ଓ୍ବିଲିଂଟନ, ୮।୬ : ନ୍ୟୁଜିଲାଣ୍ଡ ସରକାର ବୁଧବାର ଗୃହପାଳିତ ପ୍ରାଣୀ ପାଳନ କରୁଥିବା ମାଲିକମାନଙ୍କଠାରୁ କୃଷି ର୍ନିଗମନ ଉପରେ ଶୁଳ୍କ ଆଦାୟ ପାଇଁ ଏକ ଡ୍ରାଫ୍ଟ ଯୋଜନା ପ୍ରସ୍ତୁତ କରାଯାଇଛି। ଦେଶରେ ଏଭଳି ଚାଷୀଙ୍କ ସଂଖ୍ୟା ଅଧିକ ରହିଛି। ସେମାନେ ପ୍ରାୟତଃ ଗାଈଗୋରୁ, ମେଣ୍ଢା ଛେଳି ଆଦି ପାଳନ କରିଥାନ୍ତି। ନ୍ୟୁଜିଲାଣ୍ଡର ପରିବେଶ ମନ୍ତ୍ରଣାଳୟ କହିଛି ଯେ ଏହି ପ୍ରସ୍ତାବ ଦେଶକୁ ଏକ ପ୍ରମୁଖ କୃଷି ରପ୍ତାନିକାରୀ ଭାବେ ବିକଶିତ କରିବ।
ପୃଥିବୀର ପ୍ରଥମ ଦେଶ ଭାବେ ନ୍ୟୁଜିଲାଣ୍ଡରେ କୃଷକମାନେ ଗୃହପାଳିତ ପ୍ରାଣୀଙ୍କ ପାଇଁ ନିର୍ଗମନ ଶୁଳ୍କ ପ୍ରଦାନ କରିବେ। ୫୦ ଲକ୍ଷ ଜନସଂଖ୍ୟା ବିଶିଷ୍ଟ ନ୍ୟୁଜିଲାଣ୍ଡରେ ପ୍ରାୟ ୧କୋଟି ଗାଈ,ମଇଁଷି ଏବଂ ୨ କୋଟି ୬୦ ଲକ୍ଷ ନିୟୁତ ଛେଳି ମେଣ୍ଢା ଅଛନ୍ତି।
ନ୍ୟୁଜିଲାଣ୍ଡରେ ହେଉଥିବା ଗ୍ରୀନ ହାଉସ ଗ୍ୟାସ ନିର୍ଗମନର ପ୍ରାୟ ଅଧା କୃଷି କ୍ଷେତ୍ରରୁ ଆସିଥାଏ। ବିଶେଷତଃ ମିଥେନ ଗ୍ୟାସର ନିର୍ଗମନ ଗାଈଗୋରୁଙ୍କ ହାକୁଟିରୁ ଆସିଥାଏ। ତେଣୁ ଗ୍ଲୋବାଲ ୱାର୍ମିଂ ବନ୍ଦ କରିବାକୁ ଚେଷ୍ଟା କରିବା ପାଇଁ ନ୍ୟୁଜିଲାଣ୍ଡ ସରକାର କୃଷକମାନଙ୍କଠାରୁ ହାକୁଟି ଶୁଳ୍କ ସଂଗ୍ରହ କରିବାକୁ ନିଷ୍ପତ୍ତି ନେଇଛନ୍ତି।
ନ୍ୟୁଜିଲାଣ୍ଡ ସରକାର ଏବଂ କୃଷକ ପ୍ରତିନିଧୀଙ୍କ ସହମତିେରେ ହୋଇଥିବା ଡ୍ରାଫ୍ଟ ଯୋଜନା ଅନୁଯାୟୀ, କୃଷକମାନଙ୍କୁ ୨୦୨୫ ଠାରୁ ଗୃହପାଳିତ ପ୍ରାଣୀମାନଙ୍କଠାରୁ ହେଉଥିବା ଗ୍ୟାସ ନିର୍ଗମନ ପାଇଁ ଦେୟ ଦେବାକୁ ପଡିବ। ସ୍ବଳ୍ପ ମିଆଦି ଏବଂ ଦୀର୍ଘସ୍ଥାୟୀ କୃଷି ଗ୍ୟାସର ମୂଲ୍ୟ ଭିନ୍ନ ଭିନ୍ନ ହେବ। ଗ୍ୟାସର ମାତ୍ରା ମାପିବା ପାଇଁ ସମାନ ମାନଦଣ୍ଡ ବ୍ୟବହାର କରାଯିବ। ଏଥି ସହିତ ନ୍ୟୁଜିଲାଣ୍ଡର ଜଳବାୟୁ ପରିବର୍ତ୍ତନ ମନ୍ତ୍ରୀ ଜେମ୍ସ ଶୋ କହିଛନ୍ତି ଯେ ବାୟୁମଣ୍ଡଳରେ ଆମେ ମିଥେନର ପରିମାଣ ହ୍ରାସ କରିବା ଆବଶ୍ୟକ, ବରଂ କୃଷି ପାଇଁ ଏକ ପ୍ରଭାବଶାଳୀ ନିର୍ଗମନ ମୂଲ୍ୟ ପ୍ରଣାଳୀ ମାଧ୍ୟମରେ ଏହାକୁ ନିୟନ୍ତ୍ରଣ କରିବା ଜରୁରୀ।
ହାକୁଟି ହ୍ରାସ କରିବାକୁ ଯୋଜନା ଅନ୍ତର୍ଗତ ନ୍ୟୁଜିଲାଣ୍ଡ ସରକାରଙ୍କ ଦ୍ୱାରା ପ୍ରବର୍ତ୍ତିତ ପ୍ରସ୍ତାବରେ ସେହି କୃଷକମାନଙ୍କ ପାଇଁ ପ୍ରୋତ୍ସାହନ ବ୍ୟବସ୍ଥା କରାଯାଇଛି। ସେମାନଙ୍କ ପ୍ରାଣୀମାନଙ୍କ ପାଇଁ ଏକ ପ୍ରକାର ଖାଦ୍ୟର ବ୍ୟବସ୍ଥା କରିବେ ଯାହାଫଳରେ ସେମାନଙ୍କର କମ୍ ପରିମାଣର ହାକୁଟି ହେବ। ଏଥି ସହିତ, ଏହି ଯୋଜନାରୁ ହେଉଥିବା ରାଜସ୍ବ କୃଷକମାନଙ୍କ ଅନୁସନ୍ଧାନ, ବିକାଶ ଏବଂ ପରାମର୍ଶଦାତା ସେବାରେ ବିନିଯୋଗ କରାଯିବ।
କାର୍ବନ ଡାଇଅକ୍ସାଇଡ ଅପେକ୍ଷା ମିଥେନ୨୫ ଗୁଣ ଅଧିକ ବିପଜ୍ଜନକ। ଗାଈମାନଙ୍କ ହାକୁଟି ଯୋଗୁ ବହୁ ପରିମାଣର ମିଥେନ ନିର୍ଗତ ହୋଇଥାଏ।
ମିଳିତ ଜାତିସଂଘର ପରିବେଶ ସୁରକ୍ଷା ଏଜେନ୍ସି ଦ୍ୱାରା ପ୍ରକାଶିତ ଏକ ରିପୋର୍ଟ ଅନୁଯାୟୀ, ମିଥେନ ନିର୍ଗମନରେ ଉଲ୍ଲେଖନୀୟ ହ୍ରାସ ହେଲେ ଜଳବାୟୁ ପରିବର୍ତ୍ତନ ମଧ୍ୟ ମନ୍ଥର ହୋଇପାରେ। ଗୋଟିଏ ଗାଈ ପ୍ରତିଦିନ ୧୩୦ ଗ୍ୟାଲନ ମିଥେନ ଗ୍ୟାସ ବାୟୁମଣ୍ଡଳକୁ ଛାଡ଼ିଥାଏ। ସେଥିମଧ୍ୟରୁ ୯୫ ପ୍ରତିଶତ ମିଥେନ ନିର୍ଗମନ ସେମାନଙ୍କ ହାକୁଟିରୁ ଆସିଥାଏ। ଦୁନିଆରେ ପ୍ରାୟ ଶହେ କୋଟି ଗାଈ ଅଛନ୍ତି ବୋଲି ଏହି ରିପୋର୍ଟରେ ଉଲ୍ଲେଖ କରାଯାଇଛି।