ମହାକାଳପଡ଼ା,୧ା ୮(ଡି.ଏନ.ଏ.):କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଗୋଗୁଆ ପଞ୍ଚାୟତ ପରିସରରେ ଗୋଗୁଆ ଗ୍ରାମର ଏକ ନବନିର୍ମିତ ସ୍ବାସ୍ଥ୍ୟ ଉପକେନ୍ଦ୍ରରେ ଅଙ୍ଗନୱାଡି କେନ୍ଦ୍ର (୧)ର ଶିଶୁମାନେ ପଢୁଥିବାର ଦେଖିବାକୁ ମିଳିଛି। ଏହି କେନ୍ଦ୍ରରେ ୩୫ କୋମଳମତି ଶିଶୁ ପାଠ ପଢୁଛନ୍ତି। ଗୋଗୁଆ ଗ୍ରାମରେ ନୂତନ ଅଙ୍ଗନୱାଡି କେନ୍ଦ୍ର ନିର୍ମାଣ କାର୍ଯ୍ୟ ହୋଇନାହିଁ। ଫଳରେ ବାଧ୍ୟ ହୋଇ ଏହି ନବନିର୍ମିତ ସ୍ବାସ୍ଥ୍ୟ ଉପକେନ୍ଦ୍ରରେ ଶିଶୁମାନେ ପଢୁଛନ୍ତି। ଏହି କେନ୍ଦ୍ରରେ ୩୫ ଶିଶୁ ନାମ ଲେଖାଇଥିଲେ ମଧ୍ୟ ୫ରୁ ୧୦ଜଣ ପିଲା ପଢୁଛନ୍ତି ବୋଲି ସ୍ଥାନୀୟ ଲୋକ କହିଛନ୍ତି। ତେବେ କେଉଁ ସ୍ଥାନରେ ଶିଶୁମାନେ ପଢୁଛନ୍ତି ଏହି କେନ୍ଦ୍ର -୧ ଦାୟିତ୍ୱରେ ଥିବା ଅଙ୍ଗନୱାଡି ସୁପରଭାଇଜର ଛବିତା ସାମଲଙ୍କ ନିକଟରେ ଖବର ନାହିଁ। ଏହି କେନ୍ଦ୍ରକୁ ପରିଦର୍ଶିକା ସାମଲ କେବେ ଗସ୍ତ କରୁ ନ ଥିବା ଜଣାପଡିଛି। ରାଜ୍ୟ ସରକାର କୋମଳମତି ଶିଶୁମାନଙ୍କ ବିକାଶ ପାଇଁ ସରକାରୀ ରାଜକୋଷରୁ ବିପୁଳ ଅର୍ଥ ବ୍ୟୟ କରୁଥିଲେ ମଧ୍ୟ ଶିଶୁ ବିକାଶ ଅଧିକାରୀମାନେ ତୃଣମୂଳ ସ୍ତରରେ ଠିକ୍ ତଦାରଖ କରୁ ନାହାନ୍ତି। କୋମଳମତି ଶିଶୁମାନଙ୍କୁ ନିମ୍ନମାନର ଖାଦ୍ୟ ଯୋଗାଣ କରାଯାଉଛି ବୋଲି ଅଭିଯୋଗ ହେଉଛି। ବ୍ଲକର ବହୁ କେନ୍ଦ୍ରରେ ଶିଶୁମାନଙ୍କୁ ଜଳଖିଆ ଖାଇବା ପାଇଁ ଦିଆଯାଉନି। ଫଳରେ ଶିଶୁଙ୍କ ପୋଷଣର ଅଭାବ ରହୁଛି ବୋଲି ସ୍ଥାନୀୟ ଲୋକ ଅଭିଯୋଗ କରିଛନ୍ତି। ଏ ସଂକ୍ରାନ୍ତରେ ଅଙ୍ଗନଓ୍ବାଡି କେନ୍ଦ୍ରର ଓ୍ବାର୍କର ସତ୍ୟଭାମା ପରିଡାଙ୍କୁ ପଚାରିବାରେ ଗୃହ ନ ଥିବାରୁ ଏଠାରେ ଶିଶୁମାନଙ୍କୁ ପଢାଉଛୁ। ଏଠାରେ ୩୫ ଶିଶୁ ପଢୁଛନ୍ତି, କିନ୍ତୁ ଆଜି କମ୍ ପିଲା ଆସିଛନ୍ତି। ଶିଶୁଙ୍କୁ ଠିକ୍ ଭାବେ ଖାଦ୍ୟ ଦିଆଯାଉଛି ବୋଲି ସେ କହିଛନ୍ତି। ଏ ସମ୍ପର୍କରେ ଗୋଗୁଆ ପଞ୍ଚାୟତ ସରପଞ୍ଚ ପ୍ରମୋଦ କୁମାର ଦାସଙ୍କୁ ପଚାରିବାରେ ଗୋଗୁଆ ଗ୍ରାମର ଅଙ୍ଗନୱାଡି କେନ୍ଦ୍ର -୧ର ନୂତନ ଗୃହ ନିର୍ମାଣ କାର୍ଯ୍ୟ ଖୁବ୍ଶୀଘ୍ର ସମ୍ପୂର୍ଣ୍ଣ ହେବ ବୋଲି କହିଛନ୍ତି।