ଝୁମ୍ପୁରୀ,୧୮ା୧୦(ଡି.ଏନ.ଏ.): ସୋମବାର ବୈତରଣୀ ନଦୀରେ ବୁଡ଼ି ୨ ନାବାଳକଙ୍କ ମୃତ୍ୟୁ ଘଟିଛିା ଗୁରୁତର ଅବସ୍ଥାରେ ଅନ୍ୟ ଜଣେ ନାବାଳକଙ୍କୁ ଉଦ୍ଧାର କରାଯାଇଛି । ମୃତକ ହେଲେ ଯାଜପୁର ଜିଲା ଦଶରଥପୁର ବ୍ଲକ ଡୋଭାବିଲ ଗ୍ରାମର ଶ୍ରୀକାନ୍ତ ଜେନାଙ୍କ ପୁଅ ବିଭୂତି ଭୂଷଣ(୧୨), ଉମାକାନ୍ତ ଜେନାଙ୍କ ପୁଅ ଦିବ୍ୟରଞ୍ଜନ(୧୫) ଓ ବିଜୟ ଜେନାଙ୍କ ପୁଅ ଶୁଭମ୍(୧୧)। ସେମାନଙ୍କୁ ଗୁରୁତର ଅବସ୍ଥାରେ ଡାକ୍ତରଖାନାରେ ଭର୍ତ୍ତି କରାଯାଇଛି ।
ସୂଚନା ଅନୁଯାୟୀ, ସୋମବାର ଏହି ୩ ସାଙ୍ଗ ଗୋପକୂଳ ବୈତରଣୀ ନଦୀପଠାକୁ କୁମାର ପୂର୍ଣ୍ଣିମା ପାଇଁ କଇଁଫୁଲ ତୋଳିବାକୁ ଯାଇଥିବା ବେଳେ ଏହି ଘଟଣା ଘଟିଛି । ପାଣିରେ ପଶିବା ପରେ ପ୍ରଥମେ ବିଭୂତି ବୁଡ଼ିଯାଇଥିଲେ। ତାଙ୍କୁ ଉଦ୍ଧାର କରିବାକୁ ଦିବ୍ୟରଞ୍ଜନ ଓ ଶୁଭମ୍ ଉଦ୍ୟମ କରୁଥିବାବେଳେ ସେମାନେ ମଧ୍ୟ ବୁଡ଼ିଯାଇଥିଲେ । ଗ୍ରାମର କେତେଜଣ ଯୁବକ ପହଁରି ପାଣିରୁ ୩ ଜଣଙ୍କୁ ଉଦ୍ଧାର କରିଥିଲେ। ତୁରନ୍ତ ସେମାନଙ୍କୁ ମଙ୍ଗଳପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନିଆଯାଇଥିଲା। ଡାକ୍ତର ବିଭୂତି ଓ ଦିବ୍ୟରଞ୍ଜନଙ୍କୁ ମୃତ ଘୋଷଣା କରିଥିଲେ । ଖବରପାଇ ଝୁମ୍ପୁରୀ ବିଟ୍ ହାଉସ୍ ପୋଲିସ ଓ ମଙ୍ଗଳପୁର ଥାନା ପୋଲିସ ପହଞ୍ଚି ତଦନ୍ତ ଜାରି ରଖିଛନ୍ତି।
