ଲେଫ୍ରିପଡା,୨୯।୪(ଡିଏନଏ): ସୁନ୍ଦରଗଡ ଜିଲା ଲେଫ୍ରିପଡା ଥାନା ଅନ୍ତର୍ଗତ ସୁରୁଗୁଡା ତାରିଣୀ ମନ୍ଦିର ନିକଟରେ ଗତ ୧୩ ତାରିଖରେ ଛେଳିବେପାରୀ ପ୍ରଭାତ ନାଏକଙ୍କୁ ଗୁଳି କରି ହତ୍ୟା କରାଯିବା ସହ ୯ଲକ୍ଷ ଟଙ୍କା ଲୁଟ୍ କରାଯାଇଥିଲା। ଏହି ଘଟଣାରେ ପୋଲିସ ମୁଖ୍ୟ ଅପରାଧୀ ସମେତ ୭ଜଣଙ୍କୁ ଶନିବାର ଗିରଫ କରିଛି।
ଗିରଫ ମୁଖ୍ୟ ଅଭିଯୁକ୍ତ ଝାଡ଼ଖଣ୍ଡ ଗୁମଲା ଅଞ୍ଚଳର ବୋଲି ସୁନ୍ଦରଗଡ ଏସ ପି ପ୍ରତ୍ୟୁଷ ଦିବାକର ସୂଚନା ଦେଇଛନ୍ତି। ଲେଫ୍ରିପଡା ଥାନା ପରିସରରେ ଶନିବାର ଆୟୋଜିତ ଏକ ଖବରଦାତା ସମ୍ମିଳନୀରେ ଏସ ପି ସୂଚନା ଦେଇ କହିଛନ୍ତି ଯେ, ଗିରଫ ଅପରାଧୀମାନେ ଝାଡ଼ଖଣ୍ଡ ଏବଂ ଓଡିଶାର ଅନେକ ଲୁଟ୍ ଓ ଅପରାଧିକ ଘଟଣାରେ ସଂପୃକ୍ତ ଅଛନ୍ତି। ହେଲେ ଗତ ୧୩ତାରିଖ ଛେଳିବେପାରୀଙ୍କ ହତ୍ୟା ଘଟଣାର ମାଷ୍ଟର ମାଇଣ୍ଡ କୁହାଯାଉଥିବା ଅରୁଣ ଓରାମ(୩୨)ଜଣେ ଭିନ୍ନକ୍ଷମ ବ୍ୟକ୍ତି। ମୁଖ୍ୟ ଅଭିଯୁକ୍ତ ଅରୁଣଙ୍କ ସମେତ ଅନ୍ୟ ଗିରଫ ଅଭିଯୁକ୍ତମାନେ ହେଲେ ସୁନ୍ଦରଗଡ ଜିଲା ଚାଉଁରଢାଲ ଗ୍ରାମର ସୁଧୀର କିଷାନ(୩୦), ବଡଗୁଢିଆଲି ଗ୍ରାମର ପ୍ରମୋଦ ମାଝି(୩୦) ସୁଜିତ୍ ମାଝି ଏବଂ ପ୍ରଦୀପ ସିଂ, ସପ୍ରଘାଟ ଗ୍ରାମର କେଶ୍ୱର ଗୋପେ(୩୦), ଶାଳଙ୍ଗବାହଲ ଗ୍ରାମର ମହାନ୍ତି ବୈଦିକ(୩୪)। ପୋଲିସ ଏହି ଡକାୟତଙ୍କ ନିକଟରୁ ୨ଟି ଦେଶୀ ରିଭଲଭର, ୬ଟି ଅଫୁଟା ଗୁଳି ସହ ଭୂଜାଲି ଓ ଅନ୍ୟାନ୍ୟ ମାରଣାସ୍ତ୍ର, ମୋବାଇଲ ଫୋନ , ୨ଟି ବାଇକ, ଲାଠି ଓ ନଗଦ ୬ହଜାର ଟଙ୍କା ଜବତ କରିଛି।