ନୂଆଦିଲ୍ଲୀ,୨୭।୭: ଗତ କିଛି ସପ୍ତାହ ଧରି ସୁନା ଦର ଭାରତରେ ବୃଦ୍ଧି ଘଟୁଥିବା ବେଳେ ଦରରେ ବିରତି ଲାଗୁନାହିଁ। ବିଦେଶୀ ବଜାର କାରଣରୁ ମଲ୍ଟି କମୋଡିଟି ଏକ୍ସଚେଞ୍ଜ(ଏମ୍ସିଏକ୍ସ)ରେ ସୋମବାର ପ୍ରାରମ୍ଭିକ କାରବାରରେ ସୁନା ଦର ବିଶେଷ ବୃଦ୍ଧି ହୋଇଥିବା ଜଣାପଡିଛି। ସୁନା ଦର ୮୦୦ ଟଙ୍କା ବୃଦ୍ଧି ଘଟି ୧୦ ଗ୍ରାମ ପିଛା ଦର ୫୧,୮୩୩ ଟଙ୍କା ଛୁଇଁଥିଲା। ସୁନାରେ ଏହା ରେକର୍ଡ ସ୍ତରର ବୃଦ୍ଧି। ଏହା ଅଗଷ୍ଟରେ ଡେଲିଭରିର ଦାମ ବୋଲି ଜଣାପଡିଛି। ସେହିଭଳି ରୁପା ଦରରେ ୩୪୦୦ ଟଙ୍କା ବୃଦ୍ଧି ଘଟିବା ଯୋଗୁ ଦର କିଲୋ ପ୍ରତି ୬୪,୬୧୭ ଟଙ୍କା ଛୁଇଁଛି। ଏହି ସମୟରେ ରୁପା ଦରରେ ୫.୫% ବୃଦ୍ଧି ଘଟିଛି। ଏହା ରୁପାର ୮ ବର୍ଷର ସର୍ବୋଚ୍ଚ ଦର। ଗତ ସପ୍ତାହରେ ଶୁକ୍ରବାର ଦିନ ସୁନା ଦର ୫୦,୮୭୬ ଟଙ୍କା ଥିବା ବେଳେ ରୁପା ଦର ୬୧,୧୭୩ ଟଙ୍କା ରହିଥିଲା। ଗତ ସପ୍ତାହ ତୁଳନାରେ ସୁନା ଦର ୪% ଏବଂ ରୁପା ଦର ୧୫% ବଢିଛି।
ଅନ୍ତର୍ଜାତୀୟ ବଜାରରେ ସୁନା ଦର ପ୍ରତି ଆଉନ୍ସ ପିଛା ୨୦୦୦ ଡଲାର ସ୍ତର ଛୁଇଁଛି। ଆମେରିକା-ଚାଇନା ବିବାଦ, ଦୁର୍ବଳ ଡଲାର ଏବଂ ଅନ୍ତର୍ଜାତୀୟ ବଜାରରେ ନିବେଶକଙ୍କ ସୁନାରେ ନିବେଶ ବଢ଼ିବା ଯୋଗୁ ଦରରେ ବୃଦ୍ଧି ଘଟିଛି। ୨୦୧୧ ସେପ୍ଟେମ୍ବରରେ ସୁନାର ଆଉନ୍ସ ପ୍ରତି ଦର ୧୯୨୦ ଡଲାର ରହିଥିଲା। ବର୍ତ୍ତମାନର ଦର ବୃଦ୍ଧି ରେକର୍ଡ ସ୍ତର ଛୁଇଁଥିବା କୁହାଯାଉଛି। ସୁନା ଦର ବୃଦ୍ଧି ଆଗାମୀ ଦିନରେ ଜାରି ରହିବ ବୋଲି ବଜାର ବିଶେଷଜ୍ଞମାନେ ମତ ପ୍ରକାଶ କରିଛନ୍ତି।
