଷରରେ ଲେଖା ହୋଇଥିବା ପୋଷ୍ଟରଟି ଲଗାଯାଇଥିବା ଲୋକେ ଦେଖିବାକୁ ପାଇଥିଲେ। ଏହି ପୋଷ୍ଟରରେ ‘ଆମର ଲକ୍ଷ୍ୟ ଏବଂ ଆମର କାମ ହିଁ ଭଗବାନ। ଆମେମାନେ ଯାହା କହୁ ତାହା ହିଁ କରିଥାଉ। ଆମେ ବାରିଆ ଗ୍ରାମରେ ପୁରାପୁରି ଭାବରେ ପ୍ରବେଶ କରିସାରିଛୁ। ଆମ୍ଭେ ଗ୍ରାମବାସୀଙ୍କୁ ଅନୁରୋଧ କରୁଛି କି ସେମାନେ ଗ୍ରାମ ଖାଲି କରି ଦିଅନ୍ତୁ , ନ ହେଲେ ଆମ ସର୍ତ୍ତରେ ରାଜି ହୁଅନ୍ତୁ। ଆମର ସର୍ତ୍ତ ହେଉଛି ଆମକୁ ୨ଜୁଲାଇ ସୁଦ୍ଧା ୧୦ ଲକ୍ଷ ଟଙ୍କା ଦିଆଯାଉ। ନ ହେଲେ ୧୦୦ କୁଇଣ୍ଟାଲ ଚାଉଳ ଦିଆଯାଉ। ଆମ କଥାକୁ ମଜାକ ନେଇକି ଭୁଲ କରି ବସିବେ ନାହିଁ, ଆମ କଥାକୁ ଗୁରୁତ୍ୱ ଦେବେ ଏବଂ ୨ ଦିନ ଭିତରେ ଆମେ ଏମିତି କିଛି କାମ କରି ଧମାଲ କରିବୁ ଯେ, ଆପଣମାନଙ୍କ ବିଶ୍ୱାସ ହୋଇଯିବ ଯେ ଆମେ ଏଇ ଗାଁରେ ପ୍ରବେଶ କରିଛୁ। ଜୟ ମାଓବାଦୀ’ ବୋଲି ଏହି ପୋଷ୍ଟରରେ ଲେଖାଯାଇଛି। ପୋଷ୍ଟରରେ ଲେଖାଯାଇଥିବା ନିର୍ଦ୍ଧାରିତ ତାରିଖ ଚାଲିଯାଇଥିବାରୁ ଗ୍ରାମବାସୀ ବର୍ତ୍ତମାନ ଭୟଭୀତ ଅବସ୍ଥାରେ ଅଛନ୍ତି। ଏନେଇ ରରୁଆଁ ଥାନା ଅଧିକାରୀ ଦିବ୍ୟକ୍ରାନ୍ତି ଲାକ୍ରାଙ୍କୁ ପଚାରିବାରୁ ପୋଷ୍ଟରକୁ ଆମେ ଜବତ କରିବା ପରେ ଏ ଦିଗରେ ତଦନ୍ତ ଜାରି ରଖିଛୁ। ହେଲେ ଉକ୍ତ ଗ୍ରାମରେ ମାଓବାଦୀ ପଶିଥିବାର କିଛି ପ୍ରମାଣ ମିଳିନାହିଁ। କେହି ବୋଧେ ମଜାକରେ ଏହିଭଳି ଲେଖିଦେଇ ଥାଇପାରେ। ତଥାପି ଆମେ ଏଥିପ୍ରତି ଗୁରୁତ୍ୱ ଦେଇ ତଦନ୍ତ ଜାରି ରଖିଛୁ ବୋଲି କହିଛନ୍ତି।