ଟୋକିଓ ,୪।୯: ଟୋକିଓ ପାରାଲିମ୍ପିକ ଗେମ୍ସରେ ଶନିବାର ଭାରତକୁ ଶୁଟିଂରେ ସ୍ବର୍ଣ୍ଣ ଓ ରୌପ୍ୟ ପଦକ ମିଳିଛି। ଶୁଟର ମନୀଷ ନରୱାଲ ଭାରତ ପାଇଁ ସ୍ବର୍ଣ୍ଣ ପଦକ ଆଣିଥିବାବେଳେ ସିଂହରାଜ ରୌପ୍ୟ ପଦକ ଜିତିବାରେ ସଫଳ ହୋଇଛନ୍ତି। ଏହି ଦୁଇ ଶୁଟର ୫୦ ମିଟର ଏୟାର ପିସ୍ତଲ ଇଭେଣ୍ଟ ଫାଇନାଲରେ ଭାରତ ପାଇଁ ଦୁଇଟି ପଦକ ଜିଣିବାର ଗୌରବ ଅର୍ଜନ କରିଛନ୍ତି। ମନୀଷ ୨୧୮.୨ ସ୍କୋର ହାସଲ କରି ପ୍ରଥମ ସ୍ଥାନରେ ରହିଥିବାବେଳେ ସିଂହରାଜ ୨୧୬.୭ ସ୍କୋର କରି ଦ୍ୱିତୀୟ ସ୍ଥାନରେ ରହିଛନ୍ତି। ସେହିପରି ୧୯୬.୮ ସ୍କୋର କରି ରୁଷିଆର ସର୍ଗେଇ ମାଲିଶଓ୍ବେ ତୃତୀୟ ସ୍ଥାନରେ ରହିଛନ୍ତି।
ହରିୟାଣାର କାଥୁରା ଗାଁର ବାସିନ୍ଦା ମନୀଷ ନରୱାଲ ମାତ୍ର ୧୯ ବର୍ଷ ବୟସରେ ଏହି ଇତିହାସ ସୃଷ୍ଟି କରିଛନ୍ତି। ପ୍ରଥମ ଦୁଇଟି ଶଟରେ ମନୀଷ ନରୱାଲ ମାତ୍ର ୧୭.୮ ସ୍କୋର କରିଥିଲେ। କିନ୍ତୁ ଏହା ପରେ ନରୱାଲ ବଡ଼ ପ୍ରତ୍ୟାବର୍ତ୍ତନ କରିଥିଲେ। ପାଞ୍ଚଟି ଶଟ ପରେ ନରୱାଲ ଏହାକୁ ଶ୍ରେଷ୍ଠ ତିନିରେ ପହଞ୍ଚାଇବାରେ ସଫଳ ହୋଇଥିଲେ ଏବଂ ପାଞ୍ଚଟି ଶଟ ପରେ ତାଙ୍କ ସ୍କୋର ୪୫.୪ ରହିଥିଲା। ୧୨ ଟି ଶଟ ପରେ ମନୀଷ ୧୦୪.୩ ସ୍କୋର ସହିତ ପାଞ୍ଚ ନମ୍ବରରେ ରହିଥିଲେ।
ଏଥି ସହିତ ସିଂହରାଜ କ୍ରମାଗତ ଭାବରେ ଭଲ ପ୍ରଦର୍ଶନ କରୁଥିଲେ। ୧୪ ତମ ଶଟ ପରେ ସିଂହରାଜ ଚତୁର୍ଥ ନମ୍ବରରେ ରହିଥିଲେ। କିନ୍ତୁ ୧୫ ତମ ଶଟ ପରେ ମନୀଷ ନରୱାଲ ୧୩୩.୪ ସ୍କୋର କରି ତୃତୀୟ ସ୍ଥାନରେ ପହଞ୍ଚିଥିଲେ। ୧୬ ତମ ଶଟ ପରେ ସିଂହରାଜ ମଧ୍ୟ ଏହାକୁ ଶ୍ରେଷ୍ଠ ତିନିରେ ପହଞ୍ଚାଇବାରେ ସଫଳ ହୋଇଥିଲେ। ୨୦ ତମ ଶଟ ପରେ ଭାରତ ପାଇଁ ଦୁଇଟି ପଦକ ନିଶ୍ଚିତ ହୋଇଥିଲା। ଚାଇନାର ଖେଳାଳିଙ୍କୁ ୭.୫ ସ୍କୋର ସହ ଖେଳରୁ ବାହାରିବାକୁ ପଡିଥିଲା। ଶେଷ ଶଟରେ ମନୀଷ ନରୱାଲ ଭାରତ ପାଇଁ ସ୍ବର୍ଣ୍ଣ ଜିତିଥିବାବେଳେ ସିଂହରାଜଙ୍କୁ ରୌପ୍ୟ ପଦକ ମିଳିଥିଲା।
ଶୁୁଟିଂରେ ଦୁଇଟି ପଦକ ସହିତ ଟୋକିଓ ପାରାଲିମ୍ପିକ ଗେମ୍ସରେ ଭାରତର ପଦକ ସଂଖ୍ୟା ୧୫ରେ ପହଞ୍ଚିଛି।
