ଭୁବନେଶ୍ୱର,୧୬।୪: କ୍ରମାଗତ ଭାବେ ଘରୋଇ ବଜାରରେ ସୁନା ଦର ବୃଦ୍ଧି ପାଇ ଚାଲିଛି। ଏପରିକି ଗତ ଦୁଇ ସପ୍ତାହ ମଧ୍ୟରେ ଭୁବନେଶ୍ୱରରେ ସୁନା ଦର ୨୨କ୍ୟାରେଟ ଉପରେ ପ୍ରାୟ ୩୦୦୦ ଟଙ୍କା ଏବଂ ୨୪ କ୍ୟାରେଟ ଉପରେ ପ୍ରାୟ ୪୦୦୦ ଟଙ୍କା ବଢ଼ିଛି। ଉଲ୍ଲେଖଯୋଗ୍ୟ, ସୋମବାର ଭୁବନେଶ୍ୱରରେ ସୁନା ଦର ପ୍ରତି ୧୦ ଗ୍ରାମ୍ ପିଛା (୨୨କ୍ୟାରେଟ ମୂଲ୍ୟ) ୬୭,୦୫୦ଟଙ୍କା ଥିଲାବେଳେ ୨୪କ୍ୟାରେଟ ସୁନା ମୂଲ୍ୟ ୭୩,୧୪୫ ଟଙ୍କାରେ କାରବାର ହେଉଛି ବୋଲି ଘରୋଇ ବଜାରର ଅଗ୍ରଣୀ ସୁନା ବ୍ୟବସାୟୀ ଓ ଅଳଙ୍କାର ପ୍ରତିଷ୍ଠାନଗୁଡ଼ିକ ପକ୍ଷରୁ ବିସ୍ତୃତ ଭାବେ ସୂଚନା ଦିଆଯାଇଛି। ଅପରପକ୍ଷରେ ୨୦୨୪ ଏପ୍ରିଲ ପ୍ରଥମ ସପ୍ତାହରେ ସୁନା ଦର ପ୍ରତି ୧୦ ଗ୍ରାମ୍ ପିଛା (୨୨କ୍ୟାରେଟ ମୂଲ୍ୟ) ୬୪,୧୦୦ଟଙ୍କା ଥିଲାବେଳେ ୨୪ କ୍ୟାରେଟ ସୁନା ମୂଲ୍ୟ ୬୯,୯୨୭ ଟଙ୍କା ଥିଲା। ସେହିଭଳି ନୂଆଦିଲ୍ଲୀରେ ସୁନା ଦର ପ୍ରତି ୧୦ଗ୍ରାମ୍ ପିଛା (୨୨କ୍ୟାରେଟ ମୂଲ୍ୟ) ୬୭,୨୦୦ଟଙ୍କା ଥିଲାବେଳେ ୨୪ କ୍ୟାରେଟ ସୁନା ମୂଲ୍ୟ ୭୩,୩୦୦ଟଙ୍କାରେ ପହଞ୍ଚତ୍ଛି। ଏପରିକି ଦେଶର ପ୍ରମୁଖ ମହାନଗର କୋଲକାତା, ମୁମ୍ବାଇ ଏବଂ ଚେନ୍ନାଇରେ ସୁନା ଦର ପ୍ରତି ୧୦ ଗ୍ରାମ୍ ପିଛା (୨୨କ୍ୟାରେଟ ମୂଲ୍ୟ) ୬୭,୦୫୦ଟଙ୍କା, ୬୭,୦୫୦ ଟଙ୍କା ଏବଂ ୬୭,୯୦୦ ଟଙ୍କା ଥିଲାବେଳେ ଉପରୋକ୍ତ ମହାନଗରଗୁଡ଼ିକରେ ୨୪କ୍ୟାରେଟ ସୁନା ମୂଲ୍ୟ ୭୩,୧୫୦ଟଙ୍କା, ୭୩,୧୫୦ ଟଙ୍କା ଏବଂ ୭୪,୦୭୦ ଟଙ୍କାରେ କାରବାର ହେଉଛି ବୋଲି ଜାତୀୟ ଗଣମାଧ୍ୟମରେ ଉଲ୍ଲେଖ କରାଯାଇଛି। ଅପରପକ୍ଷରେ ଆଗକୁ ବିଭାଘର ଓ ଅନ୍ୟାନ୍ୟ ଶୁଭକାର୍ଯ୍ୟ ଥିବାରୁ ଉଭୟ ଗ୍ରାହକ ଓ ବ୍ୟବସାୟୀମାନେ ଆଶା ଆଶଙ୍କା ମଧ୍ୟରେ ରହିଛନ୍ତି। ସେହିଭଳି ଅନ୍ତଃରାଷ୍ଟ୍ରୀୟ ବଜାରରେ ଦରବୃଦ୍ଧି ଓ ଭୂ-ରାଜନୈତିକ ପରିସ୍ଥିତି ସହ ଯୁଦ୍ଧ ଜାରି ରହିଥିବାରୁ ଆଗକୁ ମଧ୍ୟ ଦରଦାମ୍ ବୃଦ୍ଧି ଘଟିପାରେ ବୋଲି ବଜାର ବିଶେଷଜ୍ଞମାନେ ଆକଳନ କରୁଛନ୍ତି।