ଅନୁଗୋଳ ଅଫିସ, ୧୭।୧୦: ଆବଦ୍ଧ ମଣ୍ଡପରେ ପୂଜାର୍ଚ୍ଚନା ପରେ ମେଲାଣି ନେଇଛନ୍ତି ମା’ ଦୁର୍ଗା। ଘଣ୍ଟଘଣ୍ଟା, ଢୋଲ ବାଦ୍ୟର ତାଳେ ତାଳେ ନିରାଡମ୍ବର ଭାବେ ଦେବୀଙ୍କୁ ବିଦାୟ ଦେଇଛନ୍ତି ଅନୁଗୋଳବାସୀ। ପୂଜା ଶାନ୍ତି ଶୃଙ୍ଖଳାର ସମାପନ ହୋଇଥିଲେ ମଧ୍ୟ ବିସର୍ଜନରେ ସାମାନ୍ୟ ବିଶୃଙ୍ଖଳା ଦୃଷ୍ଟିଗୋଚର ହୋଇଥିଲା। ପ୍ରଶାସନ ପକ୍ଷରୁ ଅମଲାପଡ଼ାରେ ଅସ୍ଥାୟୀ ପୋଖରୀ କରାଯାଇଥିଲେ ମଧ୍ୟ ବସ୍ଷ୍ଟାଣ୍ଡ ପୂଜା କମିଟିକୁ ବାଦ୍ ଦେଲେ ଅନ୍ୟମାନେ ନାଳରେ ମୂର୍ତ୍ତି ଭସାଇଥିଲେ। ଅସ୍ଥାୟୀ ପୋଖରୀ ଦାୟିତ୍ୱରେ ଥିବା ଅଧିକାରୀମାନେ ନିୟମ ଜଗିବା ବଦଳରେ ଅସହାୟତା ପ୍ରକାଶ କରିଥିଲେ। ତେବେ ପ୍ରଶାସନ କରିଥିବା ଅସ୍ଥାୟୀ ପୋଖରୀରେ ଆବଶ୍ୟକ ସୁବିଧା କରାଯାଇ ନ ଥିଲା। ଉକ୍ତ ସ୍ଥାନ ପାଣି କାଦୁଆରେ ଭର୍ତ୍ତି ହୋଇଥିଲା। ତେଣୁ ପୂଜା କମିଟି ସେଠାରୁ ଯିବାକୁ ଅନିଚ୍ଛା ପ୍ରକାଶ କରିଥିଲେ। ତେଣୁ ଏଭଳି ବ୍ୟତିକ୍ରମ ହୋଇଥିବା ଚର୍ଚ୍ଚା ହେଉଛି। ସୂଚନାଯୋଗ୍ୟ, ଗତବର୍ଷ ମଧ୍ୟ ସମାନ ସମସ୍ୟା ସୃଷ୍ଟି ହୋଇଥିଲା। ଆଗାମୀ ଦିନରେ ଏହାର ପୁନରାବୃତ୍ତି ହେବ ନାହିଁ ବୋଲି ଜିଲା ପ୍ରଶାସନ ପକ୍ଷରୁ ପ୍ରତିଶ୍ରୁତି ଦିଆଯାଇଥିଲା। ପ୍ରଶାସନର ଖାମଖିଆଲି ମନୋଭାବ ଯୋଗୁ ପ୍ରତିବର୍ଷ ଏଭଳି ସମସ୍ୟା ଉପୁଜୁଥିବା ସହରରେ ଆଲୋଚନା ହେଉଛି।