ପାରାଦୀପ,୨୫।୬ (ଶରତ ରାଉତ) ବିଶ୍ୱର ୯୦ ପ୍ରତିଶତ ପଣ୍ୟ ଏବେ ଜଳପଥରେ ପରିବହନ ହେଉଛି। ଏହା ସମୁଦାୟ ଅର୍ଥନୀତିର ୮୦ ଭାଗ। ଏହି କାରବାରରେ ନାବିକମାନଙ୍କ ପ୍ରମୁଖ ଭୂମିକା ରହିଛି। ଜଳପଥରେ ପଣ୍ୟବାହୀ ଜାହାଜରେ ଯେଉଁ ନାବିକମାନେ ଅତଳ ସମୁଦ୍ରରେ ନିଜ ଜୀବନକୁ ବାଜି ଲଗାଇ କାମ କରୁଛନ୍ତି ସେମାନଙ୍କ ଉଦ୍ଦେଶ୍ୟରେ ସମଗ୍ର ବିଶ୍ୱରେ ଜୁନ ୨୫ରେ ବିଶ୍ୱ ନାବିକ ଦିବସ ପାଳିତ ହେଉଛି। ଏହିକ୍ରମରେ ରବିବାର ପାରାଦୀପ ବନ୍ଦର ସମେତ ଦେଶର ସମସ୍ତ ବୃହତ୍ ବନ୍ଦର ମଧ୍ୟରେ ପାଳନ ହେଉଛି ନାବିକ ଦିବସ। ୨୦୧୦ରେ ଫିଲିପାଇନ୍ସଠାରେ ଏହି ଦିବସ ପ୍ରଥମେ ପାଳନ କରାଯାଇଥିଲା। ପରବର୍ଷ ୨୦୧୧ରେ ଏହି ଦିବସକୁ ବିଶ୍ୱ ନୌବାଣିଜ୍ୟ ସଙ୍ଗଠନ (ଆଇଏମ୍ଓ, ଇଣ୍ଟରନ୍ୟାଶନାଲ ମେରିଟାଇମ ଅର୍ଗାନାଇଜେଶନ) ମାନ୍ୟତା ଦେବା ପରେ ଏହାକୁ ସବୁ ଦେଶର ବନ୍ଦର ଅଞ୍ଚଳରେ ପାଳନ କରାଯାଉଛି।
ଏହି ଦିବସ ସମ୍ପର୍କରେ ସେମାନେ କୁହନ୍ତି
ବିଶ୍ୱ ଏବେ ଗୋଟିଏ ପରିବାର ହୋଇଗଲାଣି। ପ୍ରତି ଦେଶ ଦେଶ ମଧ୍ୟରେ ବାଣିଜ୍ୟ କାରବାର ହେଉଛି। ଏହି କାରବାରର ପ୍ରମୁଖ ସାଧନ ହେଲା ପଣ୍ୟବାହୀ ଜାହାଜ। ଏଥିରେ ଯାତାୟାତ ସୁଗମ ଏବଂ ଶସ୍ତା ହୋଇଥାଏ। ଏହି କାରବାରରେ ଜଡ଼ିତ ପ୍ରମୁଖ ବିନ୍ଧାଣି ହେଲେ ନାବିକ। ସେମାନେ ଜଳପଥରେ ପ୍ରାକୃତିକ ଝଡ଼ ତୋଫାନକୁ ସାମ୍ନା କରି ଧାର୍ଯ୍ୟ ସ୍ଥାନରେ ଜାହାଜ ପହଞ୍ଚାଇଥାନ୍ତି। ନାବିକମାନଙ୍କ ପାଖରେ ଚିତ୍ତବିନୋଦନ ପାଇଁ କୌଣସି ସାଧନ ନ ଥାଏ। ଘର ପରିବାରଠାରୁ ସେମାନେ ମାସାଧିକ ସମୟ ଦୂରେଇ ରହିଥାନ୍ତି। ସେମାନଙ୍କ ସମ୍ମାନାର୍ଥେ ଗୋଟିଏ ଦିନ ଆଇଏମ୍ଓ ଧାର୍ଯ୍ୟ କରିଛନ୍ତି। ଏହା ନିଶ୍ଚୟ ଭଲ ପଦକ୍ଷେପ। ପାରାଦୀପ ବନ୍ଦର ମଧ୍ୟ ସି ମ୍ୟାନ୍ (ନାବିକ)ଙ୍କ ପାଇଁ ଏକ କ୍ଲବ ହାଉସ କରିଛି।
-ଅତୁଲ୍ୟ ମହାପାତ୍ର, ପାରାଦୀପ ବନ୍ଦର ପୂର୍ବତନ ଉପସଂରକ୍ଷକ କ୍ୟାପଟେନ
ଏହି ଦିବସ ଆରମ୍ଭ ହେବାପରେ ନାବିକମାନଙ୍କ ପାଇଁ କେତୋଟି ସୁଧାର ଅଣାଯାଇଛି। ପୂର୍ବରୁ ଥରେ ଜାହାଜରେ ପ୍ରବେଶ କଲେ ସେମାନଙ୍କୁ ୧୦ ମାସ ରହିବାକୁ ପଡ଼ୁଥିଲା। ଏବେ ପ୍ରତି ୬ ମାସରେ ଥରେ ବିଶ୍ରାମ ମିଳୁଛି। ଯେଉଁମାନେ ମାନସିକ ଭାବେ ଦୃଢ ସେମାନେ ଏହି ବୃତ୍ତିକୁ ଆପଣେଇଥାନ୍ତି। ସମୁଦ୍ର ମଧ୍ୟରେ ସବୁବେଳେ ଝଡ଼, ବାତ୍ୟାର ଭୟ ଥାଏ। କିନ୍ତୁ ନାବିକମାନେ ଏହାକୁ କିପରି ସାମ୍ନା କରିବେ ସେ ବିଷୟରେ ଜାଣିଥାନ୍ତି। ପ୍ରତି ବୃହତ୍ ଜାହାଜରେ ପ୍ରାୟତଃ ୨୦ରୁ ୨୫ ଜଣ ନାବିକ (କ୍ରିୟୁ)ରହିଥାନ୍ତି। ସେମାନଙ୍କ ପଦବୀ ଯଥାକ୍ରମେ କ୍ୟାପଟେନ, ସେକେଣ୍ଡ ଅଫିସର, ଇଞ୍ଜିନିୟର, ଗ୍ୟାଙ୍ଗ ମ୍ୟାନ ଆଦି ରହିଥାଏ। ଜଣେ ନାବିକ ଜାହାଜରେ ଚଢ଼ିବା ପୂର୍ବରୁ ମାନସିକ, ଶାରୀରିକ ଭାବେ ଫିଟ୍ନେସ ଥିବା ଦରକାର। ଏବେ ଏହି ଡାକ୍ତରୀ ପରୀକ୍ଷା ଅପରିହାର୍ଯ୍ୟ ହୋଇପଡ଼ିଛି।
-ପ୍ରେମାନନ୍ଦ ରାଉତ, ବରିଷ୍ଠ କ୍ୟାପ୍ଟେନ
ଏକଦା ଓଡ଼ିଶାର ନୌବାଣିଜ୍ୟ ପରମ୍ପରା ବିଶ୍ୱବିଦିତ ଥିଲା। ଏବେ ତାହା ଆଉ ନାହିଁ କହିଲେ ଚଳେ। ପଣ୍ୟବାହୀ ଜାହାଜରେ ଯେତେ ନାବିକ ଅଛନ୍ତି ସେଥିରେ ଭାରତୀୟ ସଂଖ୍ୟା ନଗଣ୍ୟ ବୋଲି ଜଣାପଡିଛି। ନାବିକଙ୍କ ପାଇଁ ବିଶ୍ୱର ଅର୍ଥନୀତି ସୁଦୃଢ଼ ହୋଇପାରିଛି। ସେମାନଙ୍କ ପାଇଁ ଗୋଟିଏ ଦିନ ସେଲିବ୍ରେଶନ କରିବା ଦରକାର।
-ବିଭୂଷିତା ଦାଶ,ନାବିକା