କଟକ ଅଫିସ,୨୭।୧୧: ରାଜ୍ୟର ସ୍ବାସ୍ଥ୍ୟସେବାକୁ ଅନ୍ୟ ରାଜ୍ୟ ତୁଳନାରେ ଅଧିକ ସୁଦୃଢ଼ କରାଯାଇଛି। ଏଥିପାଇଁ ରାଜ୍ୟରେ ଆରମ୍ଭ କରାଯାଇଥିବା ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାରେ ଲୋକଙ୍କୁ ସାମିଲ କରାଯାଉଛି। ଏଥିସହ ମୋର ସ୍ବପ୍ନ ଯେ, କୌଣସି ବ୍ୟକ୍ତି ସ୍ବାସ୍ଥ୍ୟସେବା କ୍ଷେତ୍ରରେ ଯେପରି ଅନ୍ୟ ରାଜ୍ୟକୁ ଯିବାକୁ ନ ପଡ଼େ, ସେଥିଲାଗି କଟକରେ ଥିବା ବଡ଼ ମେଡିକାଲକୁ ବିଶ୍ୱସ୍ତରୀୟ କରାଯାଉଛି ବୋଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭର୍ଚୁଆଲରେ ଶ୍ରୀରାମଚନ୍ଦ୍ର ଭଞ୍ଜ ଭେଷଜ(ଏସ୍ସିବି) ମହାବିଦ୍ୟାଳୟରେ ଆୟୋଜିତ ଏକ କନକ୍ଲେଭରେ ଯୋଗଦେଇ କହିଛନ୍ତି।
ବର୍ଷର ଗୌରବମୟ ଗାଥାକୁ ସ୍ମରଣ କରି କଟକ ବଡ଼ ମେଡିକାଲ କଲେଜ ତାହାର ପ୍ଲାଟିନମ ଜୁବିଲି ପାଳନ କରୁଛି। ଏହି ଅବସରରେ ଶୁକ୍ରବାର କଲେଜ ପକ୍ଷରୁ ଏକ ଗ୍ଲୋବାଲ କନକ୍ଲେଭ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। କନକ୍ଲେଭରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଜଡ଼ିତ ହୋଇ କାର୍ଯ୍ୟକ୍ରମର ଉଦ୍ଘାଟନ କରି ଏସ୍ସିବି ମେଡିକାଲ କଲେଜର ପ୍ରତିଷ୍ଠାତା ମହାରାଜା ଶ୍ରୀରାମ ଚନ୍ଦ୍ର ଭଞ୍ଜଙ୍କୁ କୃତଜ୍ଞତା ଜ୍ଞାପନ କରିବା ସହ କଲେଜର ଗୌରବ ଗାଥା ଦୋହରାଇଥିଲେ। ସେ କହିଥିଲେ, ଏସ୍ସିବିର ଛାତ୍ରୀଛାତ୍ର ଏବେ ସାରା ବିଶ୍ୱର ବିଭିନ୍ନ ମେଡିକାଲରେ ସେବା ଯୋଗାଇ ଏସ୍ସିବିକୁ ଗୌରବାନ୍ବିତ କରିଛନ୍ତି। ଏସ୍ସିବି ଆଲୁମନି ସାରା ବିଶ୍ୱରେ ନିଜର ନିଃସ୍ବାର୍ଥପର ସେବା ଯୋଗାଇ ଏକ ସ୍ବତନ୍ତ୍ର ପରିଚୟ ସୃଷ୍ଟି କରିଛନ୍ତି। ଏସ୍ସିବି ଡାକ୍ତରଗଣ ରାଜ୍ୟ ତଥା ରାଜ୍ୟ ବାହାର ଲୋକଙ୍କୁ ଉତ୍ତମ ସେବା ଯୋଗାଇ ଆସୁଛନ୍ତି। ସେଥିପାଇଁ ଏସ୍ସିବିକୁ ବିଶ୍ୱସ୍ତରୀୟ କରିବା ଦିଗରେ ଆମର ପ୍ରଚେଷ୍ଟା ଜାରି ରହିଛି। ମେଡିକାଲ କେୟାରରେ ଏସ୍ସିବି ଯେପରି ଦେଶରେ ଏକ ନମ୍ବର ହୋଇପାରିବ ସେଥିପ୍ରତି ଆମେ ପ୍ରୟାସ ଜାରି ରଖିବା।
ଆହୁରି କହିଥିଲେ, ରାଜ୍ୟରେ ୫୦ ବର୍ଷ ପୂର୍ବରୁ ମାତ୍ର ୩ଟି ମେଡିକାଲ କଲେଜ ଥିବାବେଳେ ଏବେ ୮ଟି ରହିଛି। ଯାହା ସରକାରଙ୍କ ରାଜ୍ୟବାସୀଙ୍କୁ ଉତ୍ତମ ସ୍ବାସ୍ଥ୍ୟସେବା ଯୋଗାଇବାରେ କେତେ ପ୍ରୟାସ ରହିଛି ତାହା ସୂଚାଉଛି ବୋଲି ସେ କହିଥିଲେ। ଏହି ଅବସରରେ ମୁଖ୍ୟମନ୍ତ୍ରୀ ଏସ୍ସିବିର ଏକ ମେମେଣ୍ଟୋକୁ ଉଦ୍ଘାଟନ କରିବା ସହ ଏସ୍ସିବିର ସୋଭେନିରକୁ ଉନ୍ମୋଚନ କରିଥିଲେ। ମୁଖ୍ୟମନ୍ତ୍ରୀଙ୍କ ସହ ୫-ଟି ସଚିବ ଭି.କେ.ପାଣ୍ଡିଆନ ମଧ୍ୟ ଭର୍ଚୁଆଲରେ ଉପସ୍ଥିତ ଥିଲେ। ଉତ୍ସବରେ ଅନ୍ୟ ଅତିଥି ଭାବେ ସ୍ବାସ୍ଥ୍ୟମନ୍ତ୍ରୀ ନବ କିଶୋର ଦାସ ଯୋଗଦେଇ କହିଥିଲେ, ରାଜ୍ୟରେ ଜଣେ ବି ଯେପରି ସ୍ବାସ୍ଥ୍ୟସେବାରୁ ବଞ୍ଚିତ ନ ହେବେ, ଏହା ଆମର ପ୍ରୟାସ। ତେବେ ରାଜ୍ୟବାସୀଙ୍କୁ ଉତ୍ତମ ସ୍ବାସ୍ଥ୍ୟସେବା ଯୋଗାଇବା ପାଇଁ ମୁଖ୍ୟମନ୍ତ୍ରୀଙ୍କ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା ଏକ ଯୁଗାନ୍ତକାରୀ ପଦକ୍ଷେପ ବୋଲି କହିଥିଲେ। ଡା. ପ୍ରଫେସର ନିର୍ମଳ ଚନ୍ଦ୍ର ମହାପାତ୍ର ଧନ୍ୟବାଦ ଦେଇଥିଲେ। କାର୍ଯ୍ୟକ୍ରମରେ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର, ଓଡ଼ିଶା ସ୍କିଲ ଡେଭେଲପମେଣ୍ଟ ଅଧ୍ୟକ୍ଷ ସୁବ୍ରତ ବାଗ୍ଚୀ, ଚୈଦ୍ୱାର-କଟକ ବିଧାୟକ ସୌଭିକ ବିଶ୍ୱାଳ, ମନ୍ତ୍ରୀ ପ୍ରତାପ ଜେନା ଓ ପ୍ରିନ୍ସିପାଲ ସେକ୍ରେଟାରି ଅଶୋକ ମିଶ୍ରା ପ୍ରମୁଖ ଯୋଗଦେଇଥିଲେ।