ନୂଆଦିଲ୍ଲୀ,୨୨।୭: ଗତ ୨ ଦିନ ଧରି ଅନ୍ତର୍ଜାତୀୟ ବଜାରରେ ସୁନା ଦରରେ ବୃଦ୍ଧି ପରିଲକ୍ଷିତ ହେବା ସହ ୧୦ ଗ୍ରାମ ପିଛା ଦର ୫୦ ହଜାର ଟଙ୍କା ଟପିଛି। ବୁଧବାର ନୂଆଦିଲ୍ଲୀରେ ସୁନା ଦର ୫୦,୯୨୦ ଟଙ୍କା ଛୁଇଁଥିବା ଜଣାପଡିଛି। ଅନ୍ତର୍ଜାତୀୟ ବଜାରରେ ଏହି ମୂଲ୍ୟବାନ୍ ଧାତୁର ମୂଲ୍ୟରେ ପରିବର୍ତ୍ତନ ଦେଖାଯିବା ଫଳରେ ଏଭଳି ସ୍ଥିତି ଉପୁଜିଛି। ବୁଧବାର ନୂଆଦିଲ୍ଲୀରେ ସୁନା ଦର ୧୦ ଗ୍ରାମ ପିଛା ୪୩୦ ଟଙ୍କା ବଢ଼ିବା ଫଳରେ ଏହା ରେକର୍ଡ ଉଚ୍ଚ ସ୍ତରରେ ରହିଛି। ଏହାର ପୂର୍ବ କାରବାରରେ ସୁନା ୫୦,୪୯୦ ଟଙ୍କା ରହିଥିଲା। ବୁଧବାର ରୁପା ଦର ୨୫୫୦ ଟଙ୍କା ବଢିବା ଯୋଗୁ କିଲୋ ପିଛା ଏହି ଧାତୁର ଦର ୬୦,୪୦୦ ଟଙ୍କା ଛୁଇଁଛି।
ମଙ୍ଗଳବାର ରୁପାର କିଲୋ ପିଛା ଦର ୫୭,୮୫୦ ଟଙ୍କା ରହିଥିଲା। ଏହି ପରିପ୍ରେକ୍ଷୀରେ ଏଚ୍ଡିଏଫ୍ସିର ବରିଷ୍ଠ ବିଶ୍ଲେଷକ ତପନ ପଟେଲ କହିଛନ୍ତି ଯେ, ଦିଲ୍ଲୀରେ ୨୪ କ୍ୟାରେଟ ସୁନା ଦର ୪୩୦ ଟଙ୍କା ବଢ଼ିବା ଯୋଗୁ ନୂଆ ରେକର୍ଡ ସ୍ତର ଛୁଇଁଛି। ଅନ୍ତର୍ଜାତୀୟ ବଜାର ଭଳି ଘରୋଇ ବଜାରରେ ସୁନା ଦର ଉଚ୍ଚରେ ରହିଛି। ଏହି ସମୟରେ ଅନ୍ତର୍ଜାତୀୟ ବଜାରରେ ସୁନା ଦର ଆଉନ୍ସ ପ୍ରତି ୫୭,୮୫୦ ଟଙ୍କା ରହିଥିବା ବେଳେ ରୁପା ଦର ଆଉନ୍ସ ପ୍ରତି ୨୧.୮୦ ଟଙ୍କା ରହିଛି। ବୁଧବାର ସୁନା ୧୮୫୦ ଡଲାର ସ୍ତର ଟପିବାରୁ ଏହା ସବୁଠାରୁ ଉଚ୍ଚ ସ୍ତର ବୋଲି କୁହାଯାଉଛି। ବର୍ତ୍ତମାନ କରୋନା ସଂକ୍ରମଣ ବଢିବାରୁ ଲୋକମାନେ ସୁରକ୍ଷିତ ନିବେଶ ଆଡକୁ ମୁହଁାଉଛନ୍ତି ଫଳରେ ସୁନାରେ ନିବେଶ ବଢୁଛି। ଏଭଳି କାରଣ ଲାଗି ସୁନା ଦରରେ ପରିବର୍ତ୍ତନ ଦେଖାଯାଉଥିବା ଜଣାପଡିଛି।