ନୂଆଦିଲ୍ଲୀ, ୯।୨ : କରୋନା ମହାମାରୀର ଚିକିତ୍ସା ପାଇଁ ଅନ୍ୟ ଏକ ଔଷଧ ନାଜାଲ ସ୍ପ୍ରେ ଆକାରରେ ପହଞ୍ଚିଛି। ଗ୍ଲେନମାର୍କ ଫାର୍ମାସ୍ୟୁଟିକାଲ୍ସ ଏକ ନାଇଟ୍ରିକ ଅକ୍ସାଇଡ ଆଧାରିତ ନାଜାଲ ସ୍ପ୍ରେ ‘ଫାବି ସ୍ପ୍ରେ’ କାନାଡାର ଏକ କମ୍ପାନୀ ସାନୋଟାଇଜ ସହିତ ମିଳିତ ଭାବେ ପ୍ରସ୍ତୁତ କରିଛି। ନିକଟରେ ଭାରତର ଔଷଧ ନିୟାମକ(ଡିସିଜିଆଇ) ଏହାକୁ ଅନୁମୋଦନ କରିଥିଲେ।
ବୁଧବାର ଗ୍ଲେନମାର୍କ ଘୋଷଣା କରିଛି ଯେ ଏହା ‘ଫାବି ସ୍ପ୍ରେ’ ବ୍ରାଣ୍ଡ ନାମରେ ଭାରତରେ ଏହି ନାଜାଲ ସ୍ପ୍ରେର ବଜାର ପ୍ରବେଶ କରିଛି। ଏହା ଦ୍ୱାରା ଏଣିକି କରୋନା ଆକ୍ରାନ୍ତଙ୍କ ଚିକିତ୍ସା ଅଧିକ ସହଜ ହୋଇପାରିବ।
ଗ୍ଲେନମାର୍କ ଫାର୍ମାର ମୁଖ୍ୟ ବାଣିଜି୍ୟକ ଅଧିକାରୀ ରବର୍ଟ କ୍ରୋକାର୍ଟ ଏକ ବିବୃତ୍ତିରେ କହିଛନ୍ତି ଯେ କରୋନା ବିରୋଧରେ ଭାରତରେ ଜାରି ରହିଥିବା ଲଢ଼େଇରେ ଆମେ ଏକ ଗୁରୁତ୍ୱପୂର୍ଣ୍ଣ ଅଂଶୀଦାର ପାଲଟିଛୁ। ସାନୋଟାଇଜ ସହ ମିଳିତ ଭାବେ ଏକ ନାଇଟ୍ରିକ ଅକ୍ସାଇଡ ଆଧାରିତ ନାଜାଲ ସ୍ପ୍ରେର ଅନୁମୋଦନ ଏବଂ ଏହାର ବଜାର ପ୍ରବେଶ ନେଇ ଆମେ ବେଶ୍ ଆନନ୍ଦିତ। କୋଭିଡ -୧୯ର ଚିକିତ୍ସା ପାଇଁ ଏହା ଅନ୍ୟ ଏକ ନିରାପଦ ଏବଂ ପ୍ରଭାବଶାଳୀ ଆଣ୍ଟି-ଭାଇରାଲ ଔଷଧ ସାବ୍ୟସ୍ତ ହେବ। ଏହା ଆକ୍ରାନ୍ତଙ୍କୁ ଠିକ ସମୟରେ ଏବଂ ଆବଶ୍ୟକ ଚିକିତ୍ସା ଯୋଗାଇବାକୁ ସକ୍ଷମ ହେବ।
ଏହି ନାଇଟ୍ରିକ ଅକ୍ସାଇଡ ଆଧାରିତ ନାଜାଲ ସ୍ପ୍ରେ ନାକର ଉପର ଭାଗରେ ଥିବା କୋଭିଡ -୧୯ ଭୂତାଣୁକୁ ପ୍ରଭାବଶାଳୀ ଢ଼ଙ୍ଗରେ ନଷ୍ଟ କରିବା କାର୍ଯ୍ୟ କରିବ। ପରୀକ୍ଷଣ ସମୟରେ, ଏହା କରୋନା ଭୂତାଣୁୁ ଏବଂ ଔଷଧର ଆଣ୍ଟି-ମାଇକ୍ରୋବାୟଲ ଗୁଣକୁ ଦୂର କରିବାକୁ ପ୍ରମାଣିତ କରିଛି। ଯେତେବେଳେ ଏହି ସ୍ପ୍ରେ ନାଜାଲ ମ୍ୟୁକସ ଉପରେ ସ୍ପ୍ରେ କରାଯାଏ, ଏହା ଶରୀରରେ ଭୂତାଣୁ ସଂକ୍ରମଣକୁ ରୋକିବାକୁ ସକ୍ଷମ ହୋଇଥାଏ। ଏହା ସଂକ୍ରମଣ ରୋକିବା କ୍ଷେତ୍ରରେ ଏକ ଶାରୀରିକ ଏବଂ ରାସାୟନିକ ପ୍ରତିବନ୍ଧକ ସୃଷ୍ଟି କରେ। ଫଳରେ ସଂକ୍ରମଣ ଫୁସଫୁସକୁ ବ୍ୟାପିବାରେ ବାଧା ସୃଷ୍ଟି ହୋଇଥାଏ।