ନୂଆଦିଲ୍ଲୀ, ୧୭।୮(ପି.ଟି.)- ଇଣ୍ଡିଆନ ସୁପରଲିଗ୍(ଆଇଏସ୍ଏଲ୍)ର ସପ୍ତମ ସଂସ୍କରଣ ଗୋଆର ୩ଟି ଭେନ୍ୟୁରେ ଅନୁଷ୍ଠିତ ହେବ। କରୋନା ଭାଇରସ ଜନିତ ସ୍ବାସ୍ଥ୍ୟ ଓ ସୁରକ୍ଷାକୁ ଦୃଷ୍ଟିରେ ରଖାଯାଇ ଏହା ଆସନ୍ତା ନଭେମ୍ବରରେ ଆୟୋଜିତ ହେବା ସମ୍ଭାବନା ରହିଛି ବୋଲି ରବିବାର ଆୟୋଜକଙ୍କ ପକ୍ଷରୁ ପ୍ରକାଶ କରାଯାଇଛି। କରୋନା ମହାମାରୀ ଯୋଗୁ ଆଇଏସଏଲ ଆୟୋଜକମାନେ ଏଥର ପ୍ରତିଯୋଗିତାକୁ ଗୋଟିଏ ରାଜ୍ୟରେ ସୀମିତ ରଖିବାକୁ ନିଷ୍ପତ୍ତି ନେଇଛନ୍ତି। କେରଳ ପ୍ରତିଯୋଗିତା ଆୟୋଜନ ଦୌଡ଼ରେ ଥିଲେ ହେଁ ଶେଷରେ ଗୋଆକୁ ମନୋନୀତ କରାଯାଇଥିଲା। ଖେଳାଳି, ସପୋର୍ଟ ଷ୍ଟାଫ୍ ଏବଂ ଦର୍ଶକଙ୍କ ସୁରକ୍ଷାକୁ ଦୃଷ୍ଟିରେ ରଖି ଫୁଟବଲ ଡେଭଲପ୍ମେଣ୍ଟ ଲିମିଟେଡ(ଏଫ୍ଏସଡିଏଲ) ଏଥର ଆଇଏସଏଲକୁ ଗୋଆରେ ସୀମିତ ରଖିବାକୁ ନିଷ୍ପତ୍ତି ନିଆଯାଇଛି ବୋଲି ଏକ ବିବୃତିରେ ପ୍ରକାଶ କରାଯାଇଛି। ମାର୍ଗାଓ ଫତୋର୍ଦାର ଜବାହରଲାଲ ନେହେରୁ ଷ୍ଟାଡିୟମ, ଭାସ୍କୋ ଡା ଗାମାସ୍ଥିତ ତିଳକ ନଗର ଷ୍ଟାଡିୟମ ଏବଂ ବାମବୋଲିମ୍ସ୍ଥିତ ଜିଏମସି ଆଥଲେଟିକ୍ ଷ୍ଟାଡିୟମରେ ମ୍ୟାଚଗୁଡ଼ିକ ଖେଳାଯିବ। ଟ୍ରେନିଂ ସମୟରେ ସାମାଜିକ ଦୂରତ୍ୱ ପ୍ରୋଟୋକଲକୁ କଡ଼ାକଡ଼ି ପାଳନ କରାଯିବ। ଆଇ-ଲିଗ୍ ମ୍ୟାଚଗୁଡ଼ିକ କୋଲକାତାରେ ହେବ ବୋଲି ସର୍ବଭାରତୀୟ ଫୁଟବଲ ଫେଡେରେଶନ(ଏଆଇଏଫ୍ଏଫ୍) ଘୋଷଣା କରିବାର ଗୋଟିଏ ଦିନପରେ ଆଇଏସ୍ଏଲ୍ ସମ୍ପର୍କରେ ନିଷ୍ପତ୍ତି ନିଆଯାଇଛି। ଆଇଏସ୍ଏଲ୍ ଏବେ ଦେଶରେ ଶୀର୍ଷ ଫୁଟବଲ ଲିଗ୍ର ମାନ୍ୟତା ପାଉଛି। ଆଇ-ଲିଗ୍ ଦ୍ୱିତୀୟ ଶ୍ରେଣୀୟ ଘରୋଇ ପ୍ରତିଯୋଗିତା ବିବେଚିତ ହେଉଛି। ଆଇଏସ୍ଏଲ୍ ବିଜେତା ଏଏଫ୍ସି ଚାମ୍ପିୟନ୍ସ ଲିଗ୍ ପାଇଁ ଯୋଗ୍ୟତା ଅର୍ଜନ କରିବ। ଆଇ-ଲିଗ୍ ବିଜେତା ଦ୍ୱିତୀୟ ଟାୟାର ଏଏଫ୍ସି କପ୍ ପାଇଁ ଯୋଗ୍ୟ ବିବେଚିତ ହେବ।