କଣାସ,୧୫।୭(ସ୍ବ.ପ୍ର.)-କଣାସ ବ୍ଲକ ଅନ୍ତର୍ଗତ ସାହୁପଡା ପଞ୍ଚାୟତର ଟଣମଣ ଗ୍ରାମରେ ବୁଧବାର ଜଣେ ଚାଷୀ ଜମିରେ ହଳ କରୁଥିବା ସମୟରେ ଏକ ଶିବ ଲିଙ୍ଗ ବାହାରିଥିବା ଜଣାପଡିଛି। ସୂଚନାମୁତାବକ, ଉକ୍ତ ଗ୍ରାମର କାଳୁଚରଣ ପରିଡ଼ା ବୁଧବାର ମଧ୍ୟାହ୍ନ ସମୟରେ ନିଜ ଚାଷ ଜମିରେ ହଳ କରୁଥିଲେ। ଏହି ସମୟରେ ହଠାତ୍ ଲଙ୍ଗଳରେ କୌଣସି କଠିନ ପଦାର୍ଥ ବାଜିଥିଲା। କାଳୁଚରଣ ହଳକୁ ରଖି ଉକ୍ତ ସ୍ଥାନକୁ ଖୋଳିବାରୁ ଏକ ଶିବ ଲିଙ୍ଗ ବାହାରିଥିଲା। ଏହି କଥା ସେ ସ୍ଥାନୀୟ ଲୋକ ଓ ଗ୍ରାମବାସୀଙ୍କୁ ଜଣାଇଥିଲେ। ଏହି ଖବର ଗ୍ରାମରେ ପ୍ରଚାର ହେବା ମାତ୍ରେ ଆଖପାଖ ଗ୍ରାମର ଶତାଧିକରୁ ଊର୍ଦ୍ଧ୍ୱ ବ୍ୟକ୍ତି ଶିବଲିଙ୍ଗଙ୍କୁ ଦେଖିବା ପାଇଁ ଭିଡ଼ ଜମାଇ ଥିଲେ। ଏହାସହ ଅନ୍ୟ କେତେଜଣ ଲୋକ ଶିବଲିଙ୍ଗକୁ ସଫା କରି କପଡ଼ା ଲଗାଇ ପୂଜାର୍ଚ୍ଚନା କରୁଥିବା ଦେଖାଯାଇଛି।
