ନାଉଗାଁ,୨୮ା୮(ସୁଧା ବେହୁରା): ନାଉଗାଁ ବ୍ଲକ ଅନ୍ତର୍ଗତ ଶିଖର ପଞ୍ଚାୟତର ଅଙ୍ଗେଶ୍ୱରପଡ଼ାରୁ ଗୋଳା ନାଳ ବାହାରି ଓଷକଣା, ଡେରିକି, କୋରୁଅ ପଞ୍ଚାୟତ ଦେଇ ଗାରୋଇ ନିକଟରେ ଗୋବରୀ ନଦୀରେ ମିଶିଛି। ଚଳିତ ଆର୍ଥତ୍କ ବର୍ଷରେ ଏହି ନାଳ ଖନନ ପାଇଁ ଜଳ ସମ୍ପଦ ବିଭାଗ ପକ୍ଷରୁ ବହୁ କୋଟି ଟଙ୍କା ଖର୍ଚ୍ଚ କରାଯାଇଛି। ବର୍ତ୍ତମାନ ଏହି ନାଳ ଜଳରେ ପରିପୂର୍ଣ୍ଣ ରହିଛି। ତଥାପି ଏହା ଚାଷୀଙ୍କ କାମରେ ଲାଗୁନାହିଁ। ଏନେଇ ସେମାନେ ଅସନ୍ତୋଷବ୍ୟକ୍ତ କରିଛନ୍ତି।
ଚଳିତ ବର୍ଷ ବ୍ଲକରେ ଆଶାନୁପାତ ବର୍ଷା ହୋଇନାହିଁ। ଫଳରେ ଶ୍ରାବଣ ମାସ ଶେଷ ହେବାକୁ ବସିଥିଲେ ମଧ୍ୟ ଚାଷୀ ଚାଷ କାର୍ଯ୍ୟ କରିପାରୁ ନାହିଁ। ଯେଉଁ ସବୁ ପଞ୍ଚାୟତରେ ନାଳ ଓ ଉଠା ଜଳ ସେଚନର ସୁବିଧା ରହିଛି ସେଠାରେ କାଁ ଭାଁ ଚାଷ କାର୍ଯ୍ୟ ଚାଲିଥିବାବେଳେ ଅଣ ଜଳସେଚିତ ଅଞ୍ଚଳରେ ଚାଷ କାର୍ଯ୍ୟ ଏକ ପ୍ରକାର ଠପ୍ ହୋଇଯାଇଛି । ସ୍ଥାନୀୟ ଚାଷୀଙ୍କ ସ୍ବାର୍ଥକୁ ଦୃଷ୍ଟିରେ ରଖି ଗୋଳା ନାଳରେ ଏକ ଡ୍ୟାମ୍ ନିର୍ମାଣ କରିବା ପାଇଁ ସାମାଜିକ କର୍ମୀ ଉପେନ୍ଦ୍ର ବିଶ୍ୱାଳ ଓ ସ୍ଥାନୀୟ ଚାଷୀମାନେ କେନ୍ଦ୍ର ଜଳ ସଂରକ୍ଷଣ ଓ ଆଦିବାସୀ କଲ୍ୟାଣ ମନ୍ତ୍ରୀ ନାଉଗଁା ଗସ୍ତରେ ଆସିଥିବାବେଳେ ପ୍ରସ୍ତାବ ଦେଇଥିଲେ। ଏହି ପ୍ରସ୍ତାବକୁ ଗୁରୁତ୍ୱ ଦେଇ ଉକ୍ତ ନାଳ କାର୍ଯ୍ୟ କରିବାକୁ ଜଳ ସମ୍ପଦ ବିଭାଗକୁ ନିର୍ଦ୍ଦେଶ ଦିଆଯାଇଥିଲା। କିନ୍ତୁ ବିଭାଗ ପକ୍ଷରୁ ଡ୍ୟାମ୍ ପରିବର୍ତ୍ତେ ସଫେଇ କାର୍ଯ୍ୟ ଜାରିରହିଛି। ଏଥିରେ କେବଳ ଠିକାଦାର ମାଲାମାଲ ହୋଇଥିବାବେଳେ ନାଳର କୌଣସି ଅଂଶ ଚାଷୀଙ୍କ କାର୍ଯ୍ୟରେ ଲାଗୁ ନାହିଁ ବୋଲି ସ୍ଥାନୀୟ ଚାଷୀ ମତବ୍ୟକ୍ତ କରିଛନ୍ତି। ଏହି ନାଳରେ ଡ୍ୟାମ୍ ନିର୍ମାଣ କରାଯାଇଥିଲେ ମରୁଡି ସମୟରେ ଖରିଫ ଓ ରବି ଋତୁରେ ଚାଷ କାର୍ଯ୍ୟ ହୋଇପାରିଥାନ୍ତା। ୩ ପଞ୍ଚାୟତବାସୀ ନାଳର ଜଳକୁ ବ୍ୟବହାର କରି ଚାଷ କାର୍ଯ୍ୟ କରିପାରିଥାନ୍ତେ।
ସୂଚନାଯୋଗ୍ୟ, ଏହି ନାଳର ଉପର ମୁଣ୍ଡ ବନ୍ଦ ରହିଛି ଓ ଶେଷ ମୁଣ୍ଡଟି ଖୋଲା ରହିଛି। ବିଭାଗ ପକ୍ଷରୁ ନାଳର ମାତ୍ର ୩୦ ମିଟର ଖୋଳିବା ପାଇଁ ନିର୍ଦ୍ଦେଶ ଦିଆଯାଇଛି। କିନ୍ତୁ ଠିକାଦାର ଏଥିରେ ଚଞ୍ଚକତା କରି ନାଳର ମଝି ଭାଗର ଉଭୟ ପାର୍ଶ୍ୱରେ ୧୦ ଫୁଟ ଲେଖାଏ ଖୋଳିଛନ୍ତି ବୋଲି ଚାଷୀମାନେ ଅଭିଯୋଗ କରିଛନ୍ତି। ଖୋଳିଥିବା ମାଟିକୁ ସେହି ନାଳ ଉପରେ ପକାଇ ଦେଇଛନ୍ତି। ଫଳରେ ବର୍ଷା ପାଣିରେ ଉକ୍ତ ମାଟି ବୋହି ପୁନର୍ବାର ନାଳରେ ପଶୁଛି। ବିଭାଗ ତରଫରୁ ନାଳ ସଫେଇ ପାଇଁ ୧ କୋଟି ୮୮ ଲକ୍ଷ ୮୨ ହଜାର ବ୍ୟୟ ବରାଦ କରାଯାଇଥିବାବେଳେ ନାମକୁ ମାତ୍ର ସଫେଇ କରାଯାଇଛି। ଏହି ନାଳ ଖୋଳାରେ ବ୍ୟାପକ ଦୁର୍ନୀତି ହେବା ସହ ଚାଷୀଙ୍କ ଆବଶ୍ୟକତାକୁ ଦୃଷ୍ଟିରେ ନ ରଖି ଅର୍ଥ ବ୍ୟୟ କରାଯାଇଛି। ଏହାର ଉଚ୍ଚସ୍ତରୀୟ ତଦନ୍ତ ପାଇଁ ଉପେନ୍ଦ୍ର ବିଶ୍ୱାଳ ଜିଲାପାଳଙ୍କ ଜନଶୁଣାଣି ଶିବିରରେ ଅଭିଯୋଗ କରିଛନ୍ତି। ଚାଷୀଙ୍କ ଆବଶ୍ୟକତାକୁ ଦୃଷ୍ଟିରେ ରଖି ଉକ୍ତ ନାଳରେ ଡ୍ୟାମ୍ ନିର୍ମାଣ ପାଇଁ ସ୍ଥାନୀୟ ଚାଷୀ ନିରଞ୍ଜନ ସାହୁ, କାର୍ତ୍ତିକ ମୁଦୁଲି, ଆଶୁତୋଷ ପରିଡା ଓ ମହାଦେବ ସ୍ବାଇଁ ପ୍ରମୁଖ ଜିଲା ପ୍ରଶାସନ ନିକଟରେ ଦାବି କରିଛନ୍ତି। ଏ ସଂକ୍ରାନ୍ତରେ ବିଭାଗୀୟ ଯନ୍ତ୍ରୀ ସୂର୍ଯ୍ୟକାନ୍ତ ଦୀକ୍ଷିତଙ୍କୁ ପଚାରିବାରେ ନାଳ ସଫେଇ ପାଇଁ ଅର୍ଥ ବରାଦ କରାଯାଇଛି, ମାତ୍ର ଏପର୍ଯ୍ୟନ୍ତ କାର୍ଯ୍ୟ ସରିନାହିଁ। ପୁନର୍ବାର ଏହି କାର୍ଯ୍ୟ କରାଯିବ ବୋଲି ସେ କହିଛନ୍ତି।