ଭୁବନେଶ୍ୱର, ୯।୧୨(ତପନ ସ୍ବାଇଁ): ଥାଇଲାଣ୍ଡର ନାଖୋନ ରାଚାସୀମାରେ ଓ୍ବାଲର୍ଡ ଆବିଲିଟି ସ୍ପୋର୍ଟ ଗେମ୍ସ ଶୁକ୍ରବାର ଉଦ୍ଯାପିତ ହୋଇଛି। ଏଥିରେ ଭାରତ ୩୬ ସ୍ବର୍ଣ୍ଣ, ୩୨ ରୌପ୍ୟ ଓ ୩୫ ବ୍ରୋଞ୍ଜ ସହ ମୋଟ ୧୦୩ଟି ପଦକ ହାସଲ କରି ଦ୍ୱିତୀୟ ସ୍ଥାନରେ ରହିଛି। ଓଡ଼ିଶାର ୧୩ ଖେଳାଳି ଭାରତ ପକ୍ଷରୁ ପ୍ରତିନିଧିତ୍ୱ କରିଥିଲେ। ଓଡ଼ିଶା ପ୍ରତିଯୋଗୀମାନେ ୨ ସ୍ବର୍ଣ୍ଣ, ୩ ରୌପ୍ୟ ଓ ୪ ବ୍ରୋଞ୍ଜ ସହ ୯ଟି ପଦକ ହାସଲ କରିଛନ୍ତି। ଓଡ଼ିଶାର ଦୀପ୍ ରଞ୍ଜନ ବିଶୋଇ ବ୍ୟାଡ୍ମିଣ୍ଟନ ଡବଲ୍ସରେ ସ୍ବର୍ଣ୍ଣ ଏବଂ ସିଙ୍ଗଲ୍ସରେ ବ୍ରୋଞ୍ଜ ପଦକ ଜିତିଛନ୍ତି। ଡବଲ୍ସ ଫାଇନାଲରେ ସେ ଶରଦ ଚନ୍ଦ୍ର ଯୋଶୀଙ୍କୁ ପାର୍ଟନର କରି ଫାଇନାଲରେ ନିଜ ଦେଶର ପ୍ରେମ୍ କୁମାର ଇଝିଲ ଓ ଦୀନେଶ ରାଜାଇଆଙ୍କୁ ୨୧-୧୧, ୨୧-୧୨ରେ ପରାସ୍ତ କରିଛନ୍ତି। ମାତ୍ର ସିଙ୍ଗଲ୍ସ ସେମିଫାଇନାଲରେ ଇଣ୍ଡୋନେସିଆର ହକମତ ରାନଦାନିଙ୍କଠାରୁ ୧୩-୨୧, ୨୧-୧୧ରେ ହାରିଯିବାରୁ ବ୍ରୋଞ୍ଜ୍ରେ ସନ୍ତୁଷ୍ଟ ହେବାକୁ ପଡ଼ିଛି। ସେହିପରି ଅନ୍ୟତମ ଓଡ଼ିଆ ଖେଳାଳି ଶୁଭ୍ରଜିତ୍ ମହାରଣା ଡବଲ୍ସରେ ଜଗଦୀଶ ଦିଲିଙ୍କୁ ପାର୍ଟନର କରି ସେମିଫାଇନାଲରେ ଅନ୍ୟତମ ଭାରତୀୟ ଯୋଡ଼ି ପ୍ରେମ୍ କୁମାର ଇଝିଲ ଓ ଦୀନେଶ ରାଜାଇଆଙ୍କଠାରୁ ୧୬-୨୧, ୨୧-୧୮, ୧୨-୨୧ରେ ପରାସ୍ତ ହେଇଛନ୍ତି। ଫଳରେ ସେ ବ୍ରୋଞ୍ଜ୍ ପଦକରେ ସନ୍ତୁଷ୍ଟ ହୋଇଛନ୍ତି। ଓଡ଼ିଶାର ଅନ୍ୟ ଦୁଇ ଖେଳାଳି ଦିଲେଶ୍ୱର ରାଓ ଓ ନୁରୁଲ ହୁସେନ ଖାନ୍ ଖାଲିହାତରେ ଫେରିଛନ୍ତି।
ଆଥ୍ଲେଟିକ୍ସରେ ସୁଚିତ୍ରା ପରିଡ଼ା ମହିଳା ଶଟ୍ପୁଟ୍ରେ ରୌପ୍ୟ ପଦକ ଜିତିଛନ୍ତି। ପୂର୍ବରୁ ଜାଭେଲିନ୍ରେ ସ୍ବର୍ଣ୍ଣ ପଦକ ଜିତିସାରିଥିବା ସୁଚିତ୍ରା ମହିଳା ଶଟ୍ପୁଟ୍ର ଏଫ୍ ୩୪/୫୩/୫୪/୫୬ ବର୍ଗର ଫାଇନାଲରେ ୫.୨୩ ମିଟର ଥ୍ରୋ କରି ଦ୍ୱିତୀୟ ସ୍ଥାନ ଅଧିକାର କରିଛନ୍ତି। ସେହିପରି ଜୟନ୍ତୀ ବେହେରା ୪୦୦ ମିଟରରେ ରୌପ୍ୟ ପଦକ ହାସଲ କରିଛନ୍ତି।
ସେ ଟି-୪୭ ବର୍ଗର ୪୦୦ମି.କୁ ୧:୦୦.୪୮ ସେକେଣ୍ଡରେ ଅତିକ୍ରମ କରି ଦ୍ୱିତୀୟ ସ୍ଥାନ ହାସଲ କରିଛନ୍ତି। ପୂର୍ବରୁ ସେ ୧୦୦ ଓ ୨୦୦ମି.ରେ ବ୍ରୋଞ୍ଜ୍ ପଦକ ଜିତିଥିଲେ। ୪୦୦ ମିଟରରେ ଥାଇଲାଣ୍ଡର ଶଶିରାଓ୍ବନ ଇନ୍ଥାଚୋଟ୍ ୫୯.୫୮ ସେକେଣ୍ଡ ସମୟ ନେଇ ସ୍ବର୍ଣ୍ଣ ପଦକ ଅର୍ଜନ କରିଛନ୍ତି। ହୁଇଲ ଚେୟାର ଫେନ୍ସିଂ ଇଭେଣ୍ଟରେ ଏହି ୭ ଖେଳାଳି ଭାଗ ନେଇଥିଲେ ହେଁ ସଫଳତା ପାଇପାରିନାହାନ୍ତି।