ମୁମ୍ବାଇ,୧୮।୯ : ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ସୋମବାର ବିରୋଧୀ ଦଳକୁ କଡା ସମାଲୋଚନା କରିଛନ୍ତି। ଏପରିକି ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସିଂହ ବୋଲି ବର୍ଣ୍ଣନା କରିଛନ୍ତି। ସେ କହିଛନ୍ତି ବିରୋଧୀ ଦଳ କେବଳ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ପରାସ୍ତ କରିବାକୁ ଚିନ୍ତା କରୁଛନ୍ତି। କିନ୍ତୁ ଛେଳି ମେଣ୍ଢା ଜଙ୍ଗଲରେ ସିଂହ ବିରୁଦ୍ଧରେ ଲଢ଼ି ପାରିବେ ନାହିଁ।
ଶ୍ରୀନଗରର ଏକ ହିନ୍ଦୀ ନ୍ୟୁଜ ଚ୍ୟାନେଲକୁ ଶିନ୍ଦେ କହିଛନ୍ତି ମୁଁ ବିରୋଧୀ ଦଳକୁ ଶାଗୁଣା ବୋଲି କହିବି ନାହିଁ। କିନ୍ତୁ ଛେଳି ମେଣ୍ଢା ଏକାଠି ହୋଇ ଜଙ୍ଗଲରେ ସିଂହ ବିରୁଦ୍ଧରେ ଲଢ଼େଇ କରିବା ପାଇଁ ଏମଜୁଟ ହୋଇ ପାରିବେ ନାହିଁ। ସେ କହିଛନ୍ତି ସିଂହ ସର୍ବଦା ସିଂହ ଏବଂ ସେ ଜଙ୍ଗଲକୁ ଶାସନ କରିଥାଏ।
ନ୍ୟାଶନାଲ ଡେମୋକ୍ରାଟିକ ଆଲାଇନ୍ସ (ଏନଡିଏ) କୁ ଚ୍ୟାଲେଞ୍ଜ କରିବାକୁ ବିରୋଧୀ ଦଳ ଏକାଠି ହେବା ବିଷୟରେ ପଚରାଯିବାରୁ ଶିବସେନା ନେତା କହିଛନ୍ତି ସେମାନେ କେବଳ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ପରାସ୍ତ କରିବାକୁ ଚିନ୍ତା କରୁଛନ୍ତି। ସେ କହିଛନ୍ତି ମୁଁ ଭାବୁନାହିଁ ବିରୋଧୀ କୌଣସି ସ୍ଥାନରେ ପ୍ରତିଦ୍ୱନ୍ଦ୍ୱିତା ସ୍ଥିତିରେ ଅଛି।
ମହାରାଷ୍ଟ୍ରରେ ନ୍ୟାଶନାଲ ଡେମୋକ୍ରାଟିକ ଆଲାଇନ୍ସର ସ୍ଥିତି ଉପରେ ଶିନ୍ଦେ କହିଛନ୍ତି ଅଜିତ ପାୱାର ଆମ ସହ ଯୋଗଦେବା ପରେ ଆମ ପ୍ରତି ୨୧୫ ରୁ ଅଧିକ ବିଧାୟକଙ୍କ ସମର୍ଥନ ରହିଛି। ସରକାରଙ୍କ ପାଇଁ କୌଣସି ବିପଦ ନାହିଁ। ଉଦ୍ଧବ ଠାକରେଙ୍କ ନାମ ନ ନେଇ ସେ କହିଛନ୍ତି ଆମେ ଲୋକଙ୍କ ପାଇଁ କାମ କରୁଛୁ। ଲୋକମାନେ ସ୍ଥିର କରିବେ ସେମାନେ କେଉଁ ପ୍ରକାରର ବ୍ୟକ୍ତି ଚାହାଁନ୍ତି, ଯିଏ ସେମାନଙ୍କ ପାଇଁ କାମ କରେ କିମ୍ବା ଯିଏ କେବଳ ଘରେ ବସିଥାଏ ।
ବିରୋଧୀ ଶିବିରର ନେତାମାନଙ୍କୁ ଟାର୍ଗେଟ କରିବା ପାଇଁ ଏନଫୋର୍ସମେଣ୍ଟ ଡାଇରେକ୍ଟୋରେଟ (ଇଡି) ବ୍ୟବହାର କରାଯାଉଥିବା ଅଭିଯୋଗ ଉପରେ ଶିନ୍ଦେ କହିଛନ୍ତି ଦୁର୍ନୀତିଗ୍ରସ୍ତ କାର୍ଯ୍ୟକଳାପରେ ସମ୍ପୃକ୍ତ ଥିବା ସନ୍ଦେହ କରାଯାଉଥିବା ଲୋକଙ୍କ ବିରୋଧରେ ଇଡି କାର୍ଯ୍ୟାନୁଷ୍ଠାନ ଗ୍ରହଣ କରେ। ଇଡି ବିନା କାରଣରେ କାହାକୁ ହଇରାଣ କରେ ନାହିଁ ।
