ଭବାନୀପାଟଣା,୨୧ା୧୨(ସ୍ବ.ପ୍ର.): କଳାହାଣ୍ଡି ଜିଲା ମହାଲିଙ୍ଗ ସନ୍ ସାଇନ ପବ୍ଲିକ ସ୍କୁଲ ଅଧ୍ୟକ୍ଷା ମମିତା ମେହେର ହତ୍ୟା ମାମଲାର ମୁଖ୍ୟ ଅଭିଯୁକ୍ତ ଗୋବିନ୍ଦ ସାହୁ ମଙ୍ଗଳବାର କଣ୍ଟାବାଞ୍ଜି ସବଜେଲ ଭିତରେ ସନ୍ଦେହଜନକ ମୃତ୍ୟୁ ଘଟଣା ରାଜ୍ୟରେ ହଇଚଇ ସୃଷ୍ଟି କରିଛି। ବୁଧବାର ଗୋବିନ୍ଦ ସାହୁଙ୍କ ମୃତଦେହକୁ କଡ଼ା ସୁରକ୍ଷା ବ୍ୟବସ୍ଥା ଭିତରେ ବଲାଙ୍ଗୀର ଭୀମଭୋଇ ମେଡିକାଲ କଲେଜ ହସ୍ପିଟାଲରେ ବ୍ୟବଚ୍ଛେଦ କରାଯାଇଥିଲା। ଏହାପରେ ପୋଲିସ ମୃତଦେହକୁ ପରିବାର ଲୋକଙ୍କୁ ହସ୍ତାନ୍ତର କରିଥିଲା। ଅପରାହ୍ନ ୫.୩୦ରେ ଆମ୍ବୁଲାନ୍ସ ଜରିଆରେ ଗୋବିନ୍ଦଙ୍କ ମୃତଦେହ ନିଜ ଗାଁ ମହାଲିଙ୍ଗରେ ପହଞ୍ଚିଥିଲା। ଏହି ସମୟରେ ଗ୍ରାମରେ ଶୋକାକୁଳ ପରିବେଶ ସୃଷ୍ଟି ହୋଇଥିଲା। ନିଜ ଘର ପରିସରରେ ବିଧି ବିଧାନ ଅନୁଯାୟୀ ମୃତଦେହକୁ କିଛି ସମୟ ରଖାଯିବା ପରେ ଅନ୍ତିମ ସତ୍କାର ପାଇଁ ଗାଁ ଶ୍ମଶାନକୁ ନିଆଯାଇଥିଲା। ସେଠାରେ ପୁଅ ଚିନୁ ସାହୁ ମୁଖାଗ୍ନି ଦେଇଥିବା ଜଣାପଡ଼ିଛି। ଅନ୍ୟପଟେ ଏବେ ବି ପରିବାର ଲୋକେ ଏହା ଆତ୍ମହତ୍ୟା ନୁହେଁ ବରଂ ସୁପରିକଳ୍ପିତ ହତ୍ୟାକାଣ୍ଡ ବୋଲି ଅଭିଯୋଗ ଆଣିଛନ୍ତି। ପୂର୍ବତନ ମନ୍ତ୍ରୀଙ୍କୁ ବଞ୍ଚିବାକୁ ଯାଇ ରାଜ୍ୟ ସରକାର ଏପରି ଦେଖାଣିଆ ବନ୍ଦ କରନ୍ତୁ ବୋଲି କହିଛନ୍ତି। ଯଦି ରାଜ୍ୟ ସରକାରଙ୍କ ସତ୍ସାହସ ଅଛି ତା’ହେଲେ କେନ୍ଦ୍ରକୁ ଏହି ଘଟଣାରେ ସିବିଆଇ ତଦନ୍ତ କରିବାକୁ ପତ୍ର ଲେଖନ୍ତୁ ନଚେତ୍ ଏସ୍ଆଇଟି ତଦନ୍ତର ନିର୍ଦ୍ଦେଶ ଦିଅନ୍ତୁ ବୋଲି ମୃତ ଗୋବିନ୍ଦଙ୍କ ଭଣଜା ମନୋଜ ସାହୁ ପ୍ରକାଶ କରିଛନ୍ତି।