ଭୁବନେଶ୍ୱର, ୧।୧୦(କ୍ରୀଡ଼ା ପ୍ରତିନିଧି): ଗୁଜରାଟର ବିଭିନ୍ନ ସହରରେ ଚାଲିଥିବା ଜାତୀୟ କ୍ରୀଡ଼ାର ୩୬ତମ ସଂସ୍କରଣରେ ଓଡ଼ିଶା ମହିଳା ରଗ୍ବୀ ଦଳ ଗୌରବ ଆଣିଛି। ଶୁକ୍ରବାର ଅନୁଷ୍ଠିତ ଫାଇନାଲରେ ଓଡ଼ିଶା ୨୨-୦ରେ ମହାରାଷ୍ଟ୍ରକୁ ହରାଇ ସ୍ବର୍ଣ୍ଣ ପଦକ ହାସଲ କରିଛି। ସେମିଫାଇନାଲରେ ବିହାରକୁ ୧୨-୧୦ରେ ହରାଇ ଓଡ଼ିଶା ଫାଇନାଲରେ ପ୍ରବେଶ କରିଥିଲା। ଚାମ୍ପିୟନ ଓଡ଼ିଶା ମହିଳା ରଗବୀ ଦଳରେ ଭାଗ୍ୟଲକ୍ଷ୍ମୀ ବାରିକ, ରଜନୀ ସବର, ମଞ୍ଜୁଲତା ପ୍ରଧାନ, ହୁପି ମାଝି, ତିଳୋତ୍ତମା ସାହୁ, ପାର୍ବତୀ କିସ୍କୁ, ଡୁମୁନି ମାର୍ଣ୍ଡି, ସଂଯୁକ୍ତା ମୁଣ୍ଡା, ଶୁଭଲକ୍ଷ୍ମୀ ବାରିକ, ପାର୍ବତୀ ହଁାସଦା, ତରୁଲତା ନାଏକ ଓ ନିର୍ମାଲ୍ୟା ରାଉତ ସାମିଲ ଥିଲେ। ମାନସ ରଞ୍ଜନ ଜେନା କୋଚ୍, ଉପେନ୍ଦ୍ର କୁମାର ମହାନ୍ତି ମ୍ୟାନେଜର ଓ ସୌମ୍ୟଶ୍ରୀ ମିଶ୍ର ଫିଜିଓ ଦାୟିତ୍ୱ ନିର୍ବାହ କରିଥିଲେ। ମହିଳା ବିଭାଗ ବ୍ରୋଞ୍ଜ ପଦକ ମୁକାବିଲାରେ ବିହାର ୧୪-୫ରେ ଦିଲ୍ଲୀକୁ ପରାସ୍ତ କରିଛି। ପୁରୁଷ ବିଭାଗ ଫାଇନାଲରେ ହରିୟାଣା ୧୯-୭ରେ ମହାରାଷ୍ଟ୍ରକୁ ହରାଇ ସ୍ବର୍ଣ୍ଣ ପଦକ ଅର୍ଜନ କରିଛି। ପଶ୍ଚିମବଙ୍ଗକୁ ୨୯-୨୪ରେ ପରାସ୍ତ କରି ଦିଲ୍ଲୀ ବ୍ରୋଞ୍ଜ ପଦକ ହାସଲ କରିଛି। ଓଡ଼ିଶା ପୁରୁଷ ରଗ୍ବୀ ଦଳ ୭ମ ସ୍ଥାନରେ ସନ୍ତୁଷ୍ଟ ରହିଛି। ୭-୮ସ୍ଥାନ ପାଇଁ ଅନୁଷ୍ଠିତ ପ୍ଲେସିଂ ମ୍ୟାଚରେ ଓଡ଼ିଶା ୨୯-୧୨ରେ ଗୁଜରାଟକୁ ପରାସ୍ତ କରିଥିଲା।
