ପଣଜି,୩।୫: ଗୋଆ ମୁଖ୍ୟମନ୍ତ୍ରୀ ପ୍ରମୋଦ ସାଓ୍ବନ୍ତ ଏକ ବିବାଦୀୟ ବୟାନ ଦେଇ ଆସିଛନ୍ତି ଚର୍ଚ୍ଚାକୁ। ସେ କହିଛନ୍ତି ଉତ୍ତର ପ୍ରଦେଶ ଓ ବିହାରର ୯୦ ପ୍ରତିଶତ ଶ୍ରମିକ ଗୋଆରେ ଅପରାଧ କରୁଛନ୍ତି। ତାଙ୍କର ଏହି ବୟାନକୁ ନେଇ ରାଜନୀତି ହୋଇଛି ସରଗରମ। ବିହାରର ଉପ ମୁଖ୍ୟମନ୍ତ୍ରୀ ତେଜସ୍ବୀ ଯାଦବ ମୁଖ୍ୟମନ୍ତ୍ରୀ ସାଓ୍ବନ୍ତଙ୍କ ବୟାନର ଜବାବ ଦେବାକୁ ଯାଇ କହିଛନ୍ତି, ଭାରତୀୟ ଜନତା ପାର୍ଟି(ଭାଜପା) ଓ ଏହାର ନେତାଙ୍କୁ ବିହାର ଓ ବିହାର ଲୋକଙ୍କ ପ୍ରତି ଏତେ ଘୃଣା ଭାବ କାହିଁକି।
ସୂଚନାଯୋଗ୍ୟ, ମେ’ ୧ ଶ୍ରମିକ ଦିବସ ଦିନ ପଣଜିରେ ପ୍ରମୋଦ ସାଓ୍ବନ୍ତ ଦାବି କରିଥିଲେ ଯେ ବାହାର ରାଜ୍ୟର ଶ୍ରମିକ ଗୋଆରେ ଅପରାଧ କରୁଛନ୍ତି ଓ ଫେରାର ହୋଇଯାଉଛନ୍ତି। ଯଦି ଆମେ ଅନୁମାନ ଲଗାଇବା ତେବେ ଗୋଆରେ ଅପରାଧ ଘଟାଉଥିବା ଲୋକଙ୍କ ମଧ୍ୟରୁ ୯୦ ପ୍ରତିଶତ ବାହାର ରାଜ୍ୟର ଉତ୍ତର ପ୍ରଦେଶ ଓ ବିହାରର ହୋଇଥାଆନ୍ତି। ସେଥିପାଇଁ ପରିଚୟ ପତ୍ର ଜରୁରୀ, ଯେଉଁଥିରେ ଅପରାଧିଙ୍କୁ ଚିହ୍ନଟ କରିବା ସହଜ ହେବ। ଗୋଆ ମୁଖ୍ୟମନ୍ତ୍ରୀଙ୍କ ଏହି ବୟାନକୁ ନେଇ ପ୍ରତିକ୍ରିୟା ରଖିଛନ୍ତି ତେଜସ୍ବୀ ଯାଦବ।
ତେଜସ୍ବୀ ଯାଦବ ଟୁଇଟ କରି ଲେଖିଛନ୍ତି, କେନ୍ଦ୍ର ମନ୍ତ୍ରୀ ପୁୟୁଷ ଗୋୟଲଙ୍କ ପରେ ଗୋଆ ମୁଖ୍ୟମନ୍ତ୍ରୀ ପ୍ରମୋଦ ସାଓ୍ବନ୍ତ ଏକ ଲଜ୍ୟା ଜନକ ବୟାନ ଦେଇ ବିହାର ଓ ବିହାରବାସୀଙ୍କ ଘୋର ଅପମାନ କରିଛନ୍ତି। ଭାଜପା ଓ ଭାଜପା ନେତାଙ୍କୁ ବିହାର ଓ ବିହାରବାସୀଙ୍କ ପ୍ରତି ଏତେ ଘୃଣା କାହିଁକି।