ନୂଆଦିଲ୍ଲୀ,୨୬।୭: ଭାରତୀୟ ଅର୍ଥ ବ୍ୟବସ୍ଥା ମାନ୍ଦାବସ୍ଥା ଦେଇ ଗତି କରୁଥିବା ବେଳେ କରୋନା ଏହାର ଅଣ୍ଟାକୁ ଭାଙ୍ଗି ଦେଇଛି। ଏହି ସମୟରେ ସୁନା ଦର ଲଗାତର ଭାବେ ବଢୁଥିବା ନଜରକୁ ଆସିଛି। ଏଭଳି ଲଗାତର ସୁନା ଦର ବଢ଼ି ଚାଲିଲେ ଏହା ଶିଳ୍ପ ଉପରେ ଗଭୀର ପ୍ରଭାବ ପକାଇବ ବୋଲି ବଜାର ବିଶେଷଜ୍ଞମାନେ ମତ ପ୍ରକାଶ କରିଛନ୍ତି। ସୁନା ମୂଲ୍ୟ ବଢିବା ଯୋଗୁ ଏହା ଉପଭୋକ୍ତା ଚାହିଦା ଉପରେ ପ୍ରଭାବ ପକାଇବା ଆଶଙ୍କା କରାଯାଉଛି। କୋଭିଡ୍ ଭଳି ସ୍ଥିତିରେ ସୁନା ବର୍ତ୍ତମାନ ନୂଆ ରେକର୍ଡ ସ୍ତରରେ ରହିଛି। ଶୁକ୍ରବାର ମୁମ୍ବାଇରେ ସୁନା ୫୦,୯୧୯ ଟଙ୍କା ଛଇଁଥିବା ବେଳେ ନୂଆଦିଲ୍ଲୀରେ ୫୧,୯୪୬ ଟଙ୍କା ରହିଥିଲା। ସର୍ବଭାରତୀୟ ରତ୍ନ ଏବଂ ଆଭୂଷଣ ପରିଷଦର ଅଧ୍ୟକ୍ଷ ଅନନ୍ତ ପଦ୍ମନାଭନ କହିଛନ୍ତି ଯେ, ଚାହିଦା ପୂର୍ବରୁ ପ୍ରଭାବିତ ହୋଇ ରହିଛି। ଆର୍ଥତ୍କ ମାନ୍ଦାବସ୍ଥା, ରୋଜଗାରକୁ ନେଇ ଅନିଶ୍ଚିତତା, ବର୍ତ୍ତମାନର ଲକ୍ଡାଉନ ଏବଂ କୋଭିଡ୍ ପାଇଁ ସାମାଜିକ ଦୂରତା ଯୋଗୁ ୨୦ରୁ ୨୫% କାରବାର କରି ହେଉଛି।
ବିଶ୍ୱ ବଜାରରେ ସୁନା ୯ ବର୍ଷର ସର୍ବୋଚ୍ଚ ସ୍ତର ୧୯୦୦ ଡଲାର ରହିଛି। ବର୍ତ୍ତମାନ ସୋସିଆଲ ଡିଷ୍ଟାନ୍ସ ଯୋଗୁ ବାହାଘର ବହୁ କମ୍ ଲୋକଙ୍କୁ ନେଇ ହେଉଛି। ଫଳରେ ଲୋକମାନେ ବଡ ଆୟୋଜନ ସହ ବାହାଘର କରୁନାହାନ୍ତି। ଫଳରେ ସୁନା କ୍ରୟ ଉପରେ ଏହାର ପ୍ରଭାବ ପରିଲକ୍ଷିତ ହୋଇଛି। ବର୍ତ୍ତମାନ ଦର ବୃଦ୍ଧି ଘଟୁଥିବାରୁ ଲୋକମାନେ କିଣାକିଣି କରିବାକୁ ଆଗଭର ହେଉନାହାନ୍ତି। ସୁନା ୫୦ ହଜାର ଟପିବା ବଜାରରେ ଏକ ଗୁରୁତ୍ୱପୂର୍ଣ୍ଣ ଘଟଣାକ୍ରମ ବୋଲି ଜଣେ ବିଶେଷଜ୍ଞ କୁହନ୍ତି। ଜାନୁୟାରୀ ୨୦୧୯ ପରଠାରୁ ସୁନା ବର୍ତ୍ତମାନ ସମୟ ଯାଏ ପ୍ରାୟ ୬୦% ବୃଦ୍ଧି ପାଇଛି। ଅଗଷ୍ଟ ୨୦୧୯ ପରଠାରୁ ଏଥିରେ ବିଶେଷ ଭାବେ ବୃଦ୍ଧି ପରିଲକ୍ଷିତ ହୋଇଛି। ଡଲାର ଉଚ୍ଚତମ ସ୍ତରରେ ନ ଥିଲେ ମଧ୍ୟ ସୁନା ସର୍ବକାଳୀନ ରେକର୍ଡ ସ୍ତରରେ ରହିଛି।
୬୫ ହଜାର ସ୍ତର ଛୁଇଁପାରେ
କୋଭିଡ୍ ଯୋଗୁ ସୁନା ବଜାର କ୍ଷତିଗ୍ରସ୍ତ ହୋଇଛି। କମ୍ ମୂଲ୍ୟର ପ୍ରଡକ୍ଟ ଉପରେ ଗ୍ରାହକ ଏବେ ଫୋକସ କରୁଛନ୍ତି। ସୁନା ବର୍ତ୍ତମାନ ନିବେଶର ବିକଳ୍ପ ହୋଇଛି। ଆଗାମୀ ୧୨ ମାସରେ ସୁନା ଆହୁରି ବଢ଼ିବା ନେଇ ଶିଳ୍ପ ସହ ଜଡିତ ଜଣେ ବିଶେଷଜ୍ଞ ମତ ପ୍ରକାଶ କରିଛନ୍ତି। ଆଗାମୀ ଗୋଟିଏ ବର୍ଷରେ ସୁନା ୧୦ ଗ୍ରାମ ପିଛା ୬୫ ହଜାର ଟଙ୍କା ଛୁଇଁପାରେ ବୋଲି ଆକଳନ କରାଯାଇଛି। ଅନ୍ତର୍ଜାତୀୟ ବଜାରରେ ଏହା ୨୫୦୦ ଡଲାର ଛୁଇଁପାରେ ବୋଲି ଆକଳନରେ କୁହାଯାଇଛି।