ରାଜସ୍ଥାନର ଉଦୟପୁରରୁ ଏକ ଅଜବ ଘଟଣା ସାମ୍ନାକୁ ଆସିଛି। ଯାହା ଉକ୍ତ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। ଯେଉଁ ସମସ୍ୟାର ସମାଧାନ ଗାଁ ସରପଞ୍ଚ ଏବଂ ପୋଲିସ କରି ପାରିଲେନି ସେତେବେଳେ ନିରୀହ ପଶୁଟି ନିଜକୁ ନ୍ୟାୟ ଦେଇ ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛି। ଜାଣନ୍ତୁ ପୂରା ଘଟଣା ସମ୍ପର୍କରେ…
ଉଦୟପୁରର ବଲ୍ଲଭନଗର ତହସିଲ ଖେରୋଡ଼ା ଥାନା ଅଞ୍ଚଳରେ ଏହି ଘଟଣା ଘଟିଛି। ଯେଉଁଠାରେ ଗୋଟିଏ ଛେଳିକୁ ଦୁଇଜଣ ମାଲିକ ମୋର କହି ଦାବି କରିଥିଲେ। ଏନେଇ ଥାନାରେ ମାମଲା ରୁଜୁ ହୋଇଥିଲା। ଏହା ଉପରେ ଖେରୋଡ଼ା ଥାନା ଅଧିକାରୀଙ୍କ ଟିମ୍ ଉଭୟ ମାଲିକଙ୍କୁ ଛେଳି ସହିତ ଉପସ୍ଥିତ ରହିବାକୁ କହିଥିଲେ। ଏହା ପରେ ଛେଳି ତାଙ୍କ ଛୁଆ ପାଖକୁ ଯାଇ କ୍ଷୀର ଦେଇ ଘଟଣା ସତ୍ୟ ଉନ୍ମୋଚନ କରିଥିଲା।
ଖେରୋଡା ଥାନା ଅନ୍ତର୍ଗତ ଧୋଲାକୋଟ ଗାଁର ବାସିନ୍ଦା ବାବରୁ ରାଓ୍ବତଙ୍କ ଛେଳି ଜଙ୍ଗଲରେ ଚରିବାକୁ ଯାଇ ସେଠାରୁ ହଜିଯାଇଥିଲା। ଯେତେବେଳେ ବାବ୍ରୁ ଗାଁ ଏବଂ ଏହାର ଆଖପାଖ ଅଞ୍ଚଳରେ ଛେଳି ଖୋଜିଥିଲେ, ସେତେବେଳେ ସେ ଗାଁଠାରୁ ୪ କିମି ଦୂରରେ ଥିବା ମାସିଙ୍ଗପୁରା ଗାଁର ଡାଙ୍ଗଫଲାରେ ଥିବା ଖବର ପାଇଥିଲେ।
ବାବ୍ରୁ ମାସିଙ୍ଗପୁରା ଗାଁର ଓମ୍କାରଲାଲ ରାଓ୍ବତଙ୍କ ଘରେ ପହଞ୍ଚିବା ପରେ ସେଠାରେ ତାଙ୍କ ଛେଳି ବନ୍ଧା ହୋଇଥିବା ଦେଖିବାକୁ ପାଇଥିଲେ। ଏହି ସମୟ ମଧ୍ୟରେ ଓମ୍କାରଲାଲ ଛେଳିକୁ ନିଜର ବୋଲି କହି ବାବ୍ରୁଙ୍କୁ ତଡ଼ି ଦେଇଥିଲେ। କିନ୍ତୁ ବାବ୍ରୁ ହାର୍ ମାନି ନ ଥିଲେ। ସେ ଗାଁ ସରପଞ୍ଚଙ୍କ ସମର୍ଥନ ଲୋଡ଼ିଥିଲେ ମଧ୍ୟ ତାହା ସଫଳ ହୋଇ ନ ଥିଲା। ଏହା ପରେ ବାବ୍ରୁ ଏହାକୁ ଖେରୋଡା ଥାନାରେ ଜଣାଇଥିଲେ। ପୋଲିସ କର୍ମଚାରୀମାନେ ବାବ୍ରୁ ଏବଂ ଓମ୍କାରଙ୍କୁ ଥାନାକୁ ଡକାଇଥିଲେ।
ଏଥିରେ ଛେଳି ବାବ୍ରୁଙ୍କ ଛେଳିଛୁଆ ପାଖକୁ ଯାଇ କ୍ଷୀର ଖାଇବାକୁ ଦେଇଥିଲା। ଏହି ସମୟରେ, ଓମ୍କାର ଆଣିଥିବା ଛୁଆ ମୁଣ୍ଡରେ ଆଘାତ କରି ତଡ଼ି ଦେଇଥିଲା। ଛେଳି ଦ୍ୱାରା କରାଯାଇଥିବା ଏହି ନ୍ୟାୟ ସେଠାରେ ଉପସ୍ଥିତ ଥିବା ସମସ୍ତ ଲୋକଙ୍କୁ ଆଶ୍ଚର୍ଯ୍ୟ କରିଥିଲା। ଏଥିସହ ପୋଲିସ ପ୍ରକୃତ ଛେଳି ମାଲିକ ବାବ୍ରୁଙ୍କୁ ତାଙ୍କ ଛେଳି ହସ୍ତାନ୍ତର କରାଯାଇଥିଲା।