ମହାକାଳପଡ଼ା,୨୭ା୪(ଡି.ଏନ୍.ଏ.): ଚଳିତ ମାସ ପ୍ରଥମ ସପ୍ତାହରେ ରାଜ୍ୟ ସରକାରଙ୍କ ଏକ ଉଚ୍ଚସ୍ତରୀୟ ପ୍ରତିନିଧି ଦଳଙ୍କ ସହିତ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଜାପାନ ଗସ୍ତ କରିଥିଲେ। ଏହି ଗସ୍ତ ସମୟରେ ଜାପାନର ସମୁଦ୍ର ପୋତାଯାଇ ନିପନ ଷ୍ଟିଲ କାରଖାନା ଦେଖି ଅଭିଭୂତ ହୋଇଥିଲେ ଏହି ପ୍ରତିନିଧି ଦଳ। ଓଡ଼ିଶାର କେନ୍ଦ୍ରାପଡ଼ା ଜିଲାରେ କିପରି ଏହି ବିଶ୍ୱସ୍ତରୀୟ ଇସ୍ପାତ ପ୍ରକଳ୍ପ ପ୍ରତିଷ୍ଠା ହେବ ସେନେଇ ରାଜ୍ୟ ସରକାର ଦମ୍ ଖଟାଇଛନ୍ତି। ଏହି ପରିପ୍ରେକ୍ଷୀରେ ୫- ଟି ସଚିବ ଭି କେ ପାଣ୍ଡିଆନ ଗୁରୁବାର ଅପରାହ୍ନରେ ଜିଲା ପ୍ରଶାସନ ସହଯୋଗରେ ମହାକାଳପଡ଼ା ବ୍ଲକ ଆଡୋଇସ୍ଥିତ ନବ ନିର୍ମିତ ଆଦର୍ଶ ବିଦ୍ୟାଳୟ ପରିସରରେ ପହଞ୍ଚିିଥିଲେ। ଏହି ଅଞ୍ଚଳରେ ପ୍ରସ୍ତାବିତ ଶିଳ୍ପ ପ୍ରତିଷ୍ଠା ପାଇଁ ଉପଯୁକ୍ତ ସ୍ଥାନ ନିରୂପଣ ତଥା ଭୌଗୌଳିକ ଅବସ୍ଥିତି ( ନକ୍ସା ) ଦେଖିଥିଲେ। ଘରୋଇ, ସରକାରୀ ଜମି ତଥ୍ୟ ସମ୍ପର୍କରେ ପ୍ରଶାସନ ସହିତ ଆଲୋଚନା କରିଥିଲେ। ୧୦୦ କୋଟି ଟଙ୍କାର ଜମ୍ବୁ-ମାର୍ଶାଘାଇ ମୁଖ୍ୟ ରାସ୍ତା ନିର୍ମାଣ ପାଇଁ ମଞ୍ଜୁରୀ ମିଳିଛି ବୋଲି କହିଥିଲେ। ଏହି ବ୍ଲକର ବତୀଘର, ଖରିନାସି ଓ ରାମନଗର ପଞ୍ଚାୟତର ୧୧ଟି ଗ୍ରାମର ଦୁଇଟି ପର୍ଯ୍ୟାୟରେ ୧୦ ହଜାର ଏକର ଜମିରେ ପ୍ରସ୍ତାବିତ ଇସ୍ପାତ ପ୍ରକଳ୍ପ ନିର୍ମାଣ ହେବ ବୋଲି ପ୍ରାଥମିକ ସର୍ଭେରୁ ତହସିଲ କାର୍ଯ୍ୟଳୟ ପକ୍ଷରୁ ସୂଚନା ମିଳିଛି।
ଏହି ପ୍ରସ୍ତାବିତ ପ୍ରକଳ୍ପ ଅଞ୍ଚଳକୁ ରାସ୍ତାଘାଟର ଗମନାଗମନ ଉପରେ ପର୍ଯ୍ୟବେସିତ ଆଲୋଚନା କରିଥିଲେ। ପରେ ସଚିବ ପ୍ରସିଦ୍ଧ ଶକ୍ତି ପୀଠ ମା’ ରାମଚଣ୍ଡୀ ମନ୍ଦିର ପରିଦର୍ଶନ କରିଥିଲେ। ସଚିବଙ୍କ ଏହି ଗସ୍ତ ସମୟରେ ଶିଳ୍ପ ସଚିବ ହେମନ୍ତ ଶର୍ମା, ପୂର୍ତ୍ତ ସଚିବ ବିକ୍ରମ ଯାଦବ , ମୁଖ୍ୟମନ୍ତ୍ରୀଙ୍କ ପ୍ରମୁଖ ସଚିବ ଭିନିଲ କ୍ରିଷ୍ଣା , କେନ୍ଦ୍ରାପଡ଼ା ଜିଲାପାଳ ଅମୃତ ଋତୁରାଜ, ଉପଜିଲାପାଳ ନିରଞ୍ଜନ ବେହେରା, ତହସିଲଦାର ମାନସ ରଞ୍ଜନ ତ୍ରିପାଠୀ , ବିଡିଓ ଦେବାଶିଷ ରାଉତଙ୍କ ସମେତ ବିଭିନ୍ନ ବିଭାଗର ବରିଷ୍ଠ ପ୍ରଶାସନିକ ଅଧିକାରୀ ଓ ଯନ୍ତ୍ରୀମାନେ ଉପସ୍ଥିତ ଥିଲେ।