ନୂଆଦିଲ୍ଲୀ/ଭୁବନେଶ୍ୱର: ଚଳିତ ବର୍ଷ କରୋନାଜନିତ ଲକ୍ଡାଉନ ପାଇଁ ସୁନା ଗହଣା ବଜାରରେ ପ୍ରଭାବ ଜାରି ରହିଛି। ଶୁକ୍ରବାର ଧନତେରସ ରହିଥିବାରୁ ସୁନା ବଜାରରେ ଚମକ ଫେରିଛି। ସାରା ଦେଶରେ ଧନତେରସରେ ବିକ୍ରି ପୂର୍ବ ମାସଗୁଡିକ ତୁଳନାରେ ଉନ୍ନତ ରହିଛି। ଆଗାମୀ ଦିନରେ କାରବାର ସମ୍ପୂର୍ଣ୍ଣ ଟ୍ରାକ୍କୁ ଫେରିବ ବୋଲି ସୁନା ଶିଳ୍ପ ସହ ଜଡିତ ବ୍ୟକ୍ତି ବିଶେଷ ସୂଚନା ଦେଇଛନ୍ତି। ବଜାରରେ କଟକଣା କୋହଳ ହୋଇଥିବା ବେଳେ ଶୋ’ରୁମରେ ବିଭିନ୍ନ ସାମାଜିକ ଦୂରତ୍ୱ ନିୟମ ପାଳନ ହେଉଛି। ସୁନା କାରବାର ପ୍ରାୟ ୮୦% ଟ୍ରାକ୍କୁ ଫେରିଲାଣି। ଆଗାମୀ ଦିନରେ ସମ୍ପୂର୍ଣ୍ଣ ଠିକ୍ ହେବା ନେଇ ଶିଳ୍ପ ପକ୍ଷରୁ ଆଶା ରଖାଯାଇଛି। ଗ୍ରାହକଙ୍କ ବଜାରକୁ ନେଇ ରହିଥିବା ମନୋଭାବରେ ମଧ୍ୟ ପରିବର୍ତ୍ତନ ଆସିଛି। ଫଳରେ ଧନତେରସ ବିକ୍ରି ଉନ୍ନତ ସ୍ଥିତିକୁ ଫେରିଥିବା ଜଣାପଡିଛି।
ଓଡ଼ିଶାର ବିଭିନ୍ନ ପ୍ରାନ୍ତ କଥା ବିଚାରକୁ ନେଲେ ଭୁବନେଶ୍ୱର ଏବଂ କଟକରେ ପ୍ରାୟ ସୁନା କାରବାର ଅଧିକ ରହିଥାଏ। ଉଭୟ ସହରରେ ଗ୍ରାହକ ଶୋ’ରୁମ୍ ଆସି କିଣାକିଣି କରିଥିବା ନଜରକୁ ଆସିଛି। ଏହି ପରିପ୍ରେକ୍ଷୀରେ ରାଜ୍ୟର ପ୍ରମୁଖ ଜୁଏଲର୍ସ ଖିମଜୀର ଡିଜିଏମ୍ କିଶୋର ଓ୍ବାଡେର କୁହନ୍ତି, କରୋନା ପାଇଁ ଗତ ବର୍ଷ ଭଳି କାରବାର ନ ହେଲେ ମଧ୍ୟ ପୂର୍ବ ମାସଗୁଡିକ ତୁଳନାରେ କାରବାର ବେଶ୍ ଉନ୍ନତ ରହିଛି। ଶୋ’ରୁମରେ କରୋନାକୁ ଧ୍ୟାନରେ ରଖି ବ୍ୟାପକ ବ୍ୟବସ୍ଥା କରାଯାଇଛି। ପ୍ରବେଶ ପଥରେ ସାନିଟାଇଜେଶନ, ସ୍ବତନ୍ତ୍ର ଧାଡି ଜରିଆରେ ବିଭିନ୍ନ କାଉଣ୍ଟରକୁ ଗ୍ରାହକଙ୍କୁ ପଠାଯାଉଛି। ଶୋ’ରୁମ୍ ପକ୍ଷରୁ ପ୍ରଦାନ କରାଯାଉଥିବା ଅଫର ୨୨ ନଭେମ୍ବର ଯାଏ ରହିବ। ମହାମାରୀକୁ ଧ୍ୟାନରେ ରଖି ଗ୍ରାହକ ଯେଭଳି ଭାବେ ଅଧିକ ସମୟ ଅଫରର ଲାଭ ନେଇପାରିବେ ତାକୁ ବିଚାରକୁ ନିଆଯାଇଛି। ସୁନା ଅଳଙ୍କାର ଉପରେ ୬.୩% ରିହାତି, ରୁପାର ଗଢା ମୂଲ୍ୟ ଉପରେ ଫ୍ଲାଟ ୫୦% ଏବଂ ହୀରା ଉପରେ ଫ୍ଲାଟ ୨୦% ରିହାତି ଦିଆଯାଉଛି। କମିଶନରେଟ ପୋଲିସ ଏବଂ ବିଏମ୍ସିବିଡିଏର ନିୟମାବଳୀକୁ ଦୃଢତାର ସହ ପାଳନ କରାଯାଇଛି। ଶୋ’ରୁମ୍ ଭିତରେ ଭିଡ ନ ହେବା ବାହାରେ ଲୋକଙ୍କ ଲାଗି ପ୍ରତୀକ୍ଷା କରିବା ବ୍ୟବସ୍ଥା ହୋଇଛି।
କଲ୍ୟାଣ ଜୁଏଲର୍ସର ଷ୍ଟୋର ମ୍ୟାନେଜର ନିଶାନ୍ତ କୁମାର କହିଛନ୍ତି, ମହାମାରୀକୁ ଆଖି ଆଗରେ ରଖି ପ୍ରଥମେ ପ୍ରବେଶ ପଥକୁ ମୁକ୍ତ କରାଯାଇଛି। ସାନିଟାଇଜିଂ ଏବଂ ବ୍ୟାପକ ସାମାଜିକ ଦୂରତ୍ୱ ନିୟମକୁ ପାଳନ କରାଯାଉଛି। ଶୋ’ରୁମ୍ରେ ନିରାପତ୍ତା ବ୍ୟବସ୍ଥା ବଢାଯାଇଛି। ଗ୍ରାହକଙ୍କ ଲାଗି ଅନ୍ୟ ସୁବିଧା ମଧ୍ୟ ରହିଛି। ଧନ୍ତେରସ ଅଫର ୧୬ ତାରିଖ ପର୍ଯ୍ୟନ୍ତ ଉପଲବ୍ଧ ରହିବ। ହୀରା ଉପରେ ୨୫%, ସୁନାଗହଣା ଗଢା ମୂଲ୍ୟ ଉପରେ ୨୦ରୁ ୫୦% ପର୍ଯ୍ୟନ୍ତ ରିହାତି, ସିଲ୍ଭର ଉପରେ ସମ୍ପୂର୍ଣ୍ଣ ଗଢାମୂଲ୍ୟ ଛାଡ ସୁବିଧା ରହିଛି। ଅପରପକ୍ଷରେ ଅରୁନ୍ଧତୀର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ, ବଜାରରେ ମାନ୍ଦାବସ୍ଥା ଲାଗି ରହିଥିବାରୁ ଚଳିତ ବର୍ଷ ଆଶା ମୁତାବକ ବେପାର ସୀମା ଛୁଇଁନାହିଁ। ଗ୍ରାହକଙ୍କୁ ଶୋ’ରୁମରେ ସେବା ସହ ଅନ୍ଲାଇନରେ କ୍ରୟ କଲେ ହୋମ୍ ଡେଲିଭରି ସୁବିଧା ଦିଆଯାଉଛି। ପାର୍ବଣ ଅଫର ସହ ସ୍ବତନ୍ତ୍ର ଉପହାର ପ୍ରଦାନ କରାଯାଉଛି। ନୂଆ ଅମେୟା କଲେକ୍ସନ ସହ ଅନେକ ଡିଜାଇନ ଗହଣା ପାର୍ବଣ ପାଇଁ ପ୍ରସ୍ତୁତ କରାଯାଇଛି। ଡିଜାଇନଗୁଡିକ ଗ୍ରାହକଙ୍କ ଦ୍ୱାରା ପସନ୍ଦ ଆସୁଥିବା ନଜରକୁ ଆସୁଛି ବୋଲି କୁହାଯାଉଛି। ଭିଡକୁ ନଜରରେ ରଖି ଶୋ’ରୁମ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି।
ଏହି ଅବସରରେ ତନିସ୍କର ଏବିଏମ୍ ପ୍ରଖର ପଲାଓ୍ବତ କହିଛନ୍ତି, ସରକାରଙ୍କ ଗାଇଡ୍ଲାଇନ ପାଳନ ସହ ଗ୍ରାହକଙ୍କ ସୁରକ୍ଷାକୁ ପ୍ରାଥମିକତା ଦିଆଯାଉଛି। ସାମାଜିକ ଦୂରତ୍ୱକୁ ଧ୍ୟାନରେ ରଖି ଶୋ’ରୁମ ବାହାରେ ସ୍ବତନ୍ତ୍ର ଷ୍ଟଲ ବ୍ୟବସ୍ଥା କରାଯାଇଛି। ଧନତେରସ୍ରେ ଗ୍ରାହକଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଛି। ଚାହିଦାକୁ ନଜରରେ ରଖି ସୁନା ଅଳଙ୍କାର ଗଢାମୂଲ୍ୟ ଉପରେ ୨୫% ପର୍ଯ୍ୟନ୍ତ, ହୀରା ଗହଣାର ମୋଟ୍ ମୂଲ୍ୟ ଉପରେ ୨୫% ପର୍ଯ୍ୟନ୍ତ ରିହାତି ଦିଆଯାଉଛି। ଗ୍ରାହକଙ୍କୁ ହୋମ୍ ଡେଲିଭରି ସହ କମ୍ପାନୀର ଅନ୍ଲାଇନ ପ୍ଲାଟଫର୍ମରେ କ୍ରୟ ସୁବିଧା ରହିଛି। ପାର୍ବଣ ପାଇଁ ଡେବିଟ୍, କ୍ରେଡିଟ କାର୍ଡରେ କ୍ରୟ ସୁବିଧା ଅନ୍ୟାନ୍ୟ ରିହାତି ଉପଲବ୍ଧ ରହିଥିବା ସେ ସୂଚନା ଦେଇଛନ୍ତି।
ଚଳିତ ବର୍ଷ ବଜାର ପ୍ରଭାବିତ ହୋଇ ରହିଥିବାରୁ ଏହାକୁ ନେଇ ଜୁଏଲର୍ସ ବ୍ୟାପକ ବ୍ୟବସ୍ଥା କରିଛନ୍ତି। ଗ୍ରାହକଙ୍କୁ ଯେଭଳି ଭାବେ କୌଣସି ଅସୁବିଧା ନ ହୁଏ ତାକୁ ଧ୍ୟାନରେ ରଖାଯାଇଛି। ଶୋ’ରୁମ ଆକର୍ଷଣୀୟ ସୁବିଧା ସୁଯୋଗ ପ୍ରଦାନ କରୁଛନ୍ତି। ଚଳିତ ବର୍ଷ ହାଲକା ଗହଣା ଉପରେ ଗ୍ରାହକଙ୍କ ନଜର ରହିଛି। ଏହା ଟ୍ରେଣ୍ଡରେ ରହିଥିବା ବେଳେ ସେହି ଅନୁସାରେ ଡିଜାଇନ ଶୋ’ରୁମଗୁଡିକ ପ୍ରଦାନ କରୁଛନ୍ତି। ଧନତେରସ ଏବଂ ଦିଓ୍ବାଲି ଉପଲକ୍ଷେ ପୂର୍ବ ମାସଗୁଡିକ ତୁଳନାରେ ଚାହିଦାରେ ବେଶ୍ ଉନ୍ନତି ହେବ ବୋଲି ଜୁଏଲେରୀ ଶିଳ୍ପ ପକ୍ଷରୁ ଆଶା କରାଯାଉଛି। ଚଳିତ ବର୍ଷ କୃଷି କାର୍ଯ୍ୟ ଉନ୍ନତ ହୋଇଥିବାରୁ ଏହା ଚାହିଦା ଉପରେ ଉନ୍ନତ ପ୍ରଭାବ ପକାଇବା ବୋଲି ଆଶା କରାଯାଇଛି। ଚଳିତ ବର୍ଷ ଦିଓ୍ବାଲି ବିକ୍ରି ଭଲ ରହିବ ବୋଲି ବିଶେଷଜ୍ଞ କହିଛନ୍ତି। କାରଣ ପାର୍ବଣରେ ବଜାରକୁ ଭଲ ରେସପନ୍ସ ମିଳିଛି। କରୋନା ପାଇଁ ଜୁଏଲର୍ସ ଅନ୍ଲାଇନ କନସଲଟେଶନ ଏବଂ ଅନ୍ଲାଇନ କ୍ରୟ ବ୍ୟବସ୍ଥା କରିଛନ୍ତି। ଏହା ମୋଟାମୋଟି ବିକ୍ରି ଦିଗରେ ସହାୟକ ହେବ ବୋଲି କୁହାଯାଉଛି। ସୁନାକୁ ଏକ ଆସେଟ୍ କ୍ଲାସ ଭାବେ ବିଚାର କରାଯାଉଥିବା ବେଳେ ଏହି ଧାତୁ ଉପରେ ଲୋକଙ୍କର ଭରସା ସବୁ ବେଳେ ରହିଆସିଛି। ପାର୍ବଣ ଲାଗି କିଛି ଗ୍ରାହକ ଆଡଭାନ୍ସ ବୁକିଂ କରିଥିବା ମଧ୍ୟ ନଜରକୁ ଆସିଛି। ହାଲକା ଗହଣା ବାଦ୍ ଲକଜୁରି ସେଗମେଣ୍ଟ ଉପରେ ମଧ୍ୟ ଗ୍ରାହକ ଫୋକସ କରୁଛନ୍ତି। ଗତ ଦିଓ୍ବାଲି ତୁଳନାରେ ବର୍ତ୍ତମାନ ସୁଦ୍ଧା ସୁନାଦର ପ୍ରାୟ ୨୫% ବଢିଛି। ଗ୍ରାହକଙ୍କୁ ଆକୃଷ୍ଟ କରିବା ଲାଗି ଶୋ’ରୁମଗୁଡିକ ଭାଉଚର, କ୍ୟାଶବ୍ୟାକ ସୁବିଧା ଦେଉଛନ୍ତି। ସେହିଭଳି ହୀରା ଗହଣା ଉପରେ ଫ୍ଲାଟ ରିହାତି, ସୁନା ଏବଂ ରୁପା ଗହଣା ମୂଲ୍ୟ ଉପରେ ରିହାତି, ଗଢା ମୂଲ୍ୟ ମୁଲ୍ୟ ଉପରେ ରିହାତି, ଧନତେରସରେ ସ୍ବତନ୍ତ୍ର ଅଫର, ପ୍ରଡକ୍ଟ କ୍ରୟରେ ଉପହାର, ଗୋଲ୍ଡ କଏନ, ସିଲଭର କଏନ ଏବଂ ଅନ୍ୟ ଉପହାର ପ୍ରଦାନ କରାଯାଉଥିବା ଦେଖାଯାଉଛି।