ଅହମଦାବାଦ,୧୬।୫: ଚଳିତ ବର୍ଷ ଶେଷ ଭାଗରେ ଗୁଜରାଟ ବିଧାନସଭା ନିର୍ବାଚନ ଅନୁଷ୍ଠିତ ହେବାକୁ ଯାଉଥିବାବେଳେ ରାଜ୍ୟ ରାଜନୀତିରେ ପରିବର୍ତ୍ତନ ଆଣିବା ଲକ୍ଷ୍ୟରେ ଆମ୍ ଆଦ୍ମୀ ପାର୍ଟି ରବିବାର ‘ପରିବର୍ତ୍ତନ ଯାତ୍ରା’ ଆରମ୍ଭ କରିଛି। ଗୁଜରାଟର ୫ଟି ସ୍ଥାନରୁ ଏହି ଯାତ୍ରା ବାହାରିଥିବାବେଳେ ୧୦ ଲକ୍ଷ ଭୋଟର ଓ ନାଗରିକମାନଙ୍କ ସହ ଆଲୋଚନା କରିବା ଯୋଜନା ରହିଛି। ପରିବର୍ତ୍ତନ ଯାତ୍ରା ମାଧ୍ୟମରେ ରାଜ୍ୟର ୪ କୋଟି ଭୋଟରଙ୍କ ପାଖରେ ଏଏପି ଏହାର ବାର୍ତ୍ତା ପହଞ୍ଚାଇବ।
ଦ୍ୱାରକା ଏବଂ ସାଗର ରାବରିରୁ ଶୋଭାଯାତ୍ରାର ନେତୃତ୍ୱ ଇସୁଦନ ଗାଧଭି ଏବଂ ଇନ୍ଦ୍ରନୀଳ ରାଜଗୁରୁ ନେଇଥିବାବେଳେ ସିଦ୍ଧପୁରରୁ ବାହାରିଥିବା ଶୋଭାଯାତ୍ରାରେ ଭୀମ ଚୌଧରୀ ନେତୃତ୍ୱ ନେଇଥିଲେ। ସେହିପରି ଅବଦାସା-କଚ୍ଛରୁ ରାଜ କାର୍ପଦା ଏବଂ କୈଳାସ ଗାଧଭି ଓ ଦାଣ୍ଡିରୁ ମନୋଜ, ସୋରଥିଆ, ରାମ ଧଡୁକ ଏବଂ ରାକେଶ ହରିପରା ପରିବର୍ତ୍ତନ ଯାତ୍ରାର ନେତୃତ୍ୱ ନେଇଛନ୍ତି।
ଷଷ୍ଠ ଶୋଭାଯାତ୍ରା ଆଦିବାସୀ ଅଞ୍ଚଳ ଦେଇ ଯିବାକୁ ଥିବାବେଳେ ଏଥିରେ ଭାରତୀୟ ଟ୍ରାଇବାଲ ପାର୍ଟି ନେତା ମହେଶ ବାସବ ଏବଂ ଏଏପି ନେତା ଅର୍ଜୁନ ରାଠଓ୍ବା ନେତୃତ୍ୱ ନେବେ। ଦଳର ନେତା ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ବୁଧବାର ରାଜକୋଟଠାରେ ଏକ ରାଲିକୁ ସମ୍ବୋଧିତ କରି ବିଭିନ୍ନ ପ୍ରସଙ୍ଗ ଉପରେ କହିଥିଲେ। ଉକ୍ତ ବାର୍ତ୍ତାକୁ କୋଟି କୋଟି ଭୋଟରଙ୍କ ପାଖରେ ପହଞ୍ଚାଇବାକୁ ହେଲେ ବୃହତ୍ ଶ୍ରମଶକ୍ତିର ଆବଶ୍ୟକତା ଯାହା ବର୍ତ୍ତମାନ ଦଳ ନିକଟରେ ନାହିଁ ବୋଲି ବରିଷ୍ଠ ଖବରଦାତା ଜଗଦୀଶ ମେହେଟ୍ଟା କହିଛନ୍ତି।
