ଭୁବନ,୧୩।୯(ଡି.ଏନ୍.ଏ.):ଶାରଦୀୟ ଦୁର୍ଗାପୂଜା ପାଇଁ ଚଳଚଞ୍ଚଳ ହୋଇଉଠିଛି କଳାସଂସ୍କୃତିର ସହର ଭୁବନ। ପ୍ରତିଯୋଗିତାପୂର୍ଣ୍ଣ ମହୋତ୍ସବରେ ୧୩ ମଣ୍ଡପ ସାମିଲ ହୋଇଥିବାବେଳେ ମୂର୍ତ୍ତି, ମେଢ଼, ସାଜସଜ୍ଜାକୁ ନେଇ ଆରମ୍ଭ ହୋଇଛି ପ୍ରତିଦ୍ୱନ୍ଦ୍ୱିତା। ଏଥିରେ ନିଜକୁ ସାମିଲ କରିଛି ପୋଥାଳ ସାହି ପୂଜା କମିଟି। ଚଳିତବର୍ଷ ପୂଜା ପ୍ରତିଷ୍ଠାନର ୧୨ଶ ବର୍ଷ ପୂର୍ତ୍ତି ଅବସରରେ ସ୍ବତନ୍ତ୍ର କାର୍ଯ୍ୟକ୍ରମର ଆୟୋଜନ କରାଯିବ। ତେବେ ମୁଖ୍ୟ ଆକର୍ଷଣ ସାଜିବ ପଞ୍ଜାବ ସ୍ବର୍ଣ୍ଣ ମନ୍ଦିର ଆକୃତିର ତୋରଣ। ମା’ଙ୍କ ଆବାହନକୁ ହାତଗଣତି ଦିନ ବାକି ଥିବାବେଳେ ସମସ୍ତ କାର୍ଯ୍ୟକ୍ରମ ନିର୍ଦ୍ଧାରିତ ସମୟ ମଧ୍ୟରେ ଶେଷ କରିବାକୁ ଦିନରାତି ଏକ କରିଦେଇଛନ୍ତି କମିଟି ସଦସ୍ୟ।
ଦଶହରା ବଳଦ ଯାତ୍ରାରେ ଦୀର୍ଘବର୍ଷ ଧରି ପ୍ରମୁଖ ଭୂମିକା ଗ୍ରହଣ କରି ଆସିଥିବା ପୋଥାଳ ସାହି ୧୨ବର୍ଷ ତଳେ ସାର୍ବଜନୀନ ଦୁର୍ଗାପୂଜାରେ ସାମିଲ ହୋଇଥିଲା। ପ୍ରଥମ ବର୍ଷ ୧ ଲକ୍ଷ ୫୨ ହଜାର ଟଙ୍କା ବ୍ୟୟରେ ପୂଜାର ଆୟୋଜନ କରାଯାଇଥିଲା। ଏବେ ଖର୍ଚ୍ଚ ବୃଦ୍ଧି ପାଇ ସାଢ଼େ ୪ ଲକ୍ଷ ଟଙ୍କାରେ ପହଞ୍ଚତ୍ଛି। ଏହି ଅର୍ଥରେ ପୂଜାଠାରୁ ଆରମ୍ଭ କରି ଭସାଣି ପର୍ଯ୍ୟନ୍ତ ସମସ୍ତ କାର୍ଯ୍ୟକ୍ରମ କରାଯିବ। ମା’ ଦଶଭୁଜାଙ୍କ ମୂର୍ତ୍ତି ନିର୍ମାଣ ପାଇଁ କଟକ ଜିଲା ଟାଙ୍ଗୀର ଶିଳ୍ପୀ ନିୟୋଜିତ ହୋଇଛନ୍ତି। ସେହିପରି କଟକ ଏବଂ ସାଲେପୁର ଅଞ୍ଚଳର କାରିଗର ସ୍ବର୍ଣ୍ଣମନ୍ଦିର ଢାଞ୍ଚାରେ ନିର୍ମାଣ ହେବାକୁ ଥିବା ତୋରଣ କାମ ଆରମ୍ଭ କରିସାରିଲେଣି। ମା’ଙ୍କ ଆବାହନଠାରୁ ଆରମ୍ଭ କରି ବିସର୍ଜନ ଯାଏ ଦୈନିକ ଶ୍ରଦ୍ଧାଳୁଙ୍କ ଲାଗି ପ୍ରସାଦ ସେବନ ବ୍ୟବସ୍ଥା କରାଯିବ। ଭସାଣି ଶୋଭାଯାତ୍ରାକୁ ସ୍ବତନ୍ତ୍ର କରିବା ଲାଗି କୋଲକାତାରୁ ମହିଳା ସଂକୀର୍ତ୍ତନ ମଣ୍ଡଳୀ ଓ ବାଜା ସାମିଲ କରାଯିବାକୁ ନିଷ୍ପତ୍ତି ନିଆଯାଇଛି।
