ପର୍ଯ୍ୟଟନ ଋତୁ ଆସିଲେ କଳାହାଣ୍ଡି ଜିଲାର ପର୍ଯ୍ୟଟନସ୍ଥଳୀ ମଧ୍ୟରୁ ମନେପଡେ ଗୋବରଗୋଲା ଜଳ ପ୍ରପାତ। ଜିଲାର ସଦରମହକୁମା ଭବାନୀପାଟଣାଠାରୁ ଏହାର ଦୂର ପ୍ରାୟ ୪୫ କି.ମି.। ଜୁନାଗଡ ବ୍ଲକ ଅନ୍ତର୍ଗତ ବୁଡିଦର ପଞ୍ଚାୟତରେ ଏହି ମନୋରମ ପର୍ଯ୍ୟଟନସ୍ଥଳୀ ରହିଛି। ଏବେ ବି ଲୋକ ଲୋଚନକୁ ଆସି ପାରିନାହଁି। ଚାରିଆଡେ ଜଙ୍ଗଲ ପାହାଡ ମଧ୍ୟରେ ଲୁଚି ରହିଛି ଏହି ଜଳପ୍ରପାତ। ଜଳପ୍ରପାତରେ ପ୍ରାୟ ୪୦ ଫୁଟ ଉପରୁ ତଳକୁ ପାଣିପଡୁଥିବା ବେଳେ ସବୁବେଳେ ୩୦ ଫୁଟରୁ ଅଧିକ ପାଣି ମହଜୁଦ ରହିଥାଏ। ତେବେ ଏଠାକୁ ଯିବାକୁ କୌଣସି ସୁବିଧା ନାହଁ। ପର୍ଯ୍ୟଟନ ବିଭାଗର ନଜର ଏ ଯାଏଁ ପଡି ନ ଥିବାବେଳେ ଜଙ୍ଗଲ ବିଭାଗ ଜଳପ୍ରପାତ ପାଖ ଗଁା ଖୁଟୁଲୁଗୁଡା ପର୍ଯ୍ୟନ୍ତ ରାସ୍ତା ନିର୍ମାଣ କରିଛି। ସେଠାରୁ ଆଉ ୧ କି.ମି. ଜଙ୍ଗଲ ରାସ୍ତାରେ ଚାଲି ଗଲେ ଏହି ମନୋରମ ସ୍ଥାନ ପଡିବ। ଯଦି ଚାରିଚକିଆରେ ଗଲେ ଅମଠାଗୁଡା ପର୍ଯ୍ୟନ୍ତ ଯାଇ ହେବ, ସେଠାରୁ ଆଉ ୨ କି.ମି. ଚାଲିବାକୁ ପଡିବ। ଗୋବରଗୋଲା ଯାଏଁ ରାସ୍ତା ଏବଂ ଜଳପ୍ରପାତର ଚାରିପଟେ ବ୍ୟାରିକେଡ ସହିତ ବିଶ୍ରାମାଗାର ଓ ପାନୀୟଜଳ ବ୍ୟବସ୍ଥା କରାଗଲେ ଯାତ୍ରୀଙ୍କୁ ସୁବିଧା ମିଳନ୍ତା ଓ ଜିଲାର ପର୍ଯ୍ୟଟନ ମାନଚିତ୍ରରେ ଏକ ଗୁରୁତ୍ୱପୂର୍ଣ୍ଣ ସ୍ଥାନ ନେଇପାରନ୍ତା।
କେମିତି ଯିବେ
ଭବାନୀପାଟଣାରୁ ବସ୍ ଯୋଗେ ଜୁନାଗଡକୁ ଯିବାକୁ ପଡିବ। ଜୁନାଗଡରୁ ଟ୍ୟାକ୍ସି କରି ପ୍ରାୟ ୧୮ କି.ମି. ଦୂର ବୁଡିଦର ପଞ୍ଚାୟତ ଅମଠାଗୁଡା ପର୍ଯ୍ୟନ୍ତ ଯିବାକୁ ହେବ। ସେଠାରୁ ୧ କି.ମି. ଯିବା ପରେ ସେହି ମନୋରମ ଦୃଶ୍ୟ ଦେଖିବା ସୁଯୋଗ ମିଳେ। ସ୍ଥାନଟିକୁ ଦେଖିବା ପରେ ଜୁନାଗଡକୁ ଆସି ହୋଟେଲରେ ରାତ୍ରିଯାପନ କରିପାରିବେ।