କଟକ ଅଫିସ,୧୬ା୭: ପଞ୍ଜାବରୁ ଓଡ଼ିଶାକୁ ଆସୁଥିଲା ପୁଳା ପୁଳା ସୁନା। ପରେ କଟକର ବିଭିନ୍ନ ଦୋକାନରେ ବିକ୍ରି ହେଉଥିଲା। ଏଥିପାଇଁ ଦୋକାନୀଙ୍କୁ ଜିଏସ୍ଟି ଦେବାକୁ ପଡୁ ନ ଥିଲା। ଟ୍ରେନ୍ରେ କୌଣସି ଧରପଗଡ଼ ନ ଥିବାରୁ ଦୀର୍ଘଦିନ ଧରି ଏହି ବେଆଇନ କାରବାର ଚାଲିଥିଲା। ଗୁରୁବାର ଏହି କାରବାରର ରହସ୍ୟ ଉନ୍ମୋଚନ କରିଛି କମିଶନରେଟ୍ ପୋଲିସ। ଏଥିରେ ସମ୍ପୃକ୍ତ ୩ ଜଣଙ୍କୁ କାବୁ କରିବା ସହ ୨ କିଲୋ ୨୯ ଗ୍ରାମ ମିଶ୍ରିତ ସୁନା ଜବତ କରିଛି। ଏହାର ଆନୁମାନିକ ମୂଲ୍ୟ ୫୩ ଲକ୍ଷରୁ ଊର୍ଦ୍ଧ୍ୱ ଟଙ୍କା ହେବ। ଏତଦ୍ବ୍ୟତୀତ ୨୭,୮୦୦ ଖଣ୍ଡ ଗୋଲ୍ଡ ପ୍ଲେଟେଡ୍ ଅଳଙ୍କାର ଜବତ ହୋଇଛି। ପରେ ଜିଏସ୍ଟି ବିଭାଗ ପକ୍ଷରୁ ସେମାନଙ୍କଠାରୁ ୩ ଲକ୍ଷ ୨୩ ହଜାର ୧୧୮ ଟଙ୍କା ଜରିମାନା ଆଦାୟ କରାଯାଇଛି।
ଏ ସମ୍ପର୍କରେ କଟକ ଡିସିପି ପ୍ରତୀକ୍ ସିଂ କହିଛନ୍ତି, ବାହାର ଅଞ୍ଚଳରୁ ସୁନା ଅଣାଯାଇ କଟକରେ ବେଆଇନ ଭାବେ କାରବାର କରାଯାଉଥିଲା। ବିଶ୍ୱସ୍ତ ସୂତ୍ରରୁ ଖବରପାଇ ବୁଧବାର ସନ୍ଧ୍ୟାରେ ମାଲଗୋଦାମ ପୋଲିସ ଷ୍ଟେଶନବଜାର ଅଞ୍ଚଳରେ ଚଢ଼ାଉ କରିଥିଲା। ସେଠାରୁ ରଞ୍ଜନ ସାହୁ, ଗୁରୁଜିତ ସିଂ ଓ ମନପ୍ରୀତ ସିଂଙ୍କୁ ପୋଲିସ କାବୁ କରିଥିଲା। ପଞ୍ଜାବ ଅମୃତସରରୁ ଗୁରୁଜିତ ଓ ମନପ୍ରୀତ ଟ୍ରେନ୍ ଯୋଗେ ରଞ୍ଜନଙ୍କୁ ସୁନା ଦେବାକୁ ଆସିଥିବା ପଚରାଉଚରା ପରେ ଜଣାପଡିଥିଲା।
ଯାଞ୍ଚ ସମୟରେ ସୁନା ଅଳଙ୍କାରର କାଗଜପତ୍ର ଦେଖାଇପାରି ନ ଥିଲେ। ଫଳରେ ଜିଏସ୍ଟି ଫାଙ୍କିଥିବା ସମ୍ପର୍କରେ ଜଣାପଡିଥିଲା। ଜିଏସ୍ଟି ବିଭାଗ ଅଧିକାରୀ ପହଞ୍ଚତ୍ ସମସ୍ତ କାଗଜପତ୍ର ଯାଞ୍ଚ କରିବା ସହ ସେମାନଙ୍କଠାରୁ ଜରିମାନା ଆଦାୟ କରିବା ପରେ ସେମାନଙ୍କୁ ଛଡ଼ାଯାଇଥିବା ମାଲଗୋଦାମ ଥାନା ଅଧିକାରୀ ତୃପ୍ତି ରଞ୍ଜନ ନାୟକ କହିଛନ୍ତି।